1 Lo biing a, singmat na mar na kaltu tikin ri puek tiim gii male ka la kut, iya ri ka pii faliu lo kekek ri ma Yesus ka gongon famu singre fan disaipel kia, ka war, “Gam u ate use is kere fam Farasi, le melmel keri e tibi usi e fan warwar keri. 2 Mara mok e fifinuf, e amu puek malal. Ma fan sa e keskum, eu puek ten. 3 Sa gam war ini ilo bala anor, riu ongni lo siat, ma sa gau fakinal ini ilo bala fel, riu taungeni ilo poktow e fel.

4 “Ya peteng tif gam tanga fenfenngong, gam u tibi soke re tongge a ri ku paketmet ine pinpinumfomi ma safle wimi, riu tibi fasi una gow e tikas ti mok ming. 5 Safle yau fanas gam ini se gam u sokeni. Gam u sokeni e se a, wimi ini e sau paketmet ine pinumfow e kaltu, i e mel e rawas ma mia una bas ini ilo bala iif. Yow, ya peteng tif gam, gam samusu sokeni. 6 Gau parfat ini tongge ri su felfeli e lim e amboron man ine 2 toiya, safle e tek ti fa lo ri, Deo eu sangintafngi. 7 Safle e tikin, fan mara sisian ololom tinglo paklum, Deo e sam wes famti. Ilea, gam u tibi soke, gam kulfi tikin e fan irin man gii.

8 “Ya peteng tif gam, se e sesuupuek i yau na matre tongge, Sikow e Kaltu ming eu sesuupuek ini na matre fan anggelo ke Deo ilo balambat. 9 Safle se a ka peteng tifre tongge ini i e tibi ta lo yau, yau ming yau peteng tifre fan anggelo ke Deo ini i e tibi ta lo yau. 10 Ma tongge nano gii ri ku gow e ti sunwar una fotpursi e Sikow e Kaltu, tubiil keri Deo eu sangintafngi, safle se gii ku gow e ti sunwar e sak use Tangwa Riis, Deo eu tibi sangintafngi sekit e tubiil kia. 11 Biing riu uun o ri ku la fetiuf o i famu ine fam felun nining, tam fang kaonsiil ma ge lamlam na famfamu, gam u tibi sangfuunfuun ini are gam u fakale lo gam tibom, tam sa gam samusu peteng ini, 12 le Tangwa Riis eu fabenge sing gam lo biing a, ine sa gam samusu war ini.”

13 Nenge kaltu ulo falifu ire tongge a ka war singi, “Titsa, tabuung e sau met. Onu e tuaklik ku faseni e tuba e tauma lo kama.”

14 Yesus ka koso, “Kaltu, se e sam siik yau una ta medistret tam una ti falifu i kamu?” 15 Wimi i kam war singre tongge a, “Gam samusu ate! Efefe kausi, are gam ka fabur use fan mara matmatan sinang na koko; kaltu e tibi fasi una kepe ninliu singe tuba.”

16 Wimi i ka peteng tifri ine warwar toftof gii, “Palang ke neng e kaltu tuba mel e fafuutngeni e fan tuan fuunfuun. 17 I ka war singi tibom, ‘Ya ku gow e sa gii? E tek kek ti fel una tatauf fan tuan aiyang.’

18 “Wimi i ka war, ‘I gii e sa yau gow. Yau paekufu e fan mara felum fitiil kiang ma ya ku feti e ti fanenger lamlam, usi yau tatauf fan mara firfiran wit ma fan mara konona fan mok kiang ilo bala. 19 Ma ya ku war sing yau tibom aregii, “E fuun tikin e konona fan mok kiang, ya tatauf wilo mara matmatamfaim. Gii ya su manmanau, ya ku su enenen, ya ku su ininin ma ya ku su gasgas.” ’

20 “Safle Deo e war singi, ‘O lomba tikin! Geinggii na panambiing ou met. Wimi, se gii kamu kepe e fan sa o sau fagatiufu usi o tibom?’

