Metiu 2

Tongge parfat ting weng

1 Wimi ine Yesus e fuut una Betle-em ina Judia, lo biing Erot e ta king, fang kaltu parfat ting uweng ri puek una Jerusalem, 2 ma ri ka gatom, “Iya e boroner wa ka fuut king kere fan Juda? Kemem sau pari e angkeltot kia ting weng ma kemem ka puek una sa nining lo.”

3 Biing King Erot e ong lo mok a, i e sangfuunfuun ma fan Jerusalem ming ri sangfuunfuun. 4 I ka tau tiim ire tongge gii, fam pris lamlam ma fan titsa lo fafanau ma ka gatom ri use male Kristus eu fuut ilo. 5 Ri ka koso, “Ina Betle-em ilo male ina Judia, are profet e sam seti:

6 ‘Safle o Betle-em ilo nal Judia,

o tibi ta imi sak ine fanenger fan male e mel e asow ina Judia.

Le tinglo o, eu mel e ti kaltu bakir

eu fespuek ku ta efefe kere tongge kiang, Israel.’ ”

7 Kala Erot ka tuleni e sunwar borong tifre fang kaltu parfat a. I e bur parfat lo sese biing tikin angkeltot a e puek. 8 E tule ri wina Betle-em ma ka war, “Gam u la siksik kausi ine boroner a. Le gam ku la sikseni, gam u mil gam ku sa peteng tif yau, usi yau ming yau la nining lo.”

9 Wimi ini ri sam ong singe king, ri fes ri ka la ma ulo sal angkeltot ri sau pari ting weng e famu mil iri ka muut e la kiis sok ulo male boroner a ulo. 10 Biing ri pari e angkeltot a e la kiis sok, ri fefeal tikin. 11 Ri ka puek ulo fel, ri ka pari e boroner tura tinow Maria, ri ka por ma nawen ma nining lo. Wimi ri ka ipki e fan tang keri ma ri ka tow e fam finafen a, gol, insens ma mira. 12 Ulo numbiil Taufi e fanauri, ini riu tibi la mil use Erot. Riu usi e neng e sal una la mil ilo kaontri keri.

Fin borong wina Ijip

13 Biing fang kaltu parfat ri sam la, anggelo ke Taufi ka puek talo Josef lo numbiil ma ka war, “Matet, onu e boroner ma tinow gam ku fin wina Ijip. Gam u melmel wa ku muut yau peteng mil tifo, anwarow Erot e mu sik ine boroner una paketmet ini.”

14 Josef ka matet, ka onu e boroner ma tinow lo panambiing a ma ri ka la una Ijip. 15 I ka melmel wa ka muut lo Erot e met. Mok gii e fawetu e sunwar Taufi e sau peteng ini tifre fam profet: “Tingna Ijip ya tau ine sikuang.”

16 Biing Erot e parfailmi, ini fang kaltu parfat ri sormo, i e balasak, ma i ka fauun una paketmet ine berat fan tamat, tingna Betle-em ma fan male fatat. Berberat nano e u e matamfaim ma ka pu. Anwarow lo biing a e sam ong lo singe fang kaltu parfat. 17 Iya, fan sa Taufi e sau peteng ini tife profet Jeremaiya, e sau fawet:

18 “Angkiimkiim ri ongni una Rama,

tineng ma sangkuuluung e bakir sak,

Reitsel e teng use tanga siksikow

ma ka guuluung sak, ini riu war kausi singi,

anwarow e sam tam iri.”

Fespuek una Nasaret

19 Wimi ine Erot e sau met, anggelo ke Taufi ka puek lo numbiil talo Josef una Ijip 20 ma ka war, “Matet Josef, onu e boroner ma tinow, ma gam ku la mil ina Israel, anwarow seri a, ri ka bala paketmet ine boroner, ri sau famete.”

21 Tingwa i e matet ka onu e boroner ma tinow, ma ri ka la ulo male ina Israel. 22 Safle biing e ong lo Akelaus e subuk efe lo Judia na pilsi e tamow Erot, i e soke una la wa. Ulo numbiil anggelo ke Taufi e sau fanauri ini i eu la ilo distrik Galili. 23 Ma i ka la melmel ulo taon ri fotngi ini Nasaret. Iya, ka fawetu e sunwar fam profet ri sau peteng: “Riu fotngi ini kaltu tingna Nasaret.”

<- Metiu 1 Metiu 3 ->