MATHIƠ 2

Ƀài ƀŏcsi, bùa Hêrôt, cadàu lam ta Êdip

1 Jò Chuaq Jesus khoe ha-uang ta Bêtlêhem, gùng Juđê, qnhòng aih Hêrôt broq bùa, ƀài ƀŏcsi oe gùng mahì loh, trùh ta Jêrusalem 2 bòch rameh: Bùa da mangai Juđa ma neo ha-uang oe taleq? Nhèn khoe hnoq halŏng Haq oe pah gùng mat mahì loh, kô ìq nhèn majah khoe trùh đòeq kùh waiq haq. 3 Tàng bàu aih bùa Hêrôt xam dìq mangai oe ta Jêrusalem dìq jaq crè hamàih 4 Bùa creo ka ƀài broq cla craq pajàu xam mangai hnài ranenh ta aih, haq bòch: Christ kô ìq ha-uang taleq? 5 Wì padreo bàu: Oe ta bêtlêhem gùng Juđê majah qmang aih khoe i bàu pajàu achìh rameh:

6 “Ìh, Bêtlêhem, gùng Juđê.

Joq qnàng ìh ùh i yeo hamoq ka ƀài plài ma kàn ta gùng Juđê,

Majah qmang aih, enh ìh kô èh loh mòeq ngai broq Cla craq.

Haq aih ma wèq ban Isorali, aih mangai da au.”

7 Bùa Hêrôt creo atùng ka ƀài ƀŏcsi, bòch panhìn halŏng khoe loh jò leq. 8 Khoe èh bùa thê wì aih lam ta Bêtlêhem, rai tanap: Pì drah lam beq, taƀoe chaq kon qyoh aih ma ro haq, jò pì khoe hnoq, patìn ka au loq diq, dôq au hadai trùh hu kùh waiq haq. 9 Khoe ka ƀàu bùa thê, wì loh lam. Hatau, halŏng wì haq ma khoe hnoq enh gùng mat mahì loh, lam adroe ka wì haq trùh nòe kon qyoh oe men waq yòng. 10 Wì aih hnoq halŏng, manè oe i jaq cleq. 11 Jò khoe mùt ta hnem, hnoq kon qyoh xam Mari miq haq, tajòe qmòe wì haq hacùn cràng ta haqneq đòeq kùh waiq. Khoe aih qnoh deh hang canaq dèch am ka haq: Wang, gahnàu, dàu xua thùm. 12 Khoe aih, jò apô Boc plình doe ka wì haq apaq wìh hlài dèh ta Hêrôt, wì aih hi tawìh trong qnoeq hu bròc dèh gùng. 13 Jò wì aih khoe lam, i moeq bình plình da Chuaq trùh ti Jôsep, jò haq apô, doe rameh: “Drah yòng beq, qnung kon qyoh qmat hloe xam miq haq lam amot ta diac Êdip, oe ta aih trùh jò leq au creo ka ìh, majah qmang aih kô èh bùa Hêrôt chaq jêh đac kon qyoh qmat. 14 Jôsep drah yòng, jò oe raq damang, qnung wa miq kon lam ta diac Êdip. 15 Haq oe ta gùng aih trùh jò Hêrôt cachìt, dôq xìt ka bàu Chuaq ma khoe thê dèh ƀài pajàu tapoch: “Au khoe creo dèh ka kon loh enh diac Êdip.”

16 Bùa Hêrôt hnoq ƀài ƀŏcsi khoe qnùt rađeh, haq nòeh pi ka jaq, haq thê jêh ka cachìt dŏng qyoh calô pang baiq hanam dang loh oe ta Bêtlêhem hloe xam dìq dŏng ka kon qyoh ta cròng aih. Tiaq troq hì troq khê ƀài ƀŏcsi ma khoe am haq loq. 17 Qmang aih, khoe xìt troeq bàu Jêrêmi pajàu Boc Plình ma khoe anoe:

18 “Wì tàng bàu breo, cajiah.

Ta-oeh, hmoe tagùng Rama

Aih bàu Rachen hmoe dèh ka wì kon

Mahaq ùh dôq cabô alòng rađeh, majah qmang aih wì haq khoe pi i.

19 Mahaq khoe ka bùa Hêrôt cachìt, i moeq bình plình Chuaq trùh ti Jôsep jò haq apô, jò oe ta diac Êdip, thê rameh: 20 “Drah yòng beq, qnung kon qyoh hloe xam miq haq hlài tagùng Isorali, majah qmang aih mangai ma chaq jêh đac kon qyoh qmat khoe cachìt.” 21 Jôsep drah yòng, qnung kon qyoh xam miq haq wìh hlài gùng Isorali. 22 Mahaq, jò tàng doe Achêla-u broq bùa thai dèh baq haq aih Hêrôt, qnang wèq gùng Juđê, Jôsep loh ka crè pi hùa hlài ta aih, qnah hòm Boc plình khoe anoe jò haq apô, haq hi mùt ta gùng Galili, 23 lam rìh oe ta plài Naxaret. Qmang aih khoe xìt troeq bàu ƀài pajàu Boc Plình ma khoe anoe adroe: “Wì creo ka Haq mangai Naxaret.”

<- MATHIƠ 1 MATHIƠ 3 ->