1 “बाक दोषबली इन विधी ईद हुन. अद हापाळ वळ्लीद आद: 2 या जागा मा होमबली पशु उन बली कोळतार अदा जागा मा दोषबली पशु भी बली माळुल, अदिक अदुर्द रकत इक याजक वेदी मा नाकु दी सिपसुल.” 3 अदिक आव अदुर्द सप्पा न्याण इक येरसुल, मतलब अदुर्द चर्बीवाळा पुसटी इक, अदिक या न्याण देल कळ्लपच्चीगोळ होचकु ईरताव अव भी, 4 अदिक येढ्ढु फॉफसागोळ अदिक जो न्याण अदुर म्याकुच अदिक नेळु उन हात्ती ईरतद, अदिक फॉफसागोळ सांगुळ ईरग्या अन्द म्याकुच इन परत; ई सप्पा अक आव अलग माळुल; 5 अदिक याजक इदरी होमबली मा यहोवा अन्द साटी बेक्की मा होताकुल; आग आव दोषबली आदान. 6 याजकगोळ दा टु सप्पा गंळ्सुर इदुर दा टु तिन सकतार; अद यातोदारा पवित्र जागा दा तिनकु आगुल; यतिकी अद हापाळ वळ्लीद आद.

7 ह्यांग पापबली आद हांग अच दोषबली भी आद, आ येढ्ढु बलिगोळ्द ऊंद अच विधी आद; जो याजक आ बेलीगोळ येर्सकु पाप इक होचकोमुल आवा आ वस्तुगोळी ताकोमुल. 8 अदिक जो याजक यावारा मंळसा अन्द साटी होमबली इक येरसुल आ होमबली पशु उन तोगुल इक आवा याजक हुडु कोमुल. 9 अदिक भट्टी दा, या कढ़ई दा, या तावा दा सुटकु आग्याव अव सप्पा अन्नभेट आ याजक उन आदीत जो अवरी येर्सतान. 10 हर ऊंद अन्नभेट, चाहे याण्णा मिलुस्कु ईरूल या वळ्गींद ईरूल, हारून उन सप्पा पारगोळ इक बराबर मात्रा दा सिक्कीत.

11 “आ मेल-मिलाप बलिदान इन साटी, जो यहोवा अन्द मुंद येर्सकु आगुल, अदुर साटी विधी ईद हुन:” 12 “अगर आव इदरी आभार इन रूप दा भेंट माळतान, रा आव आभार बली इन सांगुळ याण्णा दा बेंदकु अखमीरी रोट्टी, याण्णा दा बेंदकु अखमीरी सुवारी अदिक याण्णा देल बेंदकु मैदा अन्द रोट्टी भेंट माळुल.” 13 अदिक आव तान धन्यवादवाळा मेल-मिलाप बलिदान इन सांगुळ खमीरी रोट्टीगोळ भी येरसुल. 14 अदिक हिंग ऊंद-ऊंद रोट्टी नेगुकु यहोवा अक भेंट माळकु येरसुल; अद मेल-मिलाप बलिदान इन रकत इक सिपसावाळा याजक उन आदीत. 15 अदिक आ धन्यवादवाळा मेलबली इन मास बलिदान येरसोद दिशी इच तिनकु आगुल; अदुर दा टु येनारा भी मिक्कु ईर बाळुल.

16 लेकीन अगर अदुर्द बलिदान इन चढ़ावा मन्नत इन या खुद इन इच्छा अन ईरूल, रा आ बलिदान इक या दिशी आव येर्सकु आगुल अदा दिशी अद तिनकु आगुल, अदिक अदुर दा टु जो मिक्कु ईरूल अद दुसरा दिशी भी तिनकु आगुल. 17 लेकीन जो येनारा बलिदान इन मास दा टु तिसरा दिन ताका मिक्कु ईरूल रा अद बेक्की दा होत्‍ताकु आगेगुल. 18 इदुरसाटी अगर अद मेल-मिलाप बलिदान इन पशु उन चिच्ची इक तिसरा दिशी तिनकोमतान, जो अदरी भेंट माळदुन, रा अद बली स्वीकार आगतीदील अदिक आऊन साटी लाभदायक भी आगतीदिल. ईद अशुद्ध सम्सकु आदीत अदिक जो यावारा मंळसा इदरी तिनतान, आव खुद तान दोष नेगदान. 19 “बाक जो मास यावारा अशुद्ध वस्तु देल मुटकु आगुल अद तिनकु आगबाळुल; अद बेक्की दा होत्‍ताकु आगुल. बाक मेल-मिलाप बलिदान इन मास यास मुंदुर शुद्ध आर आंदुर अच तिनुल, 20 लेकीन जो अशुद्ध आगकु यहोवा अन्द मेल-मिलाप बलिदान इन मास दा टु येनारा तिनुल रा आव तान लॉकुर दा टु नाश माळकु आगुल. 21 अदिक अगर यावारा यातोदारा अशुद्ध वस्तु उक कय देल मुटकु यहोवा अन्द मेल-मिलाप बलिदान पशु उन मास दा टु तिंदान, रा आव भी तान लॉकुर दा टु नाश माळकु आदान, चाहे आव मंळसा अन यातोदारा अशुद्ध वस्तु या अशुद्ध पशु या यातोदारा भी अशुद्ध अदिक घृणित वस्तु आगुल.”

