HSET PHILIP

3 Jò hmàng trùh oh daq, au hi manè apôi Boc Plình au, 4 èh rìm yàng leq waiq khàn ka oh daq, au toq waiq khàn xi manoh lem bùi, 5 majah qmang ai enh baxèm trùh manòeq, oh daq khoe jah pajùm ta kan yòng kàn da Bàu lem enh aih trùh manòeq; 6 au loq qmòe rameh: Mangai ma khoe broq yiniq lem enh dalam oh daq, aih èh haq broq waq ka gêh trùh ta hì da Chuaq Jesus Christ.

7 Au hèm trùh dìq dŏng oh daq, qmang aih troq, majah qmang aih oh daq oe ta manoh cliac au, yac ka oe taqne caxi datoeq wì ma kàt au, yac ka jò au capoch cwaih rađeh rai anoe Bàu lem, aih oh daq hadai i pajùm ta kan tabàih dech Boc Plình ma am ka au. 8 Boc Plình wiang panhìn au yŏc manoh loq waq da Chuaq Jesus Christ đoèq hu loq waq ka oh daq. 9 Qnah hòm, bìac au creo dang jò waiq khàn, aih broq qmang leq manoh loq waq da oh daq rai èh rai bàc oe enh dalam kan rabiaq xam kan hèm loq, 10 đòeq hu loq hadro ngan trong leq ma yeo lem, đòeq oh daq jah hliang hreo pi i qmòe ka nòe leq hu cwò ta hì da Christ, 11 jah bình bauq plì taq atoq loh enh Chuaq Jesus Christ, đoèq hu broq qngah rai manè apôi Boc Plình.

12 Manòeq kô, au enh pì oh daq loq, bìac au qnang glàm manòeq kô khoe wiang broq ka Bàu lem jah chàc yi hangai. 13 Jaq dìq dŏng ƀài lình ma wèq ta hnim hadrah xam wì qnoeq dìq jah loq au tiaq Christ dài wì ma jah yŏc caxi datoeq kàt au qmang kô. 14 Bàc ngai ta oh daq hnoq jò au qnang oe qne caxi datoeq qmang kô, kiang wì haq i tam manoh lùi yeo bàc hòm enh dalam ka Christ, hùa lam anoe trong da Boc Plình ùh lòm yùq qmòe cleq.

15 Joq, i qnah ngai taiq manoh tajênh tagrìn dài wì haq majah lam anoe hnài mangai qnoeq loq ka Christ, mahaq hadai i mangai yŏc manoh lem đòeq hu lam anoe. 16 Ƀài mangai ma atìq kô broq xam manoh loq waq, wì loq Boc Plình khoe dì au đòeq hu wiang paqnhrang Bàu lem. 17 Da ƀài wì ma adroe tau, taiq kan plai, kan amùc toq ka rađeh, ùh dìq ka manoh, xoh dèh canau tam ka au kan xalep. 18 Mahaq ùh troq cleq! Yac ka qmang leq, yac ka patìah, yac ka joq qnàng, yiniq da Christ dua khoe jah lam anoe, aih ìq dài manòeq kô au qnang lem bùi, khoe aih oe raq lem bùi hòm. 19 Majah qmang aih au loq, canòm ka oh daq waiq khàn xam canòm ka Yiang Hadròeh da Chuaq Jesus Christ wiang ti au, bìac aih èh broq ka au rênh jah caqnaih. 20 Au cajap manoh lùi qmang aih, yac ka trong leq dua au ùh i camaih cleq, mahaq jò leq tìah ka jò leq, rìm trong au ùh i crè cleq ka anoe, qmang aih, yac ka au rìh yac ka au cachìt, dua Christ jah qngah ta chac au. 21 Majah qmang aih, Christ aih kan rìh da au, cachìt aih kiang yeo troq ka au.

22 Patìah haq, au oe rìh yôt ta chac kô, aih i lòeq tam ka yiniq au broq, dài au ùh qnì ràih trong leq. 23 Au rahnhua taqne, enh lam oe ti Christ, aih ma yeo troq, 24 mahaq au oe raq ta chac kô aih nhet ka pì. 25 Au lùi qmang aih, au loq rađeh kô èh oe raq ti pì oh daq, đoèq wiang broq ka oh daq jah lem bùi, jah kàn tam manoh lùi; 26 dôq jò leq au trùh hòm ti pì oh daq, pì oh daq jah yŏc au hu broq nen đòeq jah catèh rađeh yôt enh dalam ka Chuaq Jesus Christ.

27 Toq rameh raq, oh daq ep acaq oe ma tajì ka Bàu lem da Christ, đòeq yac ka jò au trùh hmàih ka oh daq, yac ka jò au arù, dua au jah loq oh daq moèq manoh yòng cajap ti dabau, moèq manoh đòeq hadai wiang paqnhrang manoh lùi da Bàu lem, yac ka trong leq dua apaq đòeq ka mangai ma tablêq ka oh daq taqnhùq rađeh: 28 Aih raq nòe hu patô wì aih èh hnhung lùch, mahaq oh daq jah dèch, ƀài yiniq aih trùh enh Boc Plình, 29 enh dalam ka Christ, Boc Plình am ka oh daq xôq ramot, ùh xài đòeq toq hu lùi haq hi dìq mahaq đòeq oh daq wiang chìuq xalep ti haq, 30 aih èh pì oh daq hadai ep wiang chìuq kan tabroq tablêq qmang ka pì ma qnang hnoq, qnang hìa ajang au manoèq.

PHILIP 2 ->