MATHIƠ 4

Satan aluàn Chuaq Jesus

1 Khoe aih, Yiang Hadròeh qnung Chuaq Jesus mùt tanòe gùng hawit, dôq kan kiac padô qnùt Haq. 2 Chuaq Jesus apàm ka acaq pôn jàt hì, pôn jàt mang, khoe aih haq loh qmòe ka hrah. 3 Kan kiac trùh ajang Chuaq, haq doe: Tàng joq ìh kô kon Boc Plình, thê hmo kô wìa ƀênh beq. 4 Chuaq Jesus doe: “Khoe i bàu achìh rameh: Mangai rìh ùh xài canòm toq ka ƀênh, mahaq canòm rìm nà loh enh bàu Boc Plình”.

5 Kan kiac qmùt Chuaq Jesus tanòe plài hadròeh, atŏc Haq nòe poc hnim kùh waiq, 6 rai doe: Tàng joq ìh kon Boc plình, caqnìh rađeh beq, ajoq khoe i bàu achìh rameh:

“Chuaq thê ƀài ƀình plình wèq ìh:

Wì aih hi dèch ìh ta xŏng,

Aih èh jènh ìh ùh i catoeh ka hmo”.

7 Chuaq Jesus doe: “Hadai i bàu achìh rameh: Ìh ùh khòh ti qnhro ngan Chuaq aih Boc Plình ìh.”

8 Kan kiac atŏc Haq ta wang haqnhèq hòm, patô ka Haq ƀài diac oe crŏng taneh xam kan rahù ranhòm ƀài diac aih, 9 haq anoe: Tàng joq ìh kùn cràng kùh waiq enh ngèa au, ƀài diac qmat au am dŏng ka ìh. 10 Chuaq Jesus tapoch ka haq: “Satan wia ma khoe ka au beq, majah qmang aih i bàu khoe achìh: Ìh ep kùh waiq Chuaq aih Boc Plình ìh, rai patìh toq ka haq raq. 11 Khoe aih Kan kiac hi lam, i ƀình plình trùh haten patìh ka Chuaq Jesus.

12 Jò Chuaq Jesus tàng doe wì khoe rùp clêh Jon, haq wìh hlài ta gùng Galili, 13 Haq ùh oe ta Naxaret, mahaq lam oe ta Cabênaum, haten diac raxìq, hatìa ka gùng Sabulôn, gùng Neptali. 14 Dôq xìt troeq bàu pajàu Êsai ma khoe doe:

15 “Taneh Sabulôn xam Neptali,

Oe ti trong loh ta diac raxìq, pah tau cròng diac Jođan,

Aih gùng Galili mahaq ùh xài mangai Juda…,

16 Wì aih hangui tanòe clam cluiq,

Khoe jah hnoq kan qngah kàn;

Xam ƀài mangai ma hangui enh caqnàm qmù kan cachìt,

Kan qngah kàn khoe tŏc ka wì aih.”

17 Pang aih, Chuaq Jesus hi lam hnài: “Loq raxach beq, diac Plình trùh khoe haten.”

18 Jò Haq qnang lam roc haqmai diac raxìq Galili, hnoq wa baiq ngai oh daq, Simôn (ma loq creo Phiero) xam oh haq Anrê, qnang tang hlàm ta diac raxìq, majah qmang aih wa aih dìq mangai ranang ka. 19 Haq doe ka wa: “Lam tiaq Au beq, au hu thê chôp lam tang hlàm mangai.” 20 Tajòe qmòe wa oh daq cađac hlàm, lam tiaq Jesus. 21 Lam yeo hangai ka aih, Jesus hnoq baiq ngai wa oh daq maqnoeq hòm, Jaco kon Sêbêđê xam oh haq aih Jon, qnang hmình hlàm taboang ti Sêbêđê baq wa haq, Chuaq hi creo ka wa. 22 Tajòe qmòe wa haq hi đòeq boang xam dèh baq wa haq, hu lam tiaq Chuaq.

23 Chuaq Jesus lam jàp gùng Galili, hnài roc hnim tagop, anoe bàu lem diac Boc Plình, rai broq brêh ka mangai yinìq ta gùng aih. 24 Qmang aih, yiniq haq wì hìa jàp jìa gùng Syri, wì aràng ka haq ƀài mangai ùh hrŏc, mangai yinìq, mangai kiac pawè, ranhùa, mangai pen. Haq broq brêh dìq dŏng ka wì aih. 25 Èh hòm, patep enh gùng Galili, Đêcabôlo, gùng Jêrusalem, enh gùng Juđê, trùh hloe pah tau cròng diac Jôđan, wì ti adràc dabau bàc haraya lam tiaq Jesus.

<- MATHIƠ 3 MATHIƠ 5 ->