उत्पत्ति 50

1 आग यूसुफ तान आप्प उन बाय मा बिदकु वर्लदुन अदिक आऊक चुम्सदुन. 2 अदिक यूसुफ आ वैध्यगोळी, जो आऊन सेवक ईरोर, आग्या कोट्टुन कि आऊन आप्प उन लाश मा सुगन्ध द्रव्य तुमुल; आग वैध्यगोळ इस्त्राएल उन लाश दा सुगन्ध द्रव्य तुमदुर. 3 अदिक आऊनव चालीस दिन पुरा आदव, यतिकी यार लाश दा सुगन्ध द्रव्य तुमकु आगतद, आंदरी ईसा दिन पुरा हत्ताव; अदिक मिस्त्री लॉकुर अदुर साटी सत्तर दिन ताला विलाप माळतेला ईत्तुर.

4 याग आऊनव विलाप उन दिनगोळ बितसेदव, आग यूसुफ फिरौन उन घराना अन लॉकुर से अनली कुरतुन, “अगर नीम अनुग्रह अन नजर नान मा ईतीदाद रा नान ईद बातणी फिरौन उक केळसी, 5 नान आप्प ईद अनकु, ‘नोळ ना सोत्तुर मा आईन,’ नानी ईद कसम तीन्सदुन, ‘जो कब्र ना कनान द्याश दा अगळुसीन अल्या नी नानी मुण्‍ण कोळेत.’ इदुरसाटी ईग नानी अल होगकु तान आप्प उक मुण्ण कोळोद आग्या कोळुल, अदुर बाद्दा ना वापस होट बराईन.”[a]

6 आग फिरौन अंदुन, “होगकु तान आप्प उन तिन्सद कसम अन अनुसार आऊक मुण्‍ण कोळ.”

7 इदुरसाटी यूसुफ तान आप्प उक मुण्ण कोळोर साटी होदुन, अदिक फिरौन इन सप्पा कर्मचारी, मतलब आऊन भवन इन स्याणा मंळसागोळ अदिक मिस्त्र द्याश इन स्याणागोळ आऊन सांगुळ होदुर. 8 अदिक यूसुफ उन मान्या गोळोर सप्पा लॉकुर, अदिक आऊन वार्टुर, अदिक आऊन आप्प उन मान्या गोळोर सप्पा लॉकुर भी सांगुळ होदुर; लेकीन आंदुर तान चिकोरी, अदिक मर्र म्यांडा, अदिक गोसीगोळी गोशेन प्रदेश दा बिटकु बंदुर. 9 अदिक आऊन सांगुळ रथ अदिक सवार होदुर, ई प्रकार भीळ हापाळ आगेत.

10 याग आंदुर आताद उन खलयान ताका, जो यरदन गांगा अन आप्पाटी आद, पोहचुसदुर, आग अल हापाळ भारी विलाप माळदुर, अदिक यूसुफ तान आप्प उन साटी येळ दिन इन विलाप माळसुसदुन. 11 आताद इन खलिहान दाकळोद विलाप इक नोळकु आ द्याश इन ईरावाळेर कनानीगोळ अंदुर, “ईद रा मिस्त्री लॉकुर्द भारी विलाप आगीदाद.” ईदा कारण आ जागा अन हेसुर आबेल मिस्रेम बित्त, अदिक अद यरदन इन आप्पाटी आद.

12 इस्त्राएल उन पारगोळ ठीक अदा क्याल्सा माळदुर यदुर आव आंदरी आग्या कोटीदुन:[b] 13 मतलब आंदुर आऊक कनान द्याश दा वोतकु मकपेला अन आ जमीन इन गुफा दा, जो मम्रे अन मुंद आद, मुण्ण कोट्टुर; यदरी अब्राहम हित्ती एप्रोन उन कय देल इदुरसाटी कोंडीदुन, कि अद कब्रस्तान इन साटी आंदुर्द खुद इन जागा ईरूल. 14 तान आप्प उक मुण्‍ण कोटकु यूसुफ तान वार्टुर अदिक आ सप्पा सांगुळ, जो आऊन आप्प उक मुण्ण कोळोर साटी सांगुळ बंदीदुर, मिस्त्र वापस बंदुन.

