1 याग यीशु इव सप्पा मात अंद बुट्टुन रा तान चेलागोळ से अनली कुरतुन, 2 “नीव जान्सतीर कि येढ्ढ दिन इन बाद्दा फसह अन्द हाब्ब आद, अदिक मंळसा अन्द पार क्रूस मा येरसोर साटी हुळसुसकु आदान.”✡निर्गमन १२:१-२७

3 आग प्रधान याजक अदिक प्रजा अन्द पुरनिए कैफा हेसुर इन महायाजक उन भवन दा जमा आदुर, 4 अदिक आपस दा विचार माळली कुरतुर कि यीशु उक गुप्त तरीका देल हुळकु कोंद बुटेव. 5 लेकीन आंदुर अनतोगोर, “हाब्बा अन समय दा ईला, ईलारा हिंग आगबाळुल कि लॉकुर दा दंगा फसाद आगेगुल.”

6 याग यीशु बैतनिय्याह दा शमौन कोढ़ी इन मान्या ईरोन, 7 ✡लूका ७:३७,३८रा ऊंद आर्त संगमरमर इन बाटुल दा बार्र ईत्‍तर हुळकु यीशु उन हात्‍ती बंदुर, अदिक याग आव ऊमोर साटी कुरतीदुन रा आऊन ताल्ला मा ऊलटुसदुर. 8 ईद नोळकु आऊन चेलागोळी सिट्ट बत्‍त अदिक आंदुर अनली कुरतुर, “ई ईत्‍तर येती बरबाद माळकु आग्याद? 9 इदरी रा वळ्लीद दाम दा मारकु कंगालगोळ दा वाटस्कु आग सकोद.”

10 ईद जान्सकु यीशु आंदुर से अंदुन, “आ आर्त इक येती सतुसतीर? आक नान साटी भलाई इन क्याल्सा माळ्यार. 11 कंगाल रा नीम सांगुळ हमेशा ईरतार, लेकीन ना नीम सांगुळ हमेशा ईर सकालीन. 12 आक नान मय मा जो ईत्‍तर हाक्यार, अद नान सोत्‍तुर बाद्दा नळ्सकु आगोद तयारी हुन. 13 ना नीम से खरा माताळतीन, कि सप्पा दुनिया दा येल्यारा भी ईद खुशखबरी प्रचार माळकु आदीत, अल आकिन ईद क्याल्सा अन्द वर्णन भी आकिन याद दा माळकु आदीत.”

14 आग यहूदा इस्करियोती, जो हन्नेळ चेलागोळ दा टु ऊंद ईरोन, प्रधान याजकगोळ्द हात्‍ती होदुन, 15 अदिक आव अंदुन, “अगर ना आऊक नीम कय दा हुळसुस कोळाईन रा नानी येन कोट्टीर?” आंदुर आऊक तीस चाँदी नव सिक्‍कागोळ आळुकु कोट बुटुर. 16 अदिक आव अदा समय टु आऊक हुळसुसोद सही मवका ढुंढ्सली कुरतुन.

17 अखमीरी रोट्टी इन हाब्बा इन पयला दिन, चेलागोळ यीशु उन हात्‍ती बंदकु केळली कुरतुर, “नी येन चाहासत्या कि नाव नींद साटी फसह तिनोद तयारी माळेव?”

18 यीशु अंदुन, “नगर दा अमुक मंळसा अन्द हात्‍ती होगकु आऊन से अनी, ‘गुरु अनेत्यान कि नांद समय हात्‍ती आद. ना तान चेलागोळ्द सांगुळ नीन मान्या फसह हाब्ब मानसाईन.’ ”

19 इदुरसाटी चेलागोळ यीशु उन आग्या स्वीकार माळदुर अदिक फसह तयार माळदुर.

20 याग द्याव आत रा आव हन्नेळ चेलागोळ सांगुळ ऊमली कुरतीदुन. 21 याग आंदुर तीनोर रा यीशु अंदुन, “ना नीम से खरा अनतीन कि नीम दा टु ऊंद नानी हुळसुस्यान.”

22 इदुर मा आंदुर च्याच उदास आदुर, अदिक हर ऊंद चेला यीशु से केळली कुरतुन, “हे गुरु, येन आव ना हुईन?”

23 यीशु उत्‍तर कोट्टुन, “आव जो नान सांगुळ तंळग्या दा ऊमतान, आवा नानी हुळसुसकु सोपस्यान. 24 ना मंळसा अन्द पार ह्यांग नान बारा दा शास्त्र दा लिख्सकु आद, अद आदीत अच; लेकीन आ मंळसा अन्द साटी शोक आद याऊन द्वारा मंळसा अन पार हुळसुसकु आदान: अगर आ मंळसा अन्द जनम अच ईला आगाईत, रा आऊन साटी भला आगाईत.”✡भजन संहिता २२:७-८; यशायाह ५३:९

25 आग यीशु उक हुळसुसकु सौप्सावाळा यहूदा अंदुन, “हे गुरु, येन आव ना हुईन?”

