1 “अगर यावारा गवाह आगकु हिंग पाप माळुल कि किर्‍या तिन्सकु केळकु भी कि येन नी ईद केळ्द अथवा जान्सत्या, अदिक अद मात प्रगट माळबाळुल, रा आऊक तान दोष इन भार नेगोद बिद्दीत.”

2 अथवा अगर यावारा यातोदारा अशुद्ध वस्तु उक अग्यानता देल मुट्ट बुळुल, रा चाहे आव अशुद्ध जंगली पशु उक, चाहे अशुद्ध घरेलु पशु उक, चाहे अशुद्ध रेंगसावाळा जीव-जन्तु उन लाश आगुल, रा आव अशुद्ध आगकु दोषी ठहरूस्यान.

3 अथवा अगर यावारा मंळसा यातोदारा अशुद्ध वस्तु उक अग्यानता देल मुट्ट कोमुल, चाहे अद अशुद्ध वस्तु यातोदारा भी प्रकार इन यती आगबाळुल यदुर देल लॉकुर अशुद्ध आगेगतार रा याग आव आ मात इक जान्स कोंडान आग आव दोषी ठहरूस्यान.

4 अगर यावारा बुरा या भला माळली इक बिना सोच सम्सकु किर्‍या तिंदान, चाहे यातोदारा प्रकार इन मात दा आ मंळसा बिना सोच बिचार देल किर्या तिनकु अनुल, रा हिंग मात दा आव दोषी आ घळी दा ठहरूस्यान याग आऊक मालूम आगेदीत.

5 आग आव ई मातगोळ दा टु यातोदारा भी मात दा दोषी ईरूल, आग या विषय दा आव पाप माळीदान आव अदरी मान्स कोमुल, 6 अदिक आव यहोवा अन्द मुंद तान दोषबली तरूल, मतलब आ पाप इन कारण आव ऊंद मादा म्यांडा या मर्री पापबली माळोर साटी तरूल; आग याजक आ पाप इन बारा दा आऊन साटी प्रायश्चित माळुल.

7 “अगर आऊक म्यांडा या मर्री कोळोद सामर्थ्य ईला ईतीदाद, रा तान पाप इन कारण येढ्ढ पंडुक या कबूतर इन पाड्डा दोषबली येरसोर साटी यहोवा अन्द हात्ती तरूल, अदुर दा टु ऊंद रा पापबली इन साटी अदिक दुसरा होमबली इन साटी. 8 आव अवरी याजक उन हात्ती तरूल, अदिक याजक पापबली माळकु आत अदरी पयले येरसुल, अदिक अदुर्द ताल्ला कुतक्या टु मुरकुळ्स बुळुल, पर अलग माळबाळुल, 9 अदिक आव पापबली पशु उन रकत दा टु येनारा तरी वेदी इन बाजु मा सिपसुल, अदिक जो रकत मिक्कु ईरूल अद वेदी इन पायवा मा हाक्कु आगुल; आव रा पापबली ठहरूस्यान. 10 आग दुसरा पक्षी अक अद नियम इन अनुसार होमबली माळुल, अदिक याजक आऊन पाप इन प्रायश्चित माळुल, अदिक आग आव माफ माळकु आदान.

11 “अगर आव येढ्ढ पंडुक या कबूतर इन येढ्ढ पाड्डा भी कोळ ईला सकुल, रा आव तान पाप इन कारण तान चढ़ावा एपा[a] अन्द हतवा भाग मैदा पापबली माळकु तरूल; अदुर मा न रा आव याण्णा हाकुल, अदिक न लुबान ईट्टुल यतिकी अद पापबली आदीत. 12 आव अदरी याजक उन हात्ती तरूल, अदिक याजक अदुर दा टु तान ठ्वामा तीम याद तोरसोद भाग जान्सकु होमबली मा यहोवा अन्द बेक्कीगोळ्द म्याकुच होताकुल; अद रा पापबली ठहरूसीत. 13 अदिक ई मातगोळ दा टु यातोदारा भी मात इन बारा दा जो यावारा पाप माळुल, याजक आऊन प्रायश्चित माळुल, अदिक आग अद पाप माफ माळकु आदीत. अदिक ई पापबली इन मिक्कु अन्नबली इन मिक्कु मैदा याजक उन ठहरूसीत.”

14 बाक यहोवा मूसा अक ईद आदेश कोट्टुन, 15 “ अगर यावारा मंळसा विश्वासघात माळुल अदिक अनजाना दा यहोवा अन्द पवित्र वस्तुगोळ्द संदर्भ दा पाप माळुल, रा आव तान द्वारा माळकु विश्वासघात इन साटी यहोवा अन्द मुंद दोषबली इन रूप दा म्यांडा दा टु ऊंद तंदरूस्त म्यांडा भेंट माळुल, अदुर किंमत पवित्र जागा अन्द शेकेल[b] इन अनुसार बेळ्ल तीम ईरूल, ईद दोषबली हुंद. 16 आव या पवित्र वस्तु उन बारा दा पाप माळदुन, अदुर साटी आव नुकसान इन भरपाई माळुल. आव इदुर दा इदुर्द पाचवा भाग इक जोळ्सकु याजक उक सौप्स बुळुल. याजक दोषबली इन म्यांडा अन्द सांगुळ आऊन साटी प्रायश्चित माळुल अदिक आऊन ईद पाप माफ माळकु आदीत.

17 “अगर यावारा मंळसा पाप माळतान अदिक यावारा भी अद क्याल्सा माळतान, जो यहोवा अन्द दी टु मना माळकु आग्याद, अगर आव इदुर देल अनजान आन, तौभी आव दोषी आन अदिक तान दण्ड इन भार नेगदान. 18 बाक आव दोषबली इन साटी म्यांडा दा टु उचित किंमत इन ऊंद तंदरूस्त म्यांडा तरूल कि याजक आ मंळसा अन्द द्वारा माळकु आ विश्‍वासघात इन साटी, जो आव अनजाना दा माळीदुन, प्रायश्चित माळुल, अदिक आऊन ईद विश्वासघात माफ माळकु आदीत. 19 ईद ऊंद दोषबली हुंद; बिना संकोच आव यहोवा अन्द नजर दा दोषी ईरोन.”

<- लैव्यव्यवस्था 4लैव्यव्यवस्था 6 ->