1 याग यूसुफ मिस्त्र दा पोहचुस्कु आदुन, आग पोतीपर हेसुर ईनव ऊंद मिस्‍त्री, जो फिरौन इन हाकिम, अदिक अंगरक्षकगोळव प्रधान ईरोन, आऊक इश्‍माएलीगोळ कय दा टु जो आऊक अल ओतीदुर, पैस्या कोटकु कोंडुन. 2 यूसुफ तान मिस्त्री स्वामी इन मान्‍या ईरतोगोन, अदिक यहोवा आऊन सांगुळ ईरोन; इदुरसाटी सफल धनी मंळसा आगेदुन.[a] 3 अदिक यूसुफ उन स्वामी नोळदुन, कि यहोवा आऊन सांगुळ ईरतान, अदिक जो क्‍याल्‍सा आव माळतान अवरी यहोवा आऊन कय देल सफल माळ कोमतान. 4 आग आऊन अनुग्रह अन नजर आऊन मा आत, अदिक यूसुफ आऊन स्यावा टहल माळोरसाटी निवळुसकु आदुन; बाक आव आऊक तान मान्ना अन्द अधिकारी माळकु सप्‍पा येनारा आऊन कय दा कोट्‍ट बुट्‍टुन. 5 याग टु आव आऊक तान मान्‍या अन्द अदिक सप्‍पा सम्‍पती इन अधिकारी माळीदुन, आग टु यहोवा यूसुफ उन कारण आ मिस्त्री इन मान्‍या आशीष कोळली कुरतुन; अदिक येन मान्‍या, येन केई दा, आऊन जो येनारा भी ईरोद, सप्‍पा मा यहोवा अन आशीष आगली कुर्त. 6 इदुरसाटी आव तान सप्‍पा येनारा यूसुफ उन कय दा ईल ताका बीट बुट्‍टुन कि तान तीना रोट्‍टी इक बिटकु, आव तान सम्‍पती इन हाल येनु ईला जानसोन.

यूसुफ सुंदर अदिक रूपवान ईरोन. 7 ईव मातगोळ बाद्‍दा हिंग आत, कि आऊन स्वामी इन हिंग्‍स यूसुफ उन दी नोळदुर अदिक अंदुर, “नान सांगुळ मींग.” 8 लेकीन आव मना माळकु तान स्वामी इन हिंग्‍स से अंदुन, “केळ, जो येनारा ई मान्‍या आद अद नान कय दा आद; अदरी नान स्वामी येनु जानसालुन, अदिक आव तान सप्‍पा येनारा नान कय दा सौप्स बुट्‍टान. 9 ई मान्‍या नान से धोड्‍डेव याऊ हैलेच; नान स्वामी नानी नीन अलावा यातोदु वस्‍तु से अलग ईटीदिल, यतिकी नी आऊन हिंग्‍स हुय. इदुरसाटी ईद ह्‍यांग संभव आद कि ना ईत्‍ता दुष्‍टता माळकु परमेश्वर उन विरूद्ध पाप माळाईन?” 10 अदिक हिंग आत कि आक रोज यूसुफ से मातगोळ माळतेला ईत्‍तुर, लेकीन आव आकिन मान्‍सीदील कि आकिन हाती मींगाईन या आकिन सांगुळ ईराईन.

11 ऊंद दिशी येन आत कि यूसुफ तान क्‍याल्‍सा माळोर साटी मान्‍या होदुन, अदिक मान्‍यागोळोर सेवकगोळ दा टु याऊ भी मान्‍या अन बुळ्‍क ईला ईरोन. 12 आग आ आर्त आऊन कपळा हरकु अंदुर, “नान सांगुळ मींग,” लेकीन आव तान कपळा आकिन कय दा बिटकु ओळदुन, अदिक व्‍हार्या होट्‍ट बुट्‍टुन. 13 ईद नोळकु कि आव तान कपळा नान कय दा बिटकु व्‍हार्या ओळदुन, 14 आक सप्‍पा सेवकगोळी कारदुर अदिक अंदुर, “ईद नोळी, नान गांड ई इब्री मंळसा अक नान देखभाल माळोरसाटी ईट्‍यान लेकीन आव नानी खराब माळली नान हाती बंदुन आग ना चिळ्लासदीन. 15 अदिक नान धोळ्‍द आवाज केळकु आव तान कपळा नान हाती बिटकु ओळदुन, अदिक व्‍हार्या होट्‍ट बुट्‍टुन.”

16 अदिक आक आऊन कपळा आऊन स्वामी इन बरास ताका तान हाती ईटदुर. 17 तान गांड उन बंदुर मा आक हेळदुर कि : “नी या इब्री दास उक ईल तंद्या, आव नान अपमान माळोर साटी ईल बंदीदुन. 18 अदिक याग ना धोळ आवाज दा चिळ्लासदीन, आग आव तान कपळा नान हाती बिटकु व्‍हार्या ओळेदुन.”

19 तान हिंग्‍स उन ई मातगोळ केळकु कि नीन दास नान सांगुळ ईत्‍ता-ईत्‍ता क्‍याल्‍सा माळदुन, यूसुफ उन स्वामी इन कोप भळकुस्‍त. 20 अदिक यूसुफ उन स्वामी आऊक हुडुकु जेल दा, येल राजा अन कैदी बंद ईरोर, हाकसुस बुट्‍टुन; अत: आव आ बंदीगृह दा ईत्‍तुन.[b] 21 लेकीन यहोवा यूसुफ उन सांगुळ सांगुळ ईत्‍तुन, अदिक आऊन मा करूणा माळदुन, अदिक जेल इन दरोगा अन अनुग्रह अन नजर आऊन मा आत.[c] 22 इदुरसाटी जेल इन दरोगा आ सप्‍पा बंदीगोळी, जो कारागार दा ईरोर, यूसुफ उन कय दा सौप्स बुट्‍टुन; अदिक जो जो क्‍याल्‍सा आंदुर अल माळतोगोर, अद आऊन आग्‍या देल अच आगतोगोद. 23 यूसुफ उन वश दा जो येनारा ईरोद अदुर दा टु जेल इन दरोगा अक येनारा भी वस्‍तु नोळोद ईला बिळतोगोद; यतिकी यहोवा यूसुफ उन सांगुळ ईरोन; अदिक जो येनारा आव माळतोगोन, यहोवा आऊक अदुर दा सफलता कोळतोगोन.

<- उत्पत्ति 38उत्पत्ति 40 ->