26 “याग आंदुर ऊमोर रा यीशु रोट्टी ताकोंडुन, अदिक आशीष बेळकु मुरदुन, अदिक चेलागोळी कोटकु अंदुन, हुडी, तिनी; ईद नांद मय हुन.”

27 बाक यीशु कटोरा हुळकु धन्यवाद माळदुन, अदिक आंदरी कोटकु अंदुन, “नीव सप्पा लॉकुर इदुर दा टु कुडी, 28 यतिकी ईद वाचा अन्द नान अद रक्ता हुन, जो सप्पा लॉकुर पापगोळ माफ अन्द साटी वाहुसकु आगतद. 29 ना नीम से खरा अनतीन कि अंगुर इन ईद रास्सा आ दिन ताका यागलु कुढ़ालीन, यागासताका नीम सांगुळ तान आप्प उन राज्य दा व्हाशोद रास्सा कुडू कोमालीन.”

30 बाक आंदुर भजन हाळ्त-हाळ्त जैतून पहाळी मा होदुर.

31 आग यीशु चेलागोळ से अंदुन, “नीव सप्पा मुंदुर ईंदल्या ईळ्लक इक नांद बारा दा ठोकर तिंदीर, यतिकी शास्त्र दा लिख्सकु आद: ‘ना चरवाह अक कोनाईन, अदिक झुण्ड इन म्यांडागोळ तितर-बितर आगेदव.’✡जकर्याह १३:७ 32 ✡मत्ती २८:१६लेकीन ना तान जित्‍ता आगदुर बाद्दा नीम से पयले गलील इक होगाईन.”

33 इदुर मा पतरस यीशु से अंदुन, “अगर सप्पा मुंदुर नीन बारा दा ठोकर तिंदार रा तिंदार, लेकीन ना यागलु ठोकर तिनतीदील.”

34 यीशु आऊन से अंदुन, “ना नीन से खरा अनतीन कि ईंदल्या ईळ्लकी हुंज इन कुग्गोर से पयले, नी मुर घन नांद इनकार माळ्या.”

35 पतरस यीशु से अंदुन, “अगर नानी नीन सांगुळ सायोद भी बिद्दीत, तरी ना नींद यागलु इनकार माळतीदील.” अदिक हिंग अच सप्पा चेलागोळ भी अंदुर.

36 आग यीशु तान चेलागोळ्द सांगुळ गतसमनी हेसुर इन ऊंद जागा दा बंदुन अदिक तान चेलागोळ से अनली कुरतुन, “ईल्या कुर्तकु ईरेतीर, आगासताका ना अल होगकु प्रार्थना माळतीन.” 37 यीशु पतरस अदिक जब्दी इन येढ्ढु पारगोळी सांगुळ ओतुन, अदिक उदास अदिक व्याकुल आगली कुरतुन. 38 आग यीशु आंदुर से अंदुन, “नान मन च्याच उदास आद. इल ताका कि नान जीव होळतेला आद. नीव ईल्या ठहरूसी अदिक नांद सांगुळ च्याता ईरी.”

39 बाक यीशु थ्वाळासा मात्‍त मुंद होगकु बाय इन भार देल बिद्दुन, अदिक ईद प्रार्थना माळदुन, “हे नांद आप्पा, अगर आग सकुल रा ईद संकट नान मा टु टलसेगुल, तौभी ह्यांग ना चाहासतीन हांग ईला, लेकीन ह्यांग नी चाहासत्या हांग अच आगुल.”

40 बाक यीशु चेलागोळ्द हात्‍ती बंदकु आंदरी मिंगतेला नोळदुन अदिक पतरस से अंदुन, “येन नीव नान सांगुळ ऊंद घळी भी च्याता ईला ईर सकीर? 41 नीव परीक्षा दा बिळतीदील इदुरसाटी च्याता ईरी, अदिक प्रार्थना माळतेला ईरी: आत्मा रा तयार आद, लेकीन शरीर कमजोर आद.”

42 बाक यीशु दुसरा बार होगकु ईद प्रार्थना माळदुन, “हे नांद आप्पा, अगर ईद नांद कुढा बिना ईला हट्सतीदाद रा नींद इच्छा पुरा आगुल.” 43 आग यीशु बंदकु आंदरी मात्‍त मिंगतेला नोळदुन, यतिकी आंदुरव कण्णगोळ जप देल तुमकु ईरव.

44 आंदरी बिटकु यीशु मात्‍त होटोदुन, अदिक अवा आवाजगोळ दा मात्‍त तीसरा बार प्रार्थना माळदुन. 45 आग यीशु चेलागोळ्द हात्‍ती बंदकु आंदुर से अंदुन, “ईग मिंगतेला ईरी, अदिक आराम माळी: नोळी, घळी होट बंदाद, अदिक ना मंळसा अन्द पार पापीगोळ कय देल हुळसुसकु आगाईन. 46 येळी, होगाता; नोळी, नानी ध्वाका देल हुळसुस्कु सौप्सावाळा नान हात्‍ती होट्ट बंदान.”

