RÔMA 15

Hatroq ti dabau

1 Qmang aih bèn mangai ma tadêh, ep wiang pòq blòh kan trap ka mangai ma ùh i đeh ka padren, apaq broq waq ka lem toq ka manoh deh cla. 2 Rìm ngai bèn ep broq lem manoh ka mangai haten hatìa bèn, đoèq i loèq ka wì hu broq dua lem ka wì. 3 Majah qmang aih, yac ka Christ hadai ùh broq lem toq manoh dèh cla, qmang ka bàu khoe achìh: “Bàu ƀài mangai capoch qmèq khoe ta ùc enh qnhèq ta chac au”. 4 Majah qmang aih, rìm yiniq enh nèh khoe achìh hlài đòeq hnài bèn, dôq enh kan loq àt xam kan alòng da Hset Hadròeh hnài, bèn jah i kan tangèh. 5 Waiq Boc Plình aih xèm da kan loq àt xam kan alòng am ka oh daq jah mòeq manoh oe ti dabau qmang ka Chuaq Jesus Christ. 6 Đòeq ka oh daq jah mòeq manoh mòeq bàu ti dabau hu manè apôi Boc Plình, aih Baq da Chuaq Jesus Christ bèn.

7 Qmang aih, oh daq drah đìh dabau, qmang ka Christ khoe đìh EsIs 45:23

oh daq, dôq Boc Plình jah kan ranhòm. 8 Majah qmang aih au anoe ka oh daq, Chuaq Jesus Christ khoe broq mangai patìh tanòe ƀài mangai kat akia, đòeq hu patô qnoh Boc Plình ùh gôpla, rai broq ka cajap bàu ma khoe tèu am ka kan cadraq bèn; 9 qnah hòm dôq mangai diac wì jah manè apôi Boc Plình taiq kan loq waq haq, tìah ka bàu ma khoe achìh:

“Aih raq, au majah manè apôi Boc Plình taqne mangai diac wì,

Calêu padèch yiniq haq”.

10 Èh i achìh hòm:

“Dìq ka mangai diac wì, lem bùi ti mangai da Chuaq beq.

11 Èh hòm:

“Dìq ka mangai diac wì,

Drah manè apôi Chuaq, rìm ngai khòh manè haq”.

12 Êsai hanoh doe:

“Enh rangàu riah da Jêse, jah plôh loh hamenh

Moèq ngai ma hu yòng wèq dìq ka mangai diac wì,

Mangai diac wì jah tangèh đeh ta haq aih”.

13 Waiq Boc Plình da kan tangèh, broq ka oh daq jah lem bùi rìm trong xam rìm kan catèm ta kan lùi, đòeq ka oh daq canòm ka cwìang itai da Yiang Hadròeh jah bình bauq kan canòm.

14 Dìq dŏng oh daq da au, au lùi oh daq i bình kan loq hanò, bình kan rabiaq, èh loq hnài dabau. 15 Joq au khoe yŏc dìq dèh ka manoh ùh hòq ka achìh jàiq đòeq anoe ka oh daq trong kô trong tau, aih đòeq broq ka oh daq hmàng, kan tabàih Boc Plình khoe am ka au 16 jah wìa mangai patìh da Chuaq Jesus Christ am ka mangai diac wì, broq pajàu Bàu lem da Boc Plình, đòeq mangai diac wì jah wìa ramènh lem ka manoh Boc Plình, jah kan hruah enh Yiang Hadròeh.

17 Aih èh enh da lam ka Jesus au i nen hu catèh rađeh ti ajang nòe au ma khoe patìh ka Boc Plình. 18 Majah qmang aih, au ùh hùa capoch cleq yeo loe ka ƀài trong Christ ma khoe thê au broq dôq mangai diac wì jah iu tiaq haq, enh bàu capoch trùh yiniq broq, 19 enh noè cwìang itai xam kan halac, tiaq kan itai enh Yiang Hadròeh da Boc Plình, patep enh Jêrusalem xam ƀài gùng dudan aih trùh hloe tagùng I-lyri, au aràng Bàu lem da Christ lam jàp jìa. 20 Manoh da au toq enh anoe trong Bàu lem tanòe leq yiniq Chuaq Jesus Christ qnhòq lah i cabô ràu trùh, dôq au ùh hìaq broq hnim enh qnhèq ka xàn hnim wì qnoeq, 21 qmang ka bàu khoe achìh:

“Ƀài mangai qnhòq lah hìa trùh haq, aih jah hnoq haq,

Ƀài mangai qnhòq lah tàng anoe trùh haq, aih jah loq ka haq”.

22 Kô ìq raq kan khech tàt, broq ka au khoe bàc yàng ùh jah trùh hmàih ka oh daq. 23 Mahaq manòeq kô pi oe i cleq tàt padràng au oe ta ƀài gùng kô, qnah hòm khoe toq leq hanam, au toq ngèh ka jah trùh ti oh daq; 24 qmang aih tàng au jah lam tagùng Ypha-nho, au diq enh troq trong hu hmàih hloe ka oh daq, khoe ka jah oe lem bùi ti oh daq au hadai enh canòm ka oh daq qnung au lam.

25 Hnoq anoe qmang aih, manòeq kô au qnang ti trong trùh ta Jêrusalem đòeq hu patìh ka ƀài mangai hadròeh ta aih. 26 Majah qmang aih mangai ta Maxêđoan xam mangai tagùng Achai khoe lem bùi ta manoh wiang tagop bac jèn hu tabàih ka ƀa mangai hadròeh da Chuaq ta Jêrusalem ma qnang hamoq. 27 Wì lem manoh broq qmang aih, majoq qnàng wì pòq dòeh mangai Juđa, tàng joq mangai diac wì khoe jah wiang pajùm xôq ramot ti mangai Juđa, aih wì haq ep yŏc dèh kùng hang qnhòng kô đòeq hu wiang am ka mangai Juđa. 28 Qmang aih, gòm jò au broq gêh ka bìac kô, jò au loq ka joq qnàng wì khoe jah ƀài dahwèq aih, au hi lam hmàih ka oh daq, èh au hi lam ta Ypha-nho. 29 Jò au trùh ti oh daq, au aràng bình halùih xôq ramot da Christ ka oh daq.

30 Qmang aih, canòm ka Chuaq Jesus Christ da bèn xam kan loq waq loh enh Yiang Hadròeh, au enh oh daq wiang pajùm ti au trong bàu waiq khàn am ka au enh ngèa Boc Plình. 31 Dôq au jah claih enh ti kŏng ƀài mangai ùh lùi tagùng Juđê, đòeq bài dahwèq au ma wê aràng kô wì oh daq hadròeh ta Jêrusalem jah dì yŏc. 32 Aih èh, au hi jah lem bùi đòeq hu trùh ta oh daq, canòm tiaq manoh Boc Plình enh, èh dìq ka bèn hadai jah padài ti dabau. 33 Waiq Boc Plình kan catèm oe ti oh daq! Amen.

<- RÔMA 14 RÔMA 16 ->