1 येळवा वर्ष इन पाचवा तींगुळ इन हतवा दिशी इक इस्त्राएल इन यास हाळाबाट्टुर यहोवा से प्रश्न माळोरसाटी बंदुर, अदिक नान मुंद कुरतोदुर. 2 आग यहोवा अन ईद वचन नान हाती पोहचुस्त : 3 “हे मंळसा अन सन्तान, इस्त्राएली हाळाबाट्टुर से ईद अन, प्रभु यहोवा ईद अनतान, येन नीव नान से प्रश्न माळोरसाटी बंदीर? प्रभु यहोवा अन ईदा वाणी आद कि नान जीवन इन किर्या, नीव नान से प्रश्न माळ सकतीदील.” 4 हे मंळसा अन सन्तान, येन आंदुर्द न्याय माळ्या? आंदुर पुराना लॉकुर्द घिनोना क्याल्सा आंदरी हेळ कोम, 5 अदिक आंदुर से अन, प्रभु यहोवा ईद अनतान: या दिशी ना इस्त्राएलगोळ इक नीवळुस कोंडीन, अदिक याकूब उन घराना अन वंश से किर्या तिंदीन, अदिक मिस्त्र द्याश दा तान इक आंदुर मा प्रगट माळदीन, अदिक आंदुर से किर्‍या तिनकु अंदीन, ना नीवम परमेश्वर यहोवा हुईन, 6 अदा दिशी ना आंदुर से ईद भी किर्‍या तिंदीन, कि ना नीमी इक मिस्त्र द्याश टु तेगुकु ऊंद द्याश दा पोहुचासाईन, यदरी ना नीम साटी निवळुसीन; अद सप्पा द्याश इन शिरोमणी आद, अदिक अदुर दा हाल अदिक शयद इन धारागोळ वाहुसताव. 7 बाक ना आंदुर से अंदीन, या घिनोना वस्तुगोळ मा नीम दा टु हर ऊंद मंळसा अन कण्णगोळ हतकु आव, अवरी भीटबुळी; अदिक मिस्त्र अन मुरतीगोळ से तान इक अशुध्द माळबाळी; ना अच नीमव परमेश्वर यहोवा हुईन. 8 लेकीन आंदुर नान से बीगळुसेदुर अदिक नांद केळोद चाहासीदील; या घिनोना क्याल्सागोळ मा आंदुरव कण्ण हतकु ईरव, अवरी यारू भीटीदील, अदिक मिस्त्र अन मुरतीगोळी बीट्टुर. “आग ना अंदीन, ना ईल्या, मिस्त्र द्याश इन न्याड्या नीम मा तान जलजलाहट भळकुसाईन अदिक पुरा कोप तोर्साईन. 9 तरी भी ना तान हेसुर इन निम्मित हींग माळदीन कि यार न्याड्या आंदुर ईरोर, अदिक यार्द नोळतेला अच ना आंदरी मिस्त्र द्याश टु तेगोर साटी तान इक आंदुर मा प्रगट माळीदीन आ राज्यगोळ मुंद आंदुर अपवित्र ठहरूस बाळुल.”

10 ना आंदरी मिस्त्र द्याश टु तेगुकु आळी दा तंदीन. 11 अल आंदरी ना तान विधिगोळ हेळदीन अदिक तान नियम भी हेळदीन कि जो भी मंळसा अवरी मानस्यान, आव अऊर कारण जीत्ता ईत्तान. 12 बाक ना आंदुर साटी तान आराम दीनगोळ ठहरूसीदीन जो नान अदिक आंदुर न्याड्या चिन्ह ठहरूसुल; कि आंदुर जान्सुल कि ना यहोवा आंदुरव पवित्र माळावाळा हुईन. 13 तरी भी इस्त्राएल उन घराना आळी दा नान से झगळा माळदुर; आंदुर नान विधीगोळ मा नळदीदील, अदिक नान नियमगोळी बेकार जान्सदुर, यवरी अगर मंळसा मान्सुल रा आव अऊर कारण जीत्ता ईत्तान; अदिक आंदुर नान आराम दीनगोळी हापाळ अपवित्र माळदुर

“आग ना अंदीन, ना आळी दा ईंदुर मा तान जलजलाहट भळकुसकु ईंदुर्द अन्त माळ कोमाईन. 14 लेकीन ना तान हेसुर इन निम्मित हींग माळदीन कि आंदुर आ राज्यगोळ मुंद, यार्द नोळतेला ना आंदरी तेगुकु तंदीदीन, अपवित्र ठहरूस बाळुल. 15 बाक ना आळी दा आंदुर से किर्‍या तिंदीन कि जो द्याश ना आंदरी कोट्ट बुट्टीन, अदिक सप्पा द्याशगोळ्द शिरोमणी आद, यूर दा हाल अदिक शयद इन धारागोळ वाहुसताव, अल आंदरी पोहचुसतीदील, 16 यतिकी आंदुर नान नियम बेकार जान्सदुर अदिक नान विधिगोळ मा नळदीदील, अदिक नान आराम दीन इक अपवित्र माळीदुर; ईदुरसाटी कि आंदुर मन आंदुर मुर्तीगोळ दी हतकु ईरूल.”