47 यीशु ईद अनतेला अच ईरोन कि यहूदा जो हन्नेळ चेलागोळ दा टु ऊंद ईरोन बंदुन, अदिक आऊन सांगुळ प्रधान याजकगोळ अदिक लॉकुर्द पुरनियागोळ दी टु धोळ भीळ तलवारगोळ अदिक कोलगोळ हुळकु बंदुर. 48 यीशु उक हुळसुसावाळा आंदरी ईद संकेत कोटीदुन: “यार्द ना चुम्मा ताकोमाईन आवा हुन; आऊक हुडु कोमेतीर.”

49 अदिक तुरन्त यीशु उन हात्‍ती बंदकु अंदुन, “हे गुरु, नमस्कार!” अदिक आऊंद हापाळ चुम्मा ताकोंडुन.

50 यीशु आऊन से अंदुन, “हे संगी, या क्याल्सा अन्द साटी नी बंद्या, अदरी माळकोम.”

57 आग यीशु उक हुडावाळेर आऊक कैफा हेसुर इन महायाजक उन हात्‍ती ओतुर, यल नियम इन गुरु अदिक पुर्वजगोळ जमा आगीदुर. 58 पतरस दुर दुर टु उच आऊन हिंद-हिंद महायाजक उन आंगुळ ताका होदुन, अदिक बुळ्क होगकु यीशु उन अन्त नोळली सिपाहीगोळ सांगुळ कुरतोदुन. 59 प्रधान याजक अदिक सप्पा महासभा यीशु उक कोन्नोर साटी आऊन विरोध दा ख्वाटा गवाही इन खोज दा ईरोर, 60 लेकीन हापाळ सा ख्वाटा गवाहगोळ बंदुर मा भी आंदरी येनु हासिल आगीदील. आखरी दा येढ्ढ मुंदुर बंदुर, 61 ✡यूहन्ना २:१९अदिक अंदुर, “ईव अंदान कि ना परमेश्वर उन मंदिर इक केडु सकतीन अदिक अदरी मुर दिन दा माळ सकतीन.”

62 आग महायाजक नीदुरकु यीशु से अंदुन, “येती नी येनु उत्‍तर कोळाल? ई लॉकुर नीन विरोध दा येन गवाही कोळेत्यार?” 63 लेकीन यीशु सुंगा ईत्‍तुन. आग महायाजक यीशु से अंदुन, “ना नीनी जित्‍ता परमेश्वर उन किर्‍या कोळतीन कि अगर नी परमेश्वर उन पार मसीह हुय, रा नाम से अंद बुळ.”

64 यीशु आऊन से अंदुन, “नी रा खुद अच अंदबुट; लेकीन ना नीम से ईद भी अनतीन कि ईगी टु नीव मंळसा अन पार उक सर्वशक्तिमान उन ऊमा कय दी कुर्त, अदिक आकाश इन बादलगोळ मा बर्त नोळीर.”

65 इदुर मा महायाजक तानव कपळा हरदुन अदिक अंदुन, “ईव परमेश्वर उन अपमान माळ्यान, ईग नामी गवाहगोळ्द येन जरवत आद? नोळी, नीव ईगल्या ईद अपमान केळीर! 66 नीव येन सोचेतीर?”

69 पतरस व्हार्या आंगुळ दा कुर्तकु ईरोन कि ऊंद दासी आऊन हात्‍ती बंदुर अदिक अंदुर, “नी भी यीशु गलीली इन सांगुळ ईर्या.”

70 आव सप्पा मुंदुर्द मुंद ईद अनतेला इनकार माळदुन, “ना जान्सालीन नी येन अनीत्या.” 71 याग आव व्हार्या दरवाजा मा होदुन, रा दुसरा दासी आऊक नोळकु आंदुर से अंदुर जो अल ईरोर, “ईव भी रा आ यीशु नासरी इन सांगुळ ईरोन.”

72 आव किर्‍या तिनकु मात्‍त इनकार माळकु अंदुन: “ना आ मंळसा अक अरालीन.”

73 घळी तिमुर बाद्दा लॉकुर जो अल नीदुरकु ईरोर, पतरस उन हात्‍ती बंदकु आऊन से अंदुर, “खराखुरा नी भी आंदुर दा टु ऊंद हुय, यतिकी नीन बोली भाषा नींद भेद खोल्स बुळतद.”

74 आग आव मना माळली अदिक किर्‍या तिनली कुरतुन: “ना आ मंळसा अक अरालीन.” अदिक तुरन्त हुंज कुग्त. 75 आग पतरस उक यीशु उन आ मात याद बत्‍त: “हुंज इन कुग्गोर से पयले नी मुर घन नान इनकार तुम्या.” अदिक आव व्हार्या होगकु हापाळ दुखी आगकु वर्लदुन.