1 हर ऊंद महायाजक मंळसागोळ दा टु अच निवळुस्कु आगतान, अदिक लॉकुर्द प्रतिनिधीत्व माळोर साटी परमेश्वर इन स्यावा साटी नियुक्ती माळकु आगतद ताकी आव पापगोळ साटी भेंट अदिक बलिदान येर्सुल. 2 यतिकी खुद भी हापाळ रीति देल कमजोरी इन हात्‍ती आन इदुरसाटी आव अग्यानीगोळ अदिक भुला भटका लॉकुर सांगुळ कोमलता देल व्यवहार माळ सकतान. 3 इदुरसाटी आऊक पायजे कि ह्यांग लॉकुर साटी हांग अच तान साटी भी पाप-बली येरसुल. 4 ईद मुख्य याजक आदर इन पद याऊ तान तान इक निवळुस्कु ताकोमालुन, याग कि हारून उन घाई परमेश्वर उन दी टु ठहरूसकु आगालुन.

5 हांग अच मसीह भी महायाजक आगोद आदर तांदुर देल ग्रहण माळीदील, बल्‍की परमेश्वर आऊन से अंदुन “नी नान पार हुय, अदिक ईंद ना नीन आप्प बनसीन.” 6 ईदा प्रकार आव दुसरा जागा दा भी अनतान, “नी मलिकिसिदक इन रीति मा हमेशा साटी याजक आय.”

7 [a]यीशु तान शरीर दा ईरोद दिनगोळ दा धोळ्द शब्द दा वर्ल-वर्लकु अदिक कण्ण इन नीर वाहुसकु आऊन से जो आऊक मृत्यु देल ऊळ्स सकोन, प्रार्थना अदिक विनती माळदुन, भक्ति अदिक नम्रता अन कारण परमेश्वर आऊन केळदुन. 8 लेकीन अगर आव परमेश्वर उन ईरोन तरी भी दुखगोळ झेल्सतेला आव आग्या अन पालन माळोद कलतुन. 9 अदिक सिद्ध बन्सदुर मा, तान सप्पा आग्या मानसावाळेर साटी अनन्त काल इन उद्धार इन स्त्रोत बन्सेदुन, 10 अदिक आ परमेश्वर उन दी टु मलिकिसिदक इन रीति मा महायाजक बनस्कु आदुन.