1 Lo biing a Erot kaltu bakir lo gapman e ong lo fan sinseng lo Yesus, 2 i ka war singre fan tongge na mus kia, “Kaltu gii e ta Jon kaltu na gugu tarawen, e matet mil kosnge minet. Iya ka fasi una gow e fan mok rawas na tibou fuut.”

3 Famu Erot e sau bingfamti e Jon ka towfu ulo rerek. Anwarow lo Erodias, wok ke tualik e Erot, Filip. 4 Le Jon e sau peteng tifi, ini e tibi riis ususi e fafanau ini i eu tili e Erodias wok ke tualik. 5 Erot e bur paketmeteni e Jon sakle e soke re tongge, anwarow ri pari are profet.

6 Lo biing na sangfi e biing Erot e fuut lo, sikow fefin e Erodias e guui tifri. I ka gow e bala e Erot ka fefeal tibom. 7 Iya Erot ka limlim ini eu tow e sese ti mok a i ka bura sak, le i ku gatom usi. 8 Anwarow le tinow e sau peteng tifi ini sa eu gatom usi, i ka war, “Tow e paklu e Jon kaltu na gugu tarawen tif yau gii, ilo bala ti dis.” 9 Erot e la sangkut, sakle anwarow lo limlim kia namatre tongge lamlam ulo en a, i ka fauun usi e sa fefin a e gatom usi, ku puek. 10 Ma ri ka la tesepakti e ankongkongow e Jon ulo bala felun rerek. 11 Ma ri ka kepe paklu lo dis ri ka la tow tife fefin a, i kam la tow tife tinow. 12 Wimi fan disaipel kia ri kam sa kepe e pinumfow e Jon ri ka la ofo. Ma ri kam la ri ka la peteng tife Yesus.

13 Biing Yesus e ong lo sa e sau fuut, i e bom awes ka la ulo mok e tek tikas ulo. Sakle tongge ri sam ong lo ri ka fes usi tinglo fan taon. 14 Lo biing Yesus e la masa, i ka pari e singmat na galung kaltu a, ma i ka tengis ri sak. Ma ka faliungere fan tongge ri mase.

15 Biing e lala una la efef, fan disaipel ri ka la use Yesus ri ka la war, “Male gii e sasngal, ma e sau bala biing. Ou tulere tongge ri ku la ilo fan male, usi riu la fiil ton tuan ari ri ku en.”

16 Ma Yesus ka koso, “E tam, riu tibi la. Gam u tow e ti tuan una en singri.”

17 Ma ri ka koso. “Kemem su mel lo e lim e sumberet ma e u e fis.”

18 Ma Yesus ka war, “Kepe wagii tif yau.” 19 Ma i ka fauun tongge ri ka kiis ulo garas. Ma ka kepe e baba lim na sumberet a tura um fis, ka par wilo balambat, ka aro singe Deo ma ka bingpapaekri. Wimi ka tow tifre fan disaipel ma ri ka ti lo re tongge ini. 20 Tongge nano ri tiin en ri ka la sut ma fan disaipel ri ka sele tiim ine fan susun tuan e ngosok ri ka siing tiim ini ka puek ka la ta tikii sangful ma e u na dik. 21 E ngo areini e lim e mar na tamat sekit ri en. Ri tibi wesre gelefin ma berberat.

22 Wimi sekit ini ri en tikii, Yesus ka uunre fan disaipel ri ka kaulek ulo bala mon ri ka la famu ini ulo neng e galu, ma i kabi tulere tongge. 23 Wimi ini e sam tuleri, i ka la kanek ulo paklunmale, ka la nining. I tibom ulo paklunmale a ka la efef talo. 24 Sakle mon e sam la u tapak. Ma kif e la ting famu ini ka pospose ulo.

25 Ma enene Yesus ka la usi ri. I e fes ulo poktow e salat. 26 Biing fan disaipel ri pari e fes lala ulo poktow e salat, ri soke sak. Ri ka tau soksoke sak ri ka peteng ini, “Tara!”

27 Sakle Yesus e saupesak ka war singri, “Balamas, yau legii, gau mana soke.”

28 Ma Pita ka koso, “Taufi, le ku ta o, peteng tif yau, ya ku fes ilo poktow e salat usi o.”

29 Ma Yesus ka war, “Kasa.”

Ma Pita ka pu tinglo mon ka fes ulo poktow e salat use Yesus. 30 Ma biing e la pari e kif i e soke ma ka tofnge una maut gii ka tau singe Yesus aregii, “Taufi, ules yau!”

31 Saupesak Yesus ka sangau ine limow ka ulsi, ma ka war, “Titinge kiam e balik sak, e tamu o ka sang fa-u?”

32 Ma biing ru kau ulo bala mon kif ka la met. 33 Wimi fa a ulo bala mon ri ka nining lo, ri ka war, “Tikin sak o na Sikow e Deo.”

34 Biing ri sam kaupaket ri la ba una Genasaret. 35 Ma biing antamat tinglo male a, ri parfailmi e Yesus, ri tuleni e sunwar tifre mara male liflifit ri. Ma tongge ri ka uun puek ire tongge ri mase tifi. 36 Ma ri ka sa war fangfangteni ini eu su towfu e tongge mase a ri ku su pot lo anisow e ke kolos. Ma tongge nano a ri ka pot lo anisow e ke kolos, ri liu.

<- Metiu 13Metiu 15 ->