1 Jò aih èh diac plình tìah ka moeq jàt ngai adrùh sriu, wê đen lam đìh cla kon ŏng. 2 Ta aih i padam ngai blùng, padam ngai rabiaq. 3 Da ƀài mangai blùng wê toq đen mahaq ùh waq wê dàu. 4 Da ƀài mangai rabiaq, wê đen rai wê dàu ta cabi. 5 Yàng kon ŏng xòe trùh, wì haq loh dŏng ka gù kùi pi hmàng. 6 Trùh qne mang i bàu creo: Kô cla kon ŏng! Loh đìh haq beq. 7 Khoe aih dìq dŏng ƀài guadrùh cadrat enh kùi rai palauq dèh đen. 8 Ƀài mangai blùng doe ka mangai rabiaq: lah ka nhèn dàu pì daq toq biaq diq, đen nhèn khoe ten pat. 9 Ùh! wì aih padreo bàu, aih èh ma oe tàu ka nhèn xam ka pì. Xan pì cadàu lam tanòe wì ma atech, hu rot ònh dàu ka cla pì, ma aih ùh hnau hòm. 10 Mahaq jò wì haq qnang lam rot dàu, cla kon ŏng khoe trùh. Ƀài mangai guadrùh ma khoe gòm qmòe jang aih, jah mùt ti haq tanòe acaq yiniang, èh wì hi clenh qmang. 11 Khoe ka aih dùnh wì tau hi trùh diq, wì haq creo: Wì craq, wì craq, pèh ka nhèn qmang diq. 12 Mahaq haq padreo bàu: “Au doe jang ka pì, au ùh qnì ka pì.” 13 Aih èh pì ep hamang đòeq, majah qmang aih pì ùh loq ka hì, hadai ùh qnì ka jò.

14 Qmang kô hòm, diac plình tìah ka mangai padon lam hangai, haq creo dèh ƀài hapŏng trùh hu jao dèh kùng hang ka wì aih. 15 Mangai kô haq am padam talàng, mangai tau haq am baiq talàng, mangai qnoeq hòm haq am moeq talàng, tiaq cabô leq hlàt dèh pang leq. Khoe aih haq hi lam. 16 Mangai ma khoe jah padam talàng, drah lam abroq jah tam padam talàng. 17 Hadai qmang aih, mangai ma jah baiq talàng abroq jah tam baiq talàng hòm. 18 Mahaq da mangai ma jah moeq talàng aih loh lam, chìa moeq toq trom jrùq ta taneh hu catùh đòeq hang wì craq.

19 Atìq ka aih joq dùnh cla craq wì aih wìh hlài creo ka wì haq trùh đòeq hangui hatình trong bac jènh. 20 Mangai ma khoe jah padam talàng hi trùh, haq wê tam padam talàng qnoeq hòm rai doe: Wì craq, ìh khoe am ka au padam talàng, hacô au khoe broq jah tam padam talàng qnoeq hòm. 21 Cla wì craq doe ka haq: Wìa! Mangai hapŏng jang lem dìq ka manoh, ìh khoe ùh tablòq manoh ka au enh trong qyoh, au dèch ìh broq mangai wèq yeo bàc hòm. Trùh ta kô đòeq beq jah lem bùi ti cla craq ìh. 22 Mangai ma khoe jah baiq talàng hanoh trùh. Haq doe: Wì craq ìh khoe am ka au baiq talàng, ngan kô au khoe jah tam baiq talàng hòm. 23 Cla wì craq padreo bàu ka haq: Wìa! mangai hapŏng jang lem ùh talòq manoh, ìh khoe dìq manoh ka au enh trong qyoh, au dèch ìh broq mangai wèq yeo bàc hòm. Trùh ta kô đòeq jah lem bùi ti cla craq ìh. 24 Khoe aih mangai ma khoe jah moeq talàng trùh diq, haq doe: Wì craq, au loq ìh kô mangai ùh jah blià, gat tanòe ìh ùh rai, tagop toch nòe ìh ùh caqnìh; 25 aih ìq dài au yùq crè majah lam cadŏc ka hlèp talàng ìh ta taneh. Ngan hacô hang ìh oe raq da ìh. 26 Cla craq haq padreo bàu “Ìh qmat, mangai hapŏng ùh wìa waq rai aroh! Ìh khoe loq au gat tanòe au ùh rai, tagop toch tanòe au ùh i caqnìh? 27 loq qmang aih, xài ìh yŏc hang qmat aràng tanòe wì padro bac, qmang aih jò au wìh hlài xài au jah yŏc hlài xam xèm xam goe haq. 28 Hêq, yŏc hlài talàng enh haq qmat am ka mangai ma khoe jah moeq jàt talàng tau. 29 Majah qmang aih, am tam ka mangai leq ma khoe i, dôq haq jah bình bauq tàu tìa hloe. Mangai ma ùh i, qnhac ka haq i toq xit cleq dua doeh yŏc hlài yiniq haq ma khoe jah. 30 Khoe aih mangai hapŏng ma ùh wìa waq aih khwênh qnìh đac hloe tanòe clam cluiq, nòe i toq kan crò hmoe rai cadrit hanenh.”

Bubi wa trìu

31 Jò Kon Mangai ma hi trùh enh plình, taqne kan ranhòm cla haq xam dìq ka ƀài ƀình plình lam tiaq haq, jò aih haq hangui dèh tagèq ranhòm cla. 32 Dìq dŏng ka mangai tagop dìq enh ngèa ka haq, èh haq hi lah mangai kô loh khoe ka mangai tau tìah ka mangai ban trìu lah trìu loh khoe ka bubi. 33 Haq đòeq trìu oe pah qma, èh bubi haq đòeq pah qngeo rađeh.

34 Khoe ka aih Bùa hi doe ka mangai oe enh pah qma haq: “Trùh tacô, pì mangai ma khoe jah Baq au am xôq ramot, đòeq hu yŏc diac plình khoe padon đòeq ka pì enh jò baxèm broq plình crŏng taneh. 35 Majah qmang aih, jò au pangot pì khoe am ka au acaq, au croh ranŏng, pì khoe am ka au ôq, Au mangai tamoe ùh canau, pì khoe đìh au mùt dìh ta hnem. 36 Au chac dech, pì khoe taqmàn au, au ùh hrŏc yinìq, pì wèq au, wì clêh au pì trùh hmàih ka au. 37 Jò aih ƀài mangai taq atoq hi padreo bàu ka haq: Chuaq nhèn, nhèn lah hnoq ìh pangot jò leq ma am ìh acaq? Nhèn lah hnoq ìh croh ranŏng jò leq ma i am ìh ôq diac? 38 Nhèn lah hnoq ìh broq tamoe jò leq ma hu đìh, ùh meh oe chac dech jò leq ma hu taqmàn. 39 Nhèn lah hnoq ìh ùh hrŏc jò leq, lah hnoq wì clêh ìh jò leq ma i lam hmàih ka ìh? 40 Bùa hi padreo bàu: “Joq qnàng, Au doe ka pì, yiniq cleq pì khoe broq am ka mangai leq ma yi hamoq dŏng oe taqne wì oh daq au, aih pì khoe broq ka au.”

41 Khoe aih, haq doe ka wì ma oe enh pah qngeo haq: “Wia ma khoe ka au, pì qmat ƀài mangai jìang ka ramòt, lam mùt tanòe ùnh ùh pat khoe palauq đòeq ka kiac dù xam bua da haq. 42 Majah qmang aih au pangot, pì ùh dùh ka am au acaq qmòe cleq, au croh ranŏng pì ùh dùh am qmòe ka au cleq hu ôq, 43 Au tamoe hangai, pì ùh đìh au mùt ta hnim pì, Au chac dech, pì ùh taqmàn au cleq, au rai ùh hrŏc rai oe ta hnim tù, pì ùh wiang wèq au.” 44 Dìq ka wì wiang padreo bàu: Chuaq nhèn, nhèn lah hnoq ìh pangot, croh ranŏng, ìh tamoe jò leq, ìh chac dech jò leq, yac ka ìh oe ta hnim tù jò leq ma ùh patìh ka ìh? 45 Bùa padreo bàu: “Joq qnàng au doe ka pì, yiniq cleq pì ma ùh broq am ka mòeq mangai ma yi hamoq dŏng oe taqne wì kô, aih pì ùh broq ka au.” 46 Khoe èh, wì aih mùt tanòe baxa mòeq đòe, mahaq ƀài mangai taq atoq mùt tanòe kan rìh halình mòeq đòe.

<- MATHIƠ 24MATHIƠ 26 ->