22 बाक यहोवा मूसा से अंदुन, 23 “इस्राएलीगोळ से ई प्रकार देल अन: नीव लॉकुर न रा वस्ता अन्द येनारा न्याण तिनेतीर अदिक न म्यांडा या मर्री इन. 24 अदिक जो पशु खुद सोतोगुल, अदिक जो दुसरा पशु देल हर्दकु आगुल, अदुर्द न्याण दुसरा क्याल्सा दा तरेतीर, लेकीन अदरी यागलु तिनबाळेतीर. 25 जो यावारा हिंग पशु उन न्याण तिंदान यदुर दा टु लॉकुर थ्वाळासा यहोवा अन्द साटी होमबली माळकु येर्सतार अद तिनावाळा तान लॉकुर दा टु नाश माळकु आदान. 26 अदिक नीव तान मान्या यातोदारा प्रकार इन रकत, चाहे पक्षी इन चाहे पशु उन आगुल, तिनबाळेतीर. 27 हर ऊंद प्राणी जो यातोदारा प्रकार इन रकत इक तिंदान आव तान लॉकुर दा टु नाश माळकु आदान.”

28 बाक यहोवा मूसा से अंदुन, 29 “इस्राएलीगोळ से ई प्रकार देल अन : जो यहोवा अन्द साटी मेल-मिलाप बलिदान येरसुल आव अदा मेल-मिलाप बलिदान दा टु यहोवा अन्द हात्ती भेंट तरूल; 30 आव तान अच कयगोळ देल यहोवा अन्द होमबली इक, मतलब याद्दा सांगुळ न्याण इक तरूल कि याद्दा हालुसोद भेंट माळकु यहोवा अन्द मुंद हालुस्कु आगुल.” 31 अदिक याजक न्याण इक रा वेदी मा होताकुल, लेकीन याद्दा हारून अदिक आऊन पारगोळ्द आदीत. 32 बाक नीव तान मेलबलीगोळ दा टु ऊजवा जांघ इक भी नेगोद भेंट माळकु याजक उक कोळेतीर; 33 हारून उन पारगोळ दा टु जो मेल-मिलाप बलिदान इन रकत अदिक न्याण इक येरसुल ऊजवा जांघ आऊंदा भाग आदीत. 34 यतिकी इस्राएलीगोळ्द मेलबलीगोळ दा टु हालुसोद भेंट इन याद्दा अदिक नेगोद भेंट इन जांघ इक हुळकु ना याजक हारून अदिक आऊन पारगोळ इक कोटीन, कि ईद हमेशा इस्राएलीगोळ दी टु आंदुर्द हक बन्सकु ईरूल. 35 “या दिशी हारून अदिक आऊन पार यहोवा अन्द हात्ती याजक पद इन साटी तनकु आदुर, अदा दिशी यहोवा अन्द होमबली गोळ दा टु आंदुर्द ईदा अभिषित भाग ठहरूसकु आत; 36 मतलब या दिशी यहोवा आंदुर्द अभिषेक माळदुन अदा दिशी आव आग्या कोट्टुन कि आंदरी इस्राएलीगोळ दी टु ईद भाग हमेशा सिकतेला ईरूल; आंदुर्द पीढ़ी-पीढ़ी इन साटी आंदुर्द ईदा हक ठहरूसकु आत.”

37 होमबली, अन्नभेट, पापबली दोषबली, याजकगोळ्द संस्कार बली, अदिक मेल-मिलाप बलिदान इन व्यवस्था ईदा हुन; 38 याग यहोवा सीनै पर्वत इन हात्ती इन आळी दा मूसा अक आग्या कोट्टुन कि इस्राएली नान साटी येन-येन चढ़ावा येरस्यार, आग आव आंदरी ईदा व्यवस्था कोटीदुन.

<- लैव्यव्यवस्था 6लैव्यव्यवस्था 8 ->