1 Yac ka qmang aih, enh nèh raq khoe i ƀài mangai pajàu patìah oe taqne oh daq, aih èh hadai i mangai hnài patìah oe taqne oh daq, wì haq hnài trong patìah đòeq ti habo, cađac Chuaq ma khoe baxon hlài rađeh, taqmac yŏc ka rađeh kan raliang ùh tem hnoq. 2 I bàc ngai top dua wì haq ta trong rìh acaq ma jìang ka camaih, jao ƀài aih dài wì majah halê patah đac trong joq qnàng. 3 Wì haq tiaq deh kan plai ta manoh, yŏc bàu pajìang đòeq aluàn oh daq đòeq hujah lòeq, mahaq kan tah hadrah gòm đòeq wì haq khoe dùnh, kan raliang da wì haq ùh i panoc.

4 Majah qmang aih, tàng joq Boc Plình khoe ùh adênh ka ƀài bình plình broq yiniq lui, mahaq khwênh caqnìh ƀài aih ta hwin jrùq, yŏc kaxi datoeq kàt đòeq ƀài aih tanòe clam cluiq đòeq gòm kan hadrah; 5 tàng joq Haq khoe ùh adênh ka crŏng taneh calah nèh. jò haq ma thê diac kàn trùh glua dŏng ƀài mangai ma ngang dù aih, rong đòeq toq No-ê aih mangai hnài trong taq atoq, xam tapèh ngai qnoeq hòm; 6 tàng joq Haq khoe hadrah gùng Sođôm xam gùng Gomôro, bùh đac gùng aih loh dŏng loc, đòeq broq dua ka mangai ngang dù taqnhòng atìq hu hnoq; 7 tàng joq Haq khoe paclaih Lot aih mangai taq atoq, mangai ma toq mangò đeh ka trong rìh acaq ùh lem da ƀài mangai ngang dù tau, 8 (majah mangai taq atoq kô rìh taqne wì aih, don tàng, mat hnoq kan ùh wìa da wì aih, manoh cliac taq atoq da haq jìq qmòe rìm hì), 9 qmang aih, Chuaq dèch mangai ma loq iu yùq ka haq claih enh kan padô qnùt, rai baxa ƀài mangai ùh taq atoq, clêh padràng wì aih đòeq gòm trùh hì tah hadrah, 10 ta aih kiang ƀài mangai ma iu tiaq deh manoh cla ònh toq kan ùh wìa, jù đac cwìang enh qnhèq.

Ƀài aih ùh yùq ka catèh rađeh, ùh hòq ka capoch qmèq ka wì craq, 11 yac ka ƀình plình aih ƀài yiang ma dêh padren i cwìang itai yeo hnau ka wì haq dua ùh hùa i mòeq nà bàu capoch brùaq jò hadrah ka wì craq enh ngèa ka Chuaq. 12 Ƀài aih toq ti jù halê đac trong đeh ma ùh qnì, wì haq budàng ngè wì ma ban ta hnim ùh i ka manoh loq hèm cleq, xêh loh đòeq toq hu rùp broq jam, wì aih hadai cachìt lùch qmang ka ƀài ngè aih diq, qmang aih wì haq jah baha tiaq dèh trong dù wì haq khoe broq. 13 Wì haq yŏc trong acaq ôq bùbia dahì broq kan hyòq bùi, wì haq aih ƀài habau qmèq ƀài kan amùa, enh toq ti amòng jò haqngui acaq yiniang ti oh daq; 14 mat da wì haq bình toq kan tango, wì haq ùh hêq ka broq yiniq lui, padô aluàn mangai ma ùh qnhrang manoh, wì haq hmòt toq trong daiq plai, ƀài aih troq toq ka ra-òh hamaiq đac raq. 15 Wì haq khoe cađac trong ma hnhuh jang đòeq lam hwang tiaq trong da Bala-am, kon calô da Bôso, aih mangai daiq ka kùng baha enh kan dù, mahaq, haq aih khoe ep tàng bàu cwò jò haq broq trong dù, 16 aih bàu loh enh hacùng kon lùa aih ngè làu jah capoch bàu mangai, đòeq tàt padràng kan ranhùa ratùt da pajàu aih.

17 Ƀài aih tìah ka thòng ùh i ka diac, tìah ka yùc glàm cayeo dêh hlui đac, èh kan clam cluiq khoe rap đòeq wì haq. 18 Wì haq yŏc toq bàu catèh pajìang dech raq, yŏc deh kan ònh da xech akia xam trong tango anang đòeq padô ƀài mangai maneo claih enh trong ùh troq aih. 19 wì haq tèu am kan paclaih, yàng cla wì haq aih broq dìc ka kan om ech, majah qmang aih i yiniq cleq ma khoe blêq kon mangai, aih èh kon mangai ep broq dìc ka yiniq aih. 20 Majah qmang aih, tàng wì haq khoe canòm ka Chuaq dèch bèn aih la Jesus Christ đòeq claih kan amùa da crŏng taneh kô, yàng tawìh hlài hu broq dìc ƀài trong aih hòm, hì atìq da wì haq aih èh yeo hamoq loe ka jò baxèm hòm. 21 Wì haq khoe loq ka trong taq atoq, yàng èh talùi đac ka bàu hadròeh ma khoe hnài rađeh, qmang aih ùh qnì dŏng aih yeo lem hòm. 22 Wì haq joq khoe wop qmang ka bàu alìah: Koq liah hlài dèh hac, chùa khoe dahùm èh catàm hlài ta tràp. ChCn 26:11

<- II PHIERƠ 1II PHIERƠ 3 ->