1 Yeo loe ka aih hòm, oh daq drah lem bùi enh dalam ka Chuaq, au ùh i cleq ma ep hòq jò achìh tam ƀài yiniq kô ka pì oh daq, majah qmang aih đòeq wèq dôq pì jah catèm.

2 Ep ngan loq i ƀài koq, ep ngan loq i ƀài mangai patìh ngang dù, ep ngan ramènh kat akia patìah. 3 Majah qmang aih, bèn kô mangai broq ramènh kat akia joq qnàng, aih taiq bèn canòm ka Yiang Haròeh da Boc Plình đòeq hu patìh ka Boc Plình, catèh dađeh toq enh dalam ka Chuaq Jesus Christ, qnhòq lah hmaq canòm ka xech akia jò leq.

4 Qmang aih, ùh xài au ùh i ka nòe hu catèh rađeh ta xech akia kô. Tàng joq mangai qnoeq xoh radeh kô i nen hu catèh tiaq xech akia kô, au kiang ma yiloe ka aih! 5 Ha-uang bu rahem hì au khoe broq ramènh kat akia, au kô mangai Isorali, nang noe da Bênjamin, mangai Hêbru, kon da mangai Hêbru, tiaq ranenh, au mòeq bua ka mangai Pharisi; 6 tiaq kan panim nhet, au kô mangai ti rùp Tagop Hadròeh, tiaq trong ranenh au kô taq atoq ùh i ka nòe cwò. 7 Mahaq, taiq Christ au ngan trong i lòeq aih, budàng kan qngwan diq. 8 Au hadai ngan rìm yiniq, budiang kan qngwan, majah qmang aih, jah loq ka Chuaq Jesus Christ aih ùh hnau dŏng ka yiniq qnoeq, Haq aih Chuaq au, au hadai pi adênh rìm trong ma i lòeq aih, đòeq hu tiaq haq. Joq, au hnoq ƀài yiniq aih budàng ƀài aròm, đòeq au jah Chuaq Jesus Christ 9 hujah oe enh dalam ka haq, jah qmang aih ùh xài canòm kan taq atoq cla au jah enh ranenh, mahaq taiq au lùi Chuaq Jesus Christ, aih kan taq atoq enh Boc Plình khoe jah paqnàng enh qnhèq ka manoh lùi; 10 dôq au jah loq ka haq, loq cwìang itai kan rìh hlài da haq, jah pajùm kan xalep ti haq, broq ka au jah tìah ka haq ta kan cachìt haq, 11 au ngèh rađeh jah rìh hlài enh mangai cachìt.

12 Anoe aih ùh xài au khoe jah ƀài yiniq kô, hanoh ùh xài au khoe trùh ta kan gêh geo, mahaq au qnang cadàu waq ka jah ƀài yiniq aih, majah qmang aih, cla au kô khoe jah Chuaq Jesus Christ dùng yŏc. 13 Au anoe ka pì oh daq, cla au kô, au ùh hèm đeh khoe jah clech trùh nòe, 14 mahaq dua au broq deh mòeq trong raq: hèt đac dŏng ƀài yiniq enh rù, đòeq cadàu tiaq yiniq enh ngèa, dôq hujah yŏc kan baha enh Boc Plình oe ta plình khoe creo ka au enh dalam ka Chuaq Jesus Christ. 15 Qmang aih, dìq ka bèn mangai ma khoe kàn gêh, ep i manoh aih, tàng joq oh daq hèm trong qnoeq, dua Boc Plình yŏc trong kô raq đòeq sreo qngah ka oh daq. 16 Toq rameh raq: bèn khoe jah pang maneh leq, bèn hadai ep lam qmang aih.

17 Manòeq kô pì oh daq, drah top dua au rai ngan ƀài mangai rìh acaq tiaq dua oh daq ma hnoq taqne nhèn. 18 Majah qmang aih, au khoe anoe yôt ka oh daq, manòeq kô au rai hmoe rai anoe hòm: bàc ngai rìh tìah qmòe ka mangai tagit ka long pagat da Christ. 19 Atìq pulùch da wì haq aih cachìt hnhung, wì yŏc dèh cliac broq bùa cla wì haq, yŏc deh kan camaih broq kan rahù, hèm toq trong ta crŏng taneh kô. 20 Mahaq bèn kô mangai da diac plình, enh aih bèn ma tangèh gòm dèh Mangai dèch bèn aih Chuaq Jesus Christ, 21 Haq broq ka chac mac ùh nèn da bèn wìh wìa tìah ka chac mac ranhòm da haq, wop tiaq cwìang itai da haq khoe i đòeq broq rìm yiniq ep iu tiaq.

<- PHILIP 2PHILIP 4 ->