3 Tow e parfailiim kiam use seri tikin a, ri ka ta fan wok makos ma ka tek tikas una efe lo ri. 4 Safle le makos ka mel e siksikow ma fan tubungkak kia, e kausi ini fan tubungkak ma fan siksikow ri samusu gow famu e konona sinang ina balre amfumberat keri tibom. Ri samusu kos famila e fam faules kere tamtamri ma tintinri. Ma ri samusu gow anwarow fan sinang aiya Deo e fefeal lo.

5 Le makos ka melmel na finang tikin, makos a e sam tafu e titinge kia ilo Deo. Ma bingne ilo bala nining kia lo ansiat ma lo ampanambiing i e gatmo e Deo use faules. 6 Safle makos a ka su ususi e fam fabur tinglo pinumfow, e su ngo are tangow e sau met, safle fow e liuliu. 7 Tow e fam fabenge ming gii tifre tongge, usi ini eu tek tikas eu fasi una sikseni ini ri gow e mok e tubiil, le ri ku usi. 8 Le tikas lo gam ku tibi efe lo ke fumberat ma tongge tinglo ke matambia, i e sam la kosnge ke titinge, ma ka la sak sekit iyat ine kaltu a ka tibi titinge.

9 E kausi ini kiar u towfu e asow e wok makos ku kaulek tura asasre fanenger fan wok makos tikin a ker ka siit ufufu e asasri le kabuk on e sangful na matamfaim kia ma ka kanek, ma i e su tikii matuk kia. 10 Tongge ri parfat ini i e sam gow e konona fan sinang una faules, i e sau fangte fakausi re berberat, i e ta wok una arare re tongge. I e sam gugua e kekekre tongge ilo bala titinge lo Kristus, i e sam ules re tongge e mel e fan mafet keri una fariisu ma i e sam gow e fanenger fang konona fan sinang ming una ules re tongge.

11 Safle ou tibi tafu e asasre fan makos fuu, anwarow le ansinang na balri ku matet ma ku gau ri, ri ku fabur una tinaule, ri amu tibi sang bakir use Kristus. 12 Ma biing ri gorot aiya, riu ti ilo anganggon anwarow ri sam kere e warkale baba tikii keri tife Kristus. 13 Eu tibi ta warkale tibom, ri gow ming e fan sinang na main, ri ka su kaulek lala ilo bala fam fel una su faya fofoes lala. Safle mok e sak ming gii borbor, ma ri bura sak una ongni e fan sinseng lo fan sinang saksak fa lo re tongge ri gow. Ma ri war ine fan warwar ri tibi fasi una war lo. 14 Iya fan makos a, ri ka ta gelefin fuufuu aiwa, ya bura ini ri samusu tinaule mil, usi riu fasus ine fan siksikwari, una efe kausi lo fan male ma fam fel keri. Le ri ku gorot aiya, tongge na matamfais ri tibi fasi una pari e fan sinang ri gow, ma ri ku fotpuris kiar. 15 Usi e tamu ya ka seseng ine fan mok gii? Anwarow fa ri sam la kosnge sunwar tikin, ri ka usi e Satan.

16 Le ka mel e ti fefin a, e titinge lo Yesus, ma ka mel e ton wok makos ilo bala fumberat kia, i e samusu efe lo ri. Usi sios eu tibi kepe mafet a, ma ri ku su sang bakir una efe lo fa ri ka ta fan wok makos tikin.

17 E kausi ini kiar u matlawen singre tongge na famu ine sios ma kiar ku fiilri ming. Mok gii e tikin sak usi re fa a, ri ka fafabenge ma sesesngeni e sunwar. 18 Anwarow sunwar ke Deo e peteng, “Mele kawi famti e ngusu e buuluumakau biing e piipiiufu lala e pinpinun wit,” ma “Kaltu na faim e fasi ini e samusu kepe fimfiil kia.”

19 Le tikii tikas ku peteng ini kaltu na famu ine sios e gow e tubiil, mele ong singi. Sakle le ka u tam ka tuul e kaltu ri pari sekit ine matmatri, o kamu ong singri a. 20 Seri a, ri ka su ngos lo gow e fan tubiil, o samusu war namatri i famu ire tongge, usi seri ming a ri ku pari, ma ri ku ate usi.

21 Ya tow e sunwar gii tifo na mata e Deo ma Yesus Kristus ma fan anggelo a i kabuk sekfit ri, aregii, o samusu efe kausi ma usi e fam fabenge gii. Ma ou tibi ti kere fa ma o ku bero ire fa, ou su gow e tikii sinang lo re tongge nano.

22 Mele saupe una tow e limam lo ti kaltu una musngeni e faim ke Deo. Mele ta o talo fan tubiil kere fa. O samusu efe kausi lo o, usi ou melmel riis na mata e Deo.

23 Ou tibi su inmi e safle dan. O samusu inmi ming e ti boron rin waen, usi eu tow e faules tife balam ma fan minse a ka sagisu kepkep o.

24 Fan tubiil kere fa lo re tongge e suupuek na malal, fan tubiil a ri sam la ti ilo anganggon famu i re tongge ri gow e fan tubiil. Safle fan tubiil kere fa e ngo borong, e mu fespuek ten wimi. 25 E su ngo are konona fan sinang ming eu suupuek na malal. Ma konona fan sinang a ka tibi suupuek na malal saupe, ri ming riu suupuek malal.

<- 1 Timoti 41 Timoti 6 ->