21 “I legii e mok eu fuut lo re tongge a ri ka taftafngeufu e tuba ri usi ri tibom, safle ri tibom ri sasngal na mata e Deo.”

22 Kala Yesus ka war singe fan disaipel kia, “Ilea ya ka peteng tif gam, gam u mele sangfuunfuun use ninliu kemi, ini sa una en, tam use pinumfomi, ini sa gam u los lo. 23 Ninliu e bakir iyat ine tuan una en ma pinumfomi e bakir iyat ine fang kolos. 24 Sang usi re fang kiyaukang[a], ri tibi umume tam ri tibi fitfitiil, e tek ti felun tuan keri ma e tek ti fel keri una tatauf, safle Deo e fenfen ri. Ma gam, gau bakir iyat ire fan talaman na mata e Deo. 25 Le gam ku sangsang fuunfuun usi e ninliu kemi wagii lo nal, gam sang ini sangsang a e fasi una posmi balik e ninliu kemi ine ti borom pansumbiing? E tam. 26 Le gam ka tibi fasi una gow e tom boron mok aregii, e tamu gam ka sangfuunfuun use fanenger fan mok ming?

27 “Gam sang use fam purpur a ri ka faf aina mok. Ri tibi fafaim fuunfuun, tam ri tibi somsomap lo fang kolos. Safle ya peteng tif gam, King Solomon e loslos lo fam finaswen kia, safle fam finaswen kia e tibi kulfi e fam finaswen kere fam purpur gii. 28 Ma le ku ta ini Deo e fasfaswenu e fang garas aiya, a ku ta iri geinggii ma na biingbiing tongge ri ku tetes ma ri ku bas iri ilo bala iif, ma gam, gau bakir iyat ine fang garas, Deo eu tow e fang kolos kemi. Kiskam sing gam, titinge kemi e su balik. 29 Ma mele sik ini sa gam u eni tam sa gam u inmi, mele sangfuunfuun usi. 30 Anwarow tongge tinglo nal ri siksik tuntun ine fan mok aregii, ma Taumi, i e parfat ini gau bura e fan mok aiya. 31 Safle gam samusu sik ine kepmale ke Deo, ma i kamu tata fan mok ming gii tif gam.

32 “E tikin, gam su ta borong galun sipsip, safle gam u tibi soke, anwarow Taumi e sau fefeal una tow e kepmale kia tif gam. 33 Umat ine fan mok gau mel lo ma gam ku fenre fan sasngal ine fan mani lo. Gam samusu kepe e fam poket gii ka tibi fasi una sak. Ma gam ku kepe e fan mok piik tinglo balambat gii ka tibi fasi una tam ini, ma tongge na kinkinau ri ku tibi fasi una kinow tam fam pespes ri ku tibi fasi una bero ini. 34 Anwarow le fan mok kausi kiam ri ku ta iya, ambusbusau ming eu ta wa.

35 “Gam samusu fagati gam una faim. Piilpiiliis ma tafu e fan lam kemi ri ku fufuf, 36 are tongge ri nene-i e kaltu bakir keri e bala mil tinglo en na tinaule, usi le i ku puek ma ku tukeni e matangkon, riu saupe tikin una ipki e matangkon tifi. 37 Eu kausi singre tongge na mus a, le kaltu bakir keri ku puek ma ku pari ini ri parpar. Ya peteng tikin tif gam, i eu bou faswenu una faim ma ku uun ri, ri ku fakiisnge liflifti e teibel una en ma i ku puek ku fen ri. 38 Ma eu kausi singre tongge na mus a, antalu le kaltu bakir keri ku fespuek lo palim e biing, tam lo enene ma ku pari ini tongge na mus kia ri fagati ri una nene-i. 39 Safle gam u ten aregii; le kaltu ine ke fel enggi sau parfat lo sese anmatam pisii kaltu na kinkinau eu puek lo, i enggi tibi fasi una tafu e ke fel ri ku paki ma ri ku kau ilo. 40 Gau ming, gam samusu fagati gam, anwarow Sikow e Kaltu eu puek lo ti anmatam pisii gam tibi sangfi ini i eu puek lo.”

41 Pita ka gatmo, “Taufi, areini, o petpeteng ini warwar toftof gii tif kemem, tam tifre tongge nano?”

42 Ma Taufi ka koso “Sese kaltu a ka sagisu fafaim kausi ma ka mel e konona sangsang kia? I e ta kaltu a, kaltu bakir kia ku towfu una efefe lo re tongge na mus ilo ke fel ma una fenfen ri riis, lo fam biing una enen. 43 Eu kausi singe kaltu na mus a, le kaltu bakir kia ku mil ma ku sa pari ini i e musmusngeni e faim kia. 44 Ya peteng tikin tif gam, kaltu bakir a eu towfu e kaltu na mus a una efe lo fan mara ninsiow. 45 Safle, le kaltu na mus a ku war singi tibom aregii, ‘Kaltu bakir kiang e tibi fasi una puek saupe,’ ma ku tofnge una paket re fan taltalu, antamat ma gelefin, ma i ku su enen ma ku su inin ku bengbeng, 46 Kaltu bakir eu puek lo biing gii kaltu na mus kia ka sangfi ini i eu tibi puek lo, ma lo anmatam pisii gii i ka tibi ateni. Kaltu bakir a eu tese liklik ine kaltu na mus a ma ku taufu ku melmel tura re tongge na tibi titinge.

47 “Kaltu na mus gii ka parfat lo fabur ke kaltu bakir kia ma ka tibi fagati una nene-i, tam ka tibi gow e sa kaltu bakir kia e bura ini i eu gow, riu napis fuunfuun ine kaltu a. 48 Safle kaltu na mus gii ka tibi parfat lo fabur ke kaltu bakir kia ma ka tibi fagati una nene-i, tam ka tibi gow e sa kaltu bakir kia e bura ini i eu gow, riu tibi napis fuunfuun ine kaltu a. Se ri a ri ka tow e fan mok fuunfuun tifri, riu gatom ri use fan mok fuunfuun. Ma seri a ri ka tow e fan mok fuunfuun tikin tifri, riu gatom ri ming use fan mok fuunfuun tikin.

49 “Ya sau puek una tow e iif ilo nal, ma ya bura tikin ini iif gii enggi sam tofnge una sok. 50 Safle ya samusu kepe e neng e amfagu, ma balang e mafet tikin, ku muut lo biing amfagu a eu rop. 51 Areini, gam sangfi ini ya puek una sa toufu e balamaris ilo nal? E tam. Ya peteng tif gam, ya puek una sa pete fapotpot ire tongge. 52 Tofnge ting geinggii ma ku la, le ka lim ailo bala fumberat, riu tapot ma ri ku fagorot iri tibom. E tuul e neng riu sak lo e u e neng, ma e u e neng ru ku sak lo re tuul neng. 53 Riu tapot, tamow eu sak lo sikow ma sikow tamat ku sak lo tamow. Tinow eu sak lo ke fefin ma ke fefin ku sak lo tinow. Ma tinow e kaltu eu sak lo awow, ma awow ku sak lo tinow e ke matuk.”

54 Yesus e peteng tifre tongge, “Biing gau pari e pambalbal e kanek ting u sif, saupe tikin gam ku peteng ini bat eu luut, ma eu luut. 55 Ma biing gau pari e kif tinglo galu ise e matet, saupe tikin gam ku peteng ini male eu tuntun, ma eu tuntun. 56 Tongge na gurgurum, gam parfat una ikseni e parpar lo nal ma batsok. Ma areini gii gam ka tibi parfat una ikseni e sumbiing gii?

57 “Use e tamu gam tibom gam ka tibi ikseni e fan sa e riis? 58 Biing o fesfes lala aiwa ilo sal tura kaltu una la tauf o tife medistret, tofo una fafariis tura, are i enggi am la tauf o tife medistret, ma medistret kam tauf o tifre fam polis ma ri kam tauf o ilo rerek. 59 Ya peteng tif gam, gam u tibi fasi sekit una suu ku muut gam u faropo e fimfiil ri tow tif gam.”

<- Luk 11Luk 13 ->