HÊBRU 7

Mênchixêđec

1 Mênchixêđec aih bùa da Salem, pajàu kàn da Boc Plình ma dìq jaq haqnhèq, khoe loh đìh Apraham rai waiq am xôq ramot jò haq tawìh hlài enh nòe haq tajêh khoe blêq ƀài bùa; 2 Apraham yŏc mòeq ta mòeq jàt phàn kùng hang rađeh đòeq dèch ka bùa. Mênchixêđec ngìah ma adroe aih la: bùa da kan taq atoq, ngìah atìq ka aih hòm bùa da Salem aih bùa da kan catèm; 3 haq ùh i ka baq ka miq, ùh i ka nang noe, ùh i ka hì baxèm ha-uang, ùh i ka hì cachìt, qmang ka Kon Boc Plình broq pajàu mòeq đòe. 4 Hèm beq, jaq cla Apraham aih kan cadraq bèn khoe yŏc mòeq ta mòeq jàt phàn ma dìq jaq lem taƀài dahwèq haq khoe jah blah yŏc đòeq dèch ka bùa, aih bùa aih haq haqnhèq dàng leq. 5 Tiaq ranenh ƀài xinoe Lêwi ma broq pajàu, i cwìang tigop yŏc mòeq ta mòeq jàt phàn enh mangai jàn, aih la enh hadròng cla majah qmang aih cla wì haq hadai loh enh Apraham. 6 Yac ka Mênchixêđec ùh xài xinoe da Lêwi, mahaq haq jah yŏc mòeq ta mòeq jàt phàn da Apraham rai waiq xôq ramot ka mangai ma jah waq bàu tèu am da Boc Plình. 7 Manòeq kô mangai ma yeo haqnhèq waiq xôq ramot ka mangai ma yeo haqneq, trong aih pi ep rahen dèh. 8 Loq ka ajang kô, ƀài mangai ma tigop yŏc mòeq ta mòeq jàt aih dìq ƀài mangai loq cachìt: yàng ajang tau hòm, aih mangai ma i bàu panhìn doe haq qnang rìh. 9 Qmang aih bèn jah doe qmang kô: Lêwi aih mangai tigop yŏc mòeq ta mòeq jàt phàn, cla haq hadai khoe dèch mòeq phàn mòeq jàt tiaq ajang Apraham; 10 majah qmang aih, jò Mênchixêđec loh đìh Apraham, jò aih Lêwi oe raq ta chac Apraham.

11 Tàng ma loq jah kan lem geo canòm ka mangai Lêwi broq pajàu (majah qmang aih Ranenh khoe jah am ka kon mangai jò wì haq oe raq enh qneq ka cwìang da pajàu), aih hagleq ma oe waq ka padèch ònh mòeq ngai pajàu qnoeq, tiaq apah da Mênchixêđec, ùh tiaq xinoe da Arôn? 12 Qmang aih, khoe halìh pajàu aih èh ranenh hadai ep waq ka halìh diq. 13 Mangai ƀài bàu aih ma anoe trùh, oe ta xinoe qnoeq, xinoe aih qnhòq hmaq i cabô patìh nòe prang tadreo. 14 Majah qmang aih, Chuaq da bèn loh enh xinoe Jiuđa, xinoe aih Môise ùh i ràu trùh trong broq pajàu. 15 Trong aih yeo ro hòm, jò bèn hnoq i mòeq ngai pajàu qnoeq jah dèch paqnàng, tìah ka Mênchixêđec, 16 dèch paqnàng ùh tiaq ranenh da kon mangai, mahaq tiaq cwìang itai da kan rìh halình ùh jò leq hnhung lùch. 17 Hacô bàu panhìn ka haq:

“Kon broq pajàu mòeq đòe.

Tiaq apah da Mênchixêđec”.

18 Qmang aih, ranenh ma adroe nèh ùh i ka cwìang ùh i ka lòeq cleq dài majah khoe cađac; 19 majah qmang aih, ranenh ùh broq gêh qmòe cleq, èh hòm i moèq kan canòm qnoeq, ma yeo lem aràng am ka bèn, kan canòm kô ma broq ka bèn jah haten ka Boc Plình. 20 Yeo hnau ka aih hòm i bàu hapah, wì ma qnoeq broq pajàu ùh i ka bàu hapah, 21 yàng haq khoe jah dèch paqnàng xi bàu hapah, jò Boc Plình doe ka haq:

“Chuaq khoe hapah, èh pi jò leq haq tablòq manoh,

Kon broq pajàu mòeq đòe”.

22 Qmang aih, Chuaq Jesus khoe wìa Mangai broq ka cajap bàu tajao maneo lem yeo hnau ka ma dùnh. 23 Èh hòm, ƀài mangai broq pajàu aih bàc, mahaq kan cachìt khech tàt dài wì haq ma ùh jah broq hloe. 24 Yàng Chuaq Jesus aih halình yôt, dài haq jah broq pajàu mòeq đòe. 25 Qmang aih, haq majah i cwìang dèch dìq dŏng ƀài mangai canòm ka haq đòeq hu thia ten ka Boc Plình, majah qmang aih haq rìh halình đòeq waiq khàn am ka wì aih.

26 Aih ma joq pajàu haqnhèq ma troq ka bèn, hadròeh, ùh i ka yiniq lui, hliang lem, lah đeh crài ka mangai i tuiq, jah dèch atŏc yeo haqnhèq ka trŏc: 27 ùh tìah ka ƀài pajàu haqnhèq ma qnoeq, ep dèch ramènh tadreo rìm hì, angoe aih ka yiniq lui da cla, atìq aih ka yiniq lui mangai qnoeq; Haq dèch ramènh mòeq yàng raq khoe gêh geo hloe, dèch chac cla haq broq ramènh tadreo. 28 Majah qmang aih, ranenh yŏc ƀài mangai ma ùh nèn dèh dùnh broq pajàu haqnhèq; mahaq bàu hapah ma i atìq ka hset ranenh aih dì cla Kon, aih Mangai ma gêh geo mòeq đòe.

<- HÊBRU 6 HÊBRU 8 ->