II CORINHTO 2

1 Aih ìq dài au ma khoe qnac ta manoh ùh wìh hlài ta oh daq, aih blinh ùh xài đòeq hu broq ka oh daq mangò; 2 majah qmang aih tàng au broq ka pì mangò aih èh broq qmang leq au ma oe tangèh jah kan lem bùi enh ƀài mangai au khoe broq ka wì haq mangò? 3 Au khoe achìh ka oh daq qmang aih đòeq jò au trùh, au ùh hìaq ep mangò ka pì oh daq aih ƀài mangai broq ka au jah lem bùi. Au lùi dìq dŏng ka oh daq, mangai leq mangai meh dìq yŏc kan bùi au đòeq broq kan lem bùi ka rađeh. 4 Aih, wop ta jò nanxa hlàc hlai, catech cliac clèm, diac mat da dahràc, au achìh ka oh daq, ùh xài dôq ka oh daq mangò, mahaq đòeq ka oh daq loq manoh da au ha-och ka oh daq dàng leq.

Mangai i lui jah caqnaih

5 Tàng i mangai leq broq kan mangò aih ùh xài haq broq toq ka au mangò, mahaq broq dìq ka oh daq mangò đeh hra yac ka bàc biaq, au ùh i enh tapoch hrìn broq cleq, 6 taqne oh daq khoe i bàc ngai cwò lech ka haq, toq aih raq brì ka khoe lap. 7 Hêq manòeq kô oh daq cađac pi dùh dayo, rai padô alòng đòeq haq ùh hìaq mangò hrìn loh hloe ka tacro. 8 Qmang aih, au cali calo ka oh daq paqnoh dèh kan loq waq pì ka mangai aih. 9 Aih ìq raq au majah achìh ka oh daq, đòeq hu qnhro ngan rìm trong oh daq i iu loq ùh. 10 Oh daq khoe caqnaih da mangai leq yiniq lui, au hadai caqnaih. Tàng au caqnaih, aih enh ngèa ka Christ taiq oh daq au majah caqnaih; 11 dôq Satan ùh hìaq jah blêq bèn, majah qmang aih ùh xài bèn ùh loq ka manoh da haq.

12 Manòeq kô jò au khoe trùh ta Trô-ach đòeq anoe Bàu lem da Christ, yac ka ta aih Chuaq khoe pèh ka au qmang, 13 mahaq dua au ùh catèm ta manoh, majah qmang aih, ta aih au qnhòq hnoq Tit aih oh daq au. Aih ìq, dài au majah hangah ka oh daq gùng aih đòeq hu lam ta Maxêđoan.

14 Mahaq manè apôi Boc Plình, haq broq ka nhèn jah blêq hloe hloe enh dalam ka Chirst, èh haq yŏc nhèn đòeq hu rai kan xua thùm trong canau loq ka haq rìm nòe. 15 Majah qmang aih enh ngèa Boc Plình, nhèn kô kan xua thùm da Chuaq Jesus Christ, oe ta adreo mangai jah dèch xam mangai hnhung lùch: 16 Am ka mangai kô xua kan cachìt broq ka cachìt, am ka mangai tau xua kan rìh broq ka rìh. Cabô ma tajì đòeq hu broq ƀài yiniq kô? 17 Nhèn ùh ti lam padro bàu Boc Plình hu chaq acaq tìah ka wì qnoeq. Mahaq nhèn yŏc dèh manoh joq qnàng, bàu loh enh Boc Plình qmang leq, oe enh dalam ka Christ nhèn anoe hlài qmang aih enh ngèa Boc Plình.

<- II CORINHTO 1 II CORINHTO 3 ->