Ibru 5

1 Mara paklure fam pris ri siik ri tingna balre tongge ma ri ka tauf ri una keptafu re tongge tura fan mafet keri tura Deo. I e fafafen ine fam finafen tife Deo are fam fafen una sangintafngi e fan tubiil keri. 2 Fam paklure fam pris gii, ri fasi una ules fakausi re tongge ri tibi parfat lo kausi ma sak ma ri ka fes saef, anwarow ri ming ri luutluut lo tubiil. 3 Iya, i ming e samusu fafen ine fam finafen tife Deo use fan tubiil kia tibom, aregii i ka gow lo re tongge tura fan tubiil keri.

4 Ma e tek tikas ek fasi una bom kepe e faim bakir gii, paklure fam pris talo i tibom. I eu kepe faim gii le Deo ku sikii, aregii i ka sikii e Aron. 5 Iya, Kristus ming e tibi bom kepe e faim bakir gii, paklure fam pris talo i tibom, e tam Deo e war singi,

“O na Sikuang,

geinggii, ya sam ta ya na Tamam.”

6 Ma ilo bala neng e su, i e war ming aregii,

“Ou ta pris bingne bingne

are pris Melkisedek.”

7 Biing Yesus e melmel uwa wagii lo nal, i e fafafen ine fan nining ma fang gatgatom tura tineng bakir tife se e fasi una faliungeni kosnge minet ma Deo ka ongne nining kia, anwarow i e faporo e fabur kia tibom ilo pikliu e Deo. 8 E tikin, i e ta Sikow e Deo, sakle i e fafas una usi e Deo, tikin lo fan mara mafet i e kepe. 9 Aregii, biing Deo e sau fagatiufu sekit e Yesus, Yesus e sam ta anwaramfaliunge bingne bingne kere tongge gii ri ka sagisu ususi e sunwar kia. 10 I e fasi una faliungere tongge aregii, anwarow Deo e sam sikii ini i eu ta paklure fam pris are pris Melkisedek.

War ate use sinang na fes saef

11 E mel e fan mok fuunfuun iwa ya bura ini yau warwar lo, lo mok gii, sakle e kalkala sing yau una fatenngeni tif gam, anwarow gam tibi sausaupe una ten usi. 12 E tikin ini gii, gam gi sam ta fan titsa, anwarow gam sam titinge tingwa, sakle e fasi aiwa ini tikas eu sa fabenge mil sing gam ine fan warwar ke Deo gam sam ongni tinglo tofnge. Gam susus aiwa, gam tibi fasi una eni e ti tuan e patpat. 13 Se a ka susus iwa, i e ta buubuun. I e tibi parfat ma e tibi ten use fam fabenge lo sinang riis. 14 Sakle tuan e patpat, e ta are tongge lamlam, anwarow ri sau fafas lo sumbiing tapak una parfailmi e sa e kausi ma sa e sak.

<- Ibru 4 Ibru 6 ->