I CORINHTO 16

Tagop bac jèn

1 Manòeq kô, anoe trùh trong tagop ƀac jèn đòeq wiang am ka mangai hadròeh ma qnang nan, aih oh daq broq qmang ka au ma khoe anoe ka ƀài Tagop Hadròeh oe ta Galati. 2 Oe ta hi gàu tuàng, rìm ngai oh daq tiaq dađeh bu hlàt tagop jah pang leq, đòeq qmòe dèh ta hnim raq, dôq ùh hìaq ep gòm jò nhèn trùh men ti tagop ònh. 3 Jò au trùh, au hi thê ƀài mangai oh daq ma khoe ràih wê jàiq au ma achìh xam ƀac oh daq ma tagop aràng ta Jerusalem. 4 Tàng troq ka au lam, wì aih hi lam ti au.

5 Atìq ka au lam khoe ka Maxê-đoan, au hi trùh hmàih ka oh daq, majah qmang aih au ep thia ta Maxê-đoan. 6 Canau au loq oe ti oh daq ùh dùnh, tàng ùh meh clech ka ralìm, đòeq oh daq jah ajèn aràng au lam tanoè au enh lam. 7 Yàng kô ùh xài au toq enh glàm oh daq hi hêq, mahaq tàng Chuaq lòh, au ngèh jah oe ti oh daq. 8 Mahaq yàng kô au oe ta Êpheso trùh ramènh Hì padam jàt, 9 majah qmang aih, ta aih i mòeq toq qmang kàn khoe pèch đòeq ka au hu abroq, mahaq hadai i bàc ngai enh tablêq ka au.

Bàu tanap

10 Tàng Timothê trùh hmàih ka oh daq, pì hmàng ngan apaq đòeq haq i cleq ma ep crè jò haq oe ti pì: Majah qmang aih haq hanoh patìh ka Chuaq tìah ka au diq. 11 Apaq i cabô jù đac haq, ahlài haq ma catèm, đòeq haq jah trùh ta au, majah qmang aih au qnang gòm haq hloe xam oh daq qnoeq.

12 Yàng manòeq kô, Abolô aih oh daq da bèn, au bàc yàng àu thê haq lam tiaq wì oh daq kô đòeq lam trùh ta oh daq, mahaq haq qnhòq lap lam. Mahaq haq lam jò leq haq hi dòh.

13 Oh daq hmàng hamang, yòng cajap manoh lùi, ma hagau, ma tadêh haq oq. 14 Rìm yiniq oh daq broq, dìq broq ta kan loq waq.

15 Manoeq kô, oe i moeq bàu tanap hòm: Oh daq loq hnim Sêphana aih plì ma ramua ta gùng Achai, pì diq loq mangai ta hnim aih dìq ka manoh patìh ka mangai da Chuaq. 16 Khòh loq ta iu ƀài mangai qmang aih, khòh ta iu dìq dŏng ƀài mangai hanoh patìh xalep ti bèn. 17 Sêphana, Photu-na xam Achaico trùh ta kô, au bùi haraya, wì aih khoe aràng am ka au ƀài dahwèq oh daq ùh i aràng. 18 Wì aih khoe broq ka manoh au xam manoh oh daq jah blình hlài. Khòh padèch ƀài mangai qmang aih.

19 Ƀài Tagop Hadròeh oe ta gùng Asi bòch hmàih trùh pì, enh dalam ka Chuaq, Aquila xam Bêritsin tanap bàu hmàih trùh pì, Tagop Hadròeh oe ta hnim wa aih hanoh. 20 Dìq dŏng oh daq ta kô bòch hmàih ka pì. Drah yŏc kan hìp hadròeh đòeq hmàih da bau.

21 Au kô Phaulo, tì kŏng cla au achìh jàiq kô bòch hmàih oh daq.

22 Tàng mangai leq ùh ta iu ka Chuaq, mangai aih ep pòq kan “Anathem”! Maranatha!

23 Waiq kan tabàih da Chuaq oe ti pì oh daq! 24 Kan loq waq da au oe ti rìm ngai oh daq enh dalam yiniq Chuaq Jesus Christ.

<- I CORINHTO 15