1 Qmang aih, au yŏc kan loq waq da Boc Plình, pariaq dìq ka pì oh daq dèch qmòe chac cla pì đòeq broq ramènh rìh, hadròeh lem ka manoh Boc Plình, aih raq kan kùh waiq ma troq da oh daq. 2 Apaq top dua qnhòng kô, mahaq wìh wìa tiaq manoh oh daq ma khoe jah paneo, đòeq hujah qnhro loq trong lem manoh xam kan geo gùa da Boc Plình aih qmang leq cadèh.

3 Qmang aih, tiaq kan tabàih dech ma khoe am ka au, au anoe ka tang ngai oh daq apaq hèm rađeh kô haqnhèq hrìn, mahaq ep i manoh hèm bu qnang lem tiaq maneh kan lùi Boc Plình ma khoe am ka tang ngai. 4 Majah qmang aih, tìah ka mòeq toq chac raq mahaq ta aih i bàc yiniq, ƀài yiniq aih i deh hra trong abroq crài ka dabau; 5 hadai qmang aih, enh dalam ka Christ bèn kô bàc ngai mahaq khoe loh mòeq chac, ƀài bèn kô aih hamenh da dabau. 6 Majah qmang aih bèn i ƀài kan tabàih crài ka dabau, tiaq kan tabàih dech khoe am ka tang ngai, mangai leq jah am tapoch pajàu, aih asràm tapoch hatiaq dèh manoh lùi; 7 cabô jah creo hu broq mangai patìh, aih ep kàt racop rađeh ti bìac patìh, cabô broq mangai hnài, aih ep hnài; 8 cabô broq mangai pariaq, aih pariaq, cabô broq mangai ti tabàih am, aih tabòeh am majoq qnàng haq, cabô broq mangai qnung ngoe, panim haq đòeq hu qnung ngoe, cabô broq mangai loq ha-och, drah lem bùi ka broq.

9 Kan loq waq ep ma joq qnàng haq. Ep git ka trong dù bêh trong lem. 10 Drah yŏc kan loq waq laq alàng đòeq ha-och ka dabau tìah ka oh daq, ngan wì qnoeq ùh hnau ka cla rađeh. 11 Drah panim apaq aroh, ep i manoh loq nhet: ep patìh ka Chuaq. 12 Drah loq bùi ta kan tangèh, loq àt ta kan nanxa, cajap manoh đòeq hu waiq khàn. 13 Drah lah axong dahwèq am ka mangai da Boc Plình jò wì haq i đeh yiniq nhet ka waq, dìq ka manoh loq đìh tamoe; 14 waiq am xôq ramot ka mangai rùp oh daq, waiq am xôq ramot ùh dùh hanip. 15 Wiang lem bùi ti mangai lem bùi, crò ti mangai crò. 16 Oh daq ep acaq oe ma hatroq ti dabau, apaq enh toq ka rahù rahòm, mahaq loq haqmuan rađeh. Apaq doe đeh rabiaq.

17 Apaq yŏc kan dù đòeq hu patem chau ka cabô, mahaq enh ngèa rìm ngai, ep hèm ngan trong leq malem. 18 Tàng jah, yŏc dìq dèh ka padren hiwa đòeq àu hatroq ka rìm ngai. 19 Yôi yôiq oh daq da au, cla pì apaq patem chau ka cabô, mahaq dôq daiq ka kan nòeh da Boc Plình, majah qmang aih i bàu khoe achìh: “Kan patem chau aih oe ta au, i au tabroq chau.” 20 Qmang aih tàng joq mangai tagit ka pì haq hrah, qmi haq acaq, tàng joq haq croh ranŏng, drah am haq ôq, broq qmang aih tìah ka pì tah ngia ùnh tagàu wì”. 21 Apaq dôq trong dù blêq pì, mahaq dôq trong lem blêq trong dù.

<- RÔMA 11RÔMA 13 ->