वार्टुरी आश्वासन कोळोद

15 याग यूसुफ उन वार्टर नोळदुन कि नाम आप्प सोतोग्यान, रा अनली कुरतुर, “कदाचित यूसुफ ईग नाम हिंद बिद्दान, अदिक याट बुरा नाव आऊन सांगुळ माळीदेव सप्पा अन पुरा बदला नाम सांगळ ताकोंडान रा.” 16 इदुरसाटी आंदुर यूसुफ उन हाती ईद अनकु कळुदुर, “नीन आप्प सायोर से पयले नामी ईद आग्या कोटीदुन, 17 ‘नीव लॉकुर यूसुफ से ई प्रकार अनेतीर, कि नाव विनती माळतेव, कि नाव विनती माळतेव नी तान वार्टुर्द अपराध अदिक पाप इक क्षमा माळ; नाव नीन से बुरा माळीदेव, लेकीन ईग तान आप्प उन परमेश्वर उन दासगोळ्द अपराध क्षमा माळ.’ ” आंदुर्द ईद मात केळकु यूसुफ वर्लली कुरतुन.

18 अदिक आऊन वार्टुर भी आऊन मुंद होगकु वर्लली कुरतुर, अदिक अंदुर, “नोळ, नाव नीनोर दास हुयेव.”

19 यूसुफ आंदुर से अंदुन, “अंज बाळी, येन ना परमेश्वर उन जागा मा आईन? 20 अगर नीव नान साटी बुरा विचार माळीदीर, लेकीन परमेश्वर अदा मात दा भलाई इन विचार माळदुन, यदुर देल आव हिंग माळुल, ह्यांग ईंद इन दिन प्रगट आद, कि हापाळ सा लॉकुरव जीव ऊळ्दकु आव. 21 इदुरसाटी ईग अंज बाळी: ना नीम्द अदिक नीमोर चिकोर्द पालन-पोषण माळतेला ईराइन.” ई प्रकार आव आंदरी समझुसकु शांती कोट्टुन.

यूसुफ उन मृत्यु

22 यूसुफ तान आप्प उन घराना अन सांगुळ मिस्त्र दा ईत्तुन, अदिक यूसुफ ऊंद सौ हत्त वर्ष जीत्ता ईत्तुन. 23 अदिक यूसुफ एप्रैम उन नातीगोळी नोळदुन अदिक मनश्शे अन नातीगोळ, जो माकीर उन पारगोळ ईरोर, आंदुर पैदा आदुर अदिक यूसुफ आंदरी तान क्वारा दा हुळदुन. 24 यूसुफ तान वार्टुर से अंदुन, “ना रा सायोर मा आईन; लेकीन परमेश्वर सही दा नीम्द सुधी ताकोंडान, अदिक नीमी ई द्याश टु तेगुकु आ द्याश दा पोहचुस्यान, यदरी कोळोद आव अब्राहम, इसहाक, अदिक याकूब से कसम तिंदीदुन.” 25 बाक यूसुफ इस्त्राएलीगोळ से ईद अनकु कि परमेश्वर सही दा नीम्द सुधी ताकोंडान, आंदरी ई बारा अन कसम तीन्सदुन, “नाव नीन येलुगोळी ईल टु आ द्याश दा वोतेव.”[c] 26 ई प्रकार यूसुफ ऊंद सौ हत्त वर्ष इनव आगकु सोतोदुन: अदिक आऊन लाश दा सुगन्ध द्रव्य तुमकु आत, अदिक अद लाश मिस्त्र दा ऊंद लाश पेटी दा ईटकु आत.

<- उत्पत्ति 49