1 Yesus e peteng ming aregii, “Gam u tibi soke ma sangfuunfuun, gam titinge lo Deo, gam samusu titinge lo yau ming. 2 Ilo fel ke Tabuung, fan rum ilo e fuun ma yau la tererngeni e tafumi. Le ku tibi ta aiya, ya tibi fasi una gow e sunwar gii tif gam. 3 Ma le ya ku la teregeni e male kemi, yau mil ya ku sa un gam, usi gam u la melmel tura yau, ilo male yau melmel ilo. 4 Ma gam sau parfat lo sal una la ilo male gii, ya ka bala la wilo.”

5 Tomas e war singi, “Taufi, kemem tibi parfat ini o bala la iya, ma areini gii kemem ku parfat lo sal?”

6 Ma Yesus ka koso singi aregii, “Yau tibom ya na sal, ma ya na anwarow e sunwar e tikin, ma ya na ninliu, e tek tikas eu puek talo Tabuung lo neng e sal, e tam. Safle lo yau tibom. 7 Le gam gi sau parfat lo yau, gam gi fasi una parfat ming lo Tabuung. Gii, gam sam tofnge una parfat lo, ma gam sau pari.”

8 Filip e peteng tife Yesus aregii, “Taufi, fanangsi kemem ine Tamam, usi eu fawetu e fam fabur kemem ma sinsinangumem.”

9 Ma Yesus ka peteng tife Filip, “Mara biing fuunfuun tikin ya melmel tura gam ma o tifik parfat lo yau, be? Se a kabuk par yau, i e sau pari e Tabuung. Usi e tamu o ka peteng ini, ‘Fanangsi kemem ine Tamam’? 10 O tibi titinge lo ini, ya mel ilo Tabuung ma Tabuung e mel ilo yau? Sunwar ya tow tif gam, ya tibi tow ususi e sangsang kiang tibom, e tam. Tabuung e mel gii lo yau e pauti e faim kia. 11 Gam samusu titinge lo sunwar gii, ‘Ya mel ilo Tabuung, ma Tabuung e melmel ilo yau’. Ma le ku tam, gam samusu sangfi e fan mara faim ya gow, ma i mung gii ku famtete e titinge kemi. 12 Ya peteng tikin tif gam, kaltu e titinge lo yau, i eu gow e fam faim are ya sam gow. Ma eu kulfi e fam faim ya gow, anwarow yau la usi e Tabuung. 13 Ma sese mok gam gatom usi lo asang, yau gow usi Tabuung eu kepe finaswen singe Sikow. 14 Gau fasi una gatom yau use sese ti mok lo asang, ma ya ku fawetu.”

15 Yesus e war ming aregii, “Le gam ka bur yau tikin, gam u usi fakausi e fan warwar kiang. 16 Ma ya mu gatmo e Tabuung, usi eu tow e neng e Faules una faraunge gam, usi eu melmel tiim tura gau bingne. 17 Faules gii e ta Tangwa una peteng tikin ine fan mok. Tongge tinglo nal ri tibi fasi una kepe, anwarow ri tibi pari, ma ri tibi parfat lo. Sakle gau parfat lo, anwarow i e melmel tura gam, ma i e ta ilo balbalmi. 18 Ya tibi fasi una la kosing gam, ma ya ku tauf gam are fum finang, e tam. Yau mil usi gam. 19 Eu tibi baf, ma tongge gii lo nal ri ku tibi par yau. Safle gam u par yau mil. Anwarow ya liu, gam ming gam u liu. 20 Lo biing a, gam amu parfat ini ya melmel ilo Tabuung, ma gam ku melmel ilo yau, ma ya ku melmel ilo gam. 21 Kaltu e ongni e fafanau kiang ma ku usi fakausi, i e kaltu e bur yau tikin. Ma kaltu e bur yau tikin, Tabuung eu bura sak, ma yau ming yau bura, ma ya ku fafanas i yau tibom tifi.”

22 Judas, (e tibi ta ini Judas Iskariot) i e gatmo e Yesus aregii, “Taufi, areini gii o ku fafanas i o tibom tif kemem ma tongge tinglo nal ku tam?”

23 Ma Yesus ka koso e sunwar kia aregii, “Le kaltu ku bur yau tikin, i eu usi fakausi e sunwar kiang. Ma Tabuung ku bura e kaltu a, ma kama ku puek usi, kama ku melmel tiim tura bingne. 24 Kaltu e tibi bur yau, eu tibi fasi una usi fakausi e sunwar kiang. Sunwar gii, gam ka ongni e tibi ta ini sunwar kiang tibom, e tam. E ta sunwar ke Tabuung, se e tule yau.

25 “Ya peteng famu ine mara mok gii tif gam, lo biing ya melmel gii wa tura gam. 26 Sakle Faules tikin una farawnge gam gii, Tangwa Riis. Ma lo asang, Tabuung e mu tuleni ma i e mu fabenge sing gam lo mara mok nano. Ma i e mu famtete mil e sinsinangumi, usi gam u sagif famila e mara mok ya peteng ini tif gam. 27 Balamaris gii yau towfu tif gam, e ta balamaris kiang ya tow. Balamaris gii e tibi ngo aregii tongge gii lo nal ri towtow. Ma gam u tibi soke, ma sangfuunfuun.

28 “Gam sam ongni e sunwar, ya peteng tif gam ini, ‘Yau la kosing gam, ma wimi yau mil usi gam.’ Le gam ang gi bur yau tikin, gam ang gi fefeal ini ya la mil use Tabuung, anwarow Tabuung i iyat i yau, ma e kulef yau. 29 Mok gii e tifik fespuek, ma ya ka peteng tif gam ini, usi eu fespuek, ma gam u titinge. 30 Yau tibi war fuunfuun sing gam, anwarow efefe lo nal gii, e sau bala puek. I e tek ti rawas kia una gow e ti mok lo yau. 31 Sakle ya bura ini tongge gii lo nal, riu parfat ini ya bura tikin e Tabuung. Ma ya gow e mara mok, Tabuung e peteng ini yau gow.

“Kemin matet, ma kiar ku la ting wagii.”

<- Jon 13Jon 15 ->