1 Ta anoe trùh dahwèq tadreo kan kiac, bèn doe đeh kô dìq mangai loq. Mahaq kan loq broq ka mangai loq ka hnhè rađeh, yàng da kan loq waq aih ma broq dua lem. 2 Tàng i cabô doe đeh kô mangai loq, joq qnàng mangai aih qnhòq loq qmang ka rađeh khòh loq. 3 Mahaq tàng i mangai leq loq waq ka Boc Plình, Boc Plình loq ka mangai aih. 4 Qmang aih, anoe trùh trong acaq dahwèq khoe tadreo ka kiac qmù, bèn loq kiac qmù ta crong taneh kô aih dech do, i toq Boc Plình raq, enh gùng ka aih ùh i kiac leq hòm. 5 Joq wì doe i bàc kiac, qnah oe ta troc qnah oe ta haqneq (aih dài wì majah tadreo bàc kiac), 6 da bèn ma loq, i mòeq Boc Plình raq, aih Baq bèn, rìm yiniq loh dìq enh Haq, bèn dìq rìh enh Haq, èh hòm i mòeq Chuaq raq, aih Jesus Christ, rìm yiniq loh dìq enh Haq, bèn dìq rìh enh Haq.

7 Mahaq ùh xài rìm ngai dìq loq qmang aih. I qnah ngai oe raq hèm i kan kiac, dài jò wì acaq dahwèq tadreo; kan ùh dràng aih broq ka manoh wì haq loh ka pi hadròeh. 8 Mahaq ùh xài dahwèq acaq broq bèn jah lem ka manoh Boc Plình, tàng bèn acaq dua ùh jah cleq, ùh dua ùh hnhung cleq. 9 Rabiaq haq, apaq dôq kan ùh tawac da bèn broq ka mangai ùh dràng catoeh ataq. 10 Majah qmang aih, mangai ma ùh dràng hnoq oh daq mangai ma i kan loq haqngui cacaq ta hnim tadreo kan kiac, aih wì ùh top dua acaq đeh diq qmòh? 11 Aih ajoq ih yoc dèh kan loq, broq raliang đac mangai ùh dràng, aih bòe oh daq Jesus Christ ma khoe cachìt am ka wì. 12 Jò pì broq yiniq luiq dèh ka oh daq qmang aih, manoh wì haq khoe ùh nèn loh ka habau tam, aih pì khoe broq yiniq lui ka Christ. 13 Dài haq, tàng joq dahwèq acaq broq ka oh daq au tacro, blinh au ùh acaq jam, đòeq au ùh hìaq wìa nen ka oh daq catoeh.

<- I CORINHTO 7I CORINHTO 9 ->