17 तरी भी ना आंदुर मा कृपा दृष्टी माळदीन, अदिक आंदरी नष्ट माळीदील, अदिक न आळी दा पुरा रिती देल आंदुर्द अन्त माळ कोंडीन. 18 “बाक ना आळी दा आंदुर औलादगोळ से अंदीन, तान हाळाबाट्टुर्द विधीगोळ मा नळुबाळी, न आंदुर रितीगोळ मान्सी अदिक न आंदुर मुर्तीगोळ पुजा माळकु तान इक अशुध्द माळी. 19 ना नीमव परमेश्वर यहोवा हुईन, नान विधीगोळ मा नळी, अदिक नान नियमगोळी मान्सदुर दा चौकसी माळी, 20 अदिक नान आराम दीनगोळी पवित्र मान्सी कि आंदुर नान अदिक नीम न्याड्या चिन्ह ठहरूसुल, अदिक यदुर देल नीव जान्सी कि ना नीमव परमेश्वर यहोवा हुईन.”

21 लेकीन आंदुर सन्तान भी नान से झगळा माळदुर; आंदुर नान विधीगोळ मा नळदीदील, न नान नियमगोळी मान्सदुर दा चौकसी माळदुर; यवरी अगर मंळसा मानसुल रा आव अऊर कारण जीत्ता ईत्तान; नान आराम दीनगोळी आंदुर अपवित्र माळदुर.

“आग ना अंदीन, ना आळी दा आंदुर मा तान जलजलाहट भळकुसकु तान कोप तोर्साईन. 22 तरी भी ना कय जेडु कोंडीन, अदिक तान हेसुर इन निम्मित हिंग माळदीन, कि आ राज्यगोळ मुंद, यार्द नोळतेला ना आंदरी तेगुकु तंदिदीन, आंदुर अपवित्र ठहरूसबाळुल. 23 बाक ना आळी दा आंदुर से किर्‍या तिंदीन, कि ना नीमी राज्य राज्य दा तितर-बितर माळाईन, अदिक द्याश द्याश दा छितुस बुळाईन, 24 यतिकी आंदुर नान नियम मान्सीदील, नान विधीगोळी बेकार जान्सदुर, नान आराम दीनगोळी अपवित्र माळदुर, अदिक तान हाळाबाट्टुरगोळ्द मुर्तीगोळ दी आंदुरव कण्ण हतकु ईत्तव.”

25 बाक ना आंदुर साटी ईत्ता ईत्ता विधीगोळ ठहरूसदीन जो वळ्लेव ईला ईरव अदिक ईत्ता ईत्ता रितीगोळ यूर कारण आंदुर जीत्ता ईर सकालुर; 26 मतलब आंदुर तान पयला पार उक बेक्की दा होम माळली कुरतुर; ई रिती ना आंदरी आंदुर्द अच भेंट इन द्वारा अशुध्द माळदीन यदुर देल आंदरी निर्वंश माळ कोमाईन; अदिक आग आंदुर जान्स कोंडार कि ना यहोवा हुईन. 27 “हे मंळसा अन सन्तान, नी इस्त्राएल उन घराना से अन, प्रभु यहोवा ईद अनतान: नीम हाळाबाट्टुर ईदुर देल भी नांद निन्दा माळदुर कि आंदुर नान से विश्वासघात माळदुर. 28 यतिकी याग ना आंदरी आ द्याश दा पहुचुसदीन, यदरी आंदरी कोळोद किर्‍या ना आंदुर से तिंदीदीन, आग आंदुर हर ऊंद टीला अदिक हर ऊंद डाट मार्र मा नजर माळकु अल्या तान मेलबली येर्सली कुरतुर; अदिक अल्या रिस कोळावाळा तान भेंट येर्सली कुरतुर अदिक अल्या तान सुखदायक सुगन्ध द्रव्य होताकली कुरतुर, अदिक अल्या तान पेयबली कोळली कुरतुर. 29 आग ना आंदुर से केळदीन, या ऊचा जागा अक नीव लॉकुर होगतीर, अदुर देल येन प्रयोजन आद? ईदुर देल अच अदुर हेसुर ईंद ताका बामा कहलुसकु आगतद. 30 ईदुरसाटी इस्त्राएल उन घराना से अन, प्रभु यहोवा नीम से ईद केळतान: येन नीव भी तान पुर्वजगोळ रिती मा नळुकु अशुध्द आगकु, अदिक आंदुर घिनोना क्याल्सागोळ अनुसार व्यभिचारिणी इन घाई क्याल्सा माळतीर?” 31 ईंद ताका याग याग नीव तान भेटगोळ येर्सतीर अदिक तान चिकोर चिण्गेर इक होम माळकु बेक्की दा येर्सतीर, आग आग नीव तान मुर्तीगोळ कारण अशुध्द ठहरूसतीर. हे इस्त्राएल उन घराना, येन नीव नान इच्छा जान्स सकतीदील? प्रभु यहोवा अन ईदा वाणी आद, नान जीवन इन किर्या नीव नान इच्छा जान्स सकतीदील.

32 जो मात नीम मन दा बरतद, नाव काठ अदिक कल्ल इन उपासक आगकु जाती जाती अदिक द्याश द्याश इन कुलगोळ घाई आगेदेव, अद यातोदु प्रकार देल पुरा आगतीदील.

33 “प्रभु यहोवा ईद अनतान, नान जीवन इन किर्या ना सही दा ताकतवर कय अदिक वाळुस्द कय देल, अदिक भळकुस्द जलजलाहट इन सांगुळ नीम म्याकुच राज्य माळाईन. 34 ना बली कय अदिक वाळुस्द भुजा देल अदिक भळकुस्द जलजलाहट इन सांगुळ नीमी द्याश द्याश इन लॉकुर दा टु अलग माळाईन, अदिक आ द्याशगोळ दा यदुर दा नीव तीतर-बितर आगेगीदीर, जमा माळाईन; 35 अदिक ना नीमी द्याश द्याश इन लॉकुर्द आळी दा वोतकु, अल आमने सामने नीम से मुकदमा आळाईन.” 36 या प्रकार ना नीम पूर्वजगोळ से मिस्त्र द्याशरूपी आळी दा मुकदमा आळ तोगीन, अदा प्रकार नीम से मुकदमा आळाईन, प्रभु यहोवा अन ईदा वाणी आद.

37 ना नीमी लाठी इन ल्यालमा नळसाईन, अदिक नीमी वादा अन बंधन दा हाकाईन; 38 ना नीम दा टु सप्पा झगळा माळावाळेर इक तेगुकु, जो नान अपराध माळतार, नीमी शुद्ध माळाईन, अदिक याता द्याश दा आंदुर टिक्सतार अदुर दा टु ना आंदरी तेगु कोमाईन; लेकीन इस्त्राएल इन द्याश दा होग गोळालीन; आग नीव जान्स कोंडीर कि ना यहोवा हुईन.

39 “हे इस्त्राएल उन घराना नीम से रा प्रभु यहोवा ईद अनतान: होगकु तान तान मुरतीगोळ्द उपासना माळी; अदिक अगर नीव नांद केळतीदील, रा मुंद भी ईदा माळतोगी; लेकीन नान पवित्र हेसुर इन तान भेटगोळ अदिक मुर्तीगोळ द्वारा बाक अपवित्र माळबाळेतीर.

40 “यतिकी प्रभु यहोवा अन ईदा वाणी आद कि इस्त्राएल उन सप्पा घराना तान द्याश दा नान पवित्र पहाळी मा, इस्त्राएल इन ऊँचा पहाळी मा, सप्पा च्या सप्पा नान उपासना माळीर; अल्या ना आंदुर से खुश आगाईन, अदिक अल्या ना नीम्द नेग्द भेंटगोळ अदिक येर्सदव वळ्लीद वळ्लीद वस्तुगोळ, अदिक नीम्द सप्पा पवित्र माळ्द वस्तुगोळ नीम से ताकोम तोगाईन. 41 याग ना नीमी द्याश द्याश इन लॉकुर से अलग माळाईन अदिक आ द्याशगोळ से यदुर दा नीव तीतर-बितर आगीर, जमा माळाईन, आग नीमी सुखदायक सुगन्ध जान्सकु ग्रहण माळाईन, अदिक अन्य राज्यगोळ मुंद नीम द्वारा पवित्र ठहरूसकु आगाईन. 42 याग ना नीमी इस्त्राएल इन द्याश दा पोहचुसाईन, यदुर कोळोद किर्‍या ना नीम पूर्वजगोळ से तिंदीदीन, आग नीव जान्स कोंडीर कि ना यहोवा हुईन. 43 अल नीव तान चाल चलन अदिक तान सप्पा क्याल्सागोळी यदुर माळदुर देल नीव अशुध्द आगीर याद माळीर, अदिक तान सप्पा बुरा क्याल्सागोळ कारण तान नजर दा घिनौना ठहरूसीर. 44 हे इस्त्राएल उन घराना, याग ना नीम सांगुळ बुरा चालचलन अदिक बिगळुसदव क्याल्सागोळ अनुसार ईला, लेकीन तान अच हेसुर निम्मित बर्ताव माळाईन, आग नीव जान्स कोंडीर कि ना यहोवा हुईन, प्रभु यहोवा अन ईदा वाणी आद.”

45 यहोवा अन ईद वचन नान हाती पोहचुस्त: 46 “हे मंळसा अन सन्तान, तान बाय दक्षिण इन दी माळ, दक्षिण इन दी वचन केळ्स, अदिक दक्षिण द्याश इन आळी इन बारा दा भविष्यवाणी माळ; 47 अदिक दक्षिण द्याश इन आळी से अन; यहोवा अन ईद वचन केळ: प्रभु यहोवा ईद अनतान, ना नीन दा बेक्की हचाईन, अदिक नीन दा येन हिