1 Su e tikin tanga tuaklik, ya tibi fasi una war sing gam aregii ya ka warwar singre tongge ri melmel ususi e Tangwa Riis. Ya samusu warwar sing gam are tongge ri su melmel ususi e fan ninis tingga lo nal, ma are berberat ilo bala titinge lo Kristus. 2 Ya sam fen gam ine danun sus eu tibi ta tuan patpat, anwarow gam tifik fasi una en ti tuan patpat. Ma aiwa, gam tifik fagati gam usi. 3 Anwarow gau melmel iwa are tongge tinglo nal. Biing e mel e fa songenge ma fatinge falifu i gam, e tibi peteng fate ini gam melmel ususi e fan ninis tingga lo nal? Ma gam tibi fafanas i gam ini gam su melmel are tongge tinglo nal? 4 Biing neng lo gam e peteng ini, “Ya usi e Pol,” ma neng ka peteng, “Ya usi e Apolos,” gam gorot are tongge tinglo nal.

5 Par! Apolos e ta sa? Ma Pol e ta sa? Kemem buk su ta tongge na mus ke Deo, kemem sesngeni e asow, a gam kam titinge lo. Tikii neng tikii neng lo kemem e gow e faim Taufi e tow tifi una musngeni. 6 Ya sam so e ang kutan au, Apolos ka gugua, sakle Deo e gow ka faf. 7 E tek ti mok ilo se a ka umume ma se a ka gugua, Deo e ta mok bakir, anwarow, i e gowgow e fan mok ka fafaf. 8 E tek ti fasese i falifu lo neng a ka umume ma neng a ka gugua; Deo eu tow e fiimfiil ke tikii neng tikii neng ususi e mus i e gow. 9 Le kama tiin ta ung kaltu na faim ke Deo. Ma gam ka ta palang ke Deo, ma ming, gam ta fel ke Deo.

10 Ususi e finafen Deo e sam tow tif yau, ya sau fangongeufu e warow e fel are kaltu parfat una fefeti fam fel. Ma neng e kaltu ka feti e fel ilo poktow. Sakle tikii neng tikii neng e samusu ate ini, are i eu feti e fel. 11 Le e tek tikas e fasi una fangongeufu e ti warow e ti fel are neng gii Deo kabuk fangongeufu. Warow e fel, i gii Yesus Kristus. 12 Le tikas ku feti e ti fel ilo poktow e warow e fel a ine gol, silwa, fatfat a mata ka kanek tikin, tam fang kalut, fang garas ma fang got, 13 faim kia eu puek malal ini e ta sese matam faim, anwarow Biing na anganggon eu touf malal ini, ma iif eu sesuupuek ming ini. Iif eu tofo e kausi lo faim ke tikii neng tikii neng. 14 Le sa a i kabuk bilseni, iif e tibi bero ini, kaltu a eu kepe e fimfiil kia. 15 Sakle le iif ku bero ine faim kia, i eu tibi kepe e fimfiil kia. I eu liu, sakle i eu su ngo are kaltu e finfin ififit ine karkarfian iif.

16 Gam sau parfat ini gam tibom, gam ta felun nining ke Deo ma Tangwa Riis ke Deo e melmel ilo balbalmi. 17 Le tikas ku bero ine felun nining ke Deo, Deo eu bero ini, anwarow felun nining ke Deo e pepe ma gam, gam ta felun nining a.

18 Mana toufu e sinsinangumi ku sorom i gam tibom. Le tikas lo gam ku sangfi ini i e atausimale aregii nal gii ka parparfailiim re tongge ini ri atausimale, i e samusu puek ku ta kaltu talos usi ini i eu fasi una puek ku atausimale. 19 Le Deo e pari ini atausimale tinglo nal gii, e ta antalos. Aregii sunwar pepe ka peteng, “Deo e falfaliilnge re tongge tikin lo fan atausimale lo ri tibom,” 20 ma neng e su ming e ngo aregii, “Taufi e parfat ini fan sangsang kere tongge atausimale e su ta fan sangsang fofoes.” 21 Ilea, gam u manau una akte gam tibom ini gam usi e sese kaltu. Le mara mok gii eu ta kemi, 22 eu ta Pol, tam Apolos, tam Pita, tam nal gii, tam ninliu, tam minet, tam biing geinggii, tam biing a kamu puek, ri nano ri ta kemi, 23 ma gam ta ke Kristus ma Kristus e ta ke Deo.

<- 1 Korin 21 Korin 4 ->