1 Wimi ine e on e biing, Yesus e onu e Pita, Jeims, ma Jon e ta tualik e Jeims. Ma ka uun ri, ri ka la ulo paklunmale e kiis iyat. Ma ri ka la melmel iri tibom uwa. 2 Ma biing ri parpar uwa, pinumfow e Yesus e fespuek ka ngo kuriik. Ma mata e sosok are pisii. Ma kolos kia ka fespuek ka la murmur sak are anten. 3 Moses ma Elaija ru puek ma fan disaipel ri ka par ru gongon tura Yesus.

4 Pita e pari e mok gii, ka war singe Yesus aregii, “Taufi, e kausi ini kiar u melmel wagii. Le o ku bura, yau feti e tuul e kak. Neng kiam, neng ke Moses ma neng ke Elaija.”

5 Pita e gongon uwa, ma pambalbal e sosok ten sak ka afit ri. Ma angkiimkiim e la tinglo bala pambalbal a e war aregii, “Igii e sikuang, ya bura sak; ma ya fefeal lo. Gam u ongong singi.”

6 Fan disaipel ri ongni e angkiimkiim gii, ma ri ka la soke sak, ri ka luut ulo nal. 7 Ma Yesus ka fespuek fatat ri ka pot lala lo ri, ma ka war, “Gau matet, gau mana soke.” 8 Biing ri par wiyat, ri tibi par tikas, safle Yesus tibom.

9 Biing ri fes pu lala tinglo paklunmale, Yesus ka fanauri aregii, “Gam u tibi la seseng tife tikas ine mok gam sau pari ku muut lo biing Sikow e Kaltu eu matet mil kosnge minet.”

10 Ma fan disaipel ri ka gatmo aregii, “Anwarow lo sa gii fan titsa lo fafanau ri ka peteng ini Elaija eu puek famu?”

11 Yesus ka koso aregii, “Yow, sunwar a e tikin. Elaija e samusu puek una fariisu e fan mok nano. 12 Sakle ya peteng tif gam, Elaija e sau puek safle tongge ri tibi parfat lo, e tam, ri usi e sinanguri tibom ma ri ka bero ini, ma sinang mung a riu gow lo Sikow e Kaltu.” 13 Wimi, fan disaipel ri kau parfat ini i e gongon lo Jon, kaltu na gugu tarawen ire tongge.

14 Yesus tura e tuul e disaipel kia ri sa fespuek mil talo singmat na galung kaltu, neng e kaltu ka sa pukungkek u famu ine Yesus, 15 ma ka war, “Taufi! Tengsi e sikuang, i e lomlomba, ka banban ma ka luutluut talo nal, ma i ka kepe ongker bakir sak. Tom biing eu luut talo iif, ma tom biing eu luut talo bala dan. 16 Ya onu tifre fan disaipel kiam, safle ri tibi fasi una faliungeni.”

17 Ma Yesus ka koso aregii, “Gam na kulu na tibi titinge, sinangumi ma ninis kemi e tibi kausi, e sak sekit. E fis e biing yau melmel tura gam? Ma e fis e biing ming yau kepe mafet tura gam? Kepe e boroner a wagii tif yau.” 18 Ma Yesus ka war rawas singe tangwaner saksak a, ma tangwaner saksak a ka la kosngi ma saupesak anminse ulo boroner a ka rop.

19 Ma wimi biing ri sam la ta iri tibom, fan disaipel ri ka gatmo e Yesus aregii, “Areini kemem ka tibi fasi una feselufu e tangwaner saksak gii?”

20-21 Ma i ka koso singri aregii, “Anwarow titinge kemi e balik sak. Ya peteng tikin tif gam, le titinge kemi enggi su balik are amfiran mastet, gau fasi una war singe paklunmale gii ku se ting wagii ku la waleii, ma ku se. E tek ti mok eu kalkala sing gam.”

22 Yesus tura fan disaipel ri tiim una Galili, ma Yesus ka war singri aregii, “Sikow e Kaltu riu solamufu ku la ilo limre tongge, 23 ri ku paketmet ini. Ma lo biing e tuul Deo eu famtete mil.” Fan disaipel kia ri ongni e sunwar kia ma ri ka la sangkuuluung.

24 Wimi Yesus ma fan disaipel kia ri tiim ulo taon Kapernaum, ma tongge una kepkep mani tinglo Felun Nining Bakir ri ka gatmo e Pita aregii, “Titsa kiam, e basbas mani ming wilo felun nining bakir?”

25 Ma Pita ka war, “Yow.”

Biing e kau ulo bala fel, e tifik war ma Yesus ka gatmo aregii, “Saimon, o sang areini, tongge lamlam tinglo nal ri kepe mani singe se? Sing re siksikwari tam singre fa kuriik?”

26 Ma Pita ka war, “Sing re fa kuriik.”

Ma Yesus ka peteng tifi aregii, “Siksikwari tibom ri tibi fasi una tow e mani. 27 Sakle usi ini kereu tibi pete balasak iri, ou la ilo bala dan o ku la bas ine keu fan wa, ma fis baba tikii eu liil, ou kepe o ku ipki e ngusu, ma o ku kepe e mani ilo bala. Mani a, e ta kara ou tow tifri.”

<- Metiu 16Metiu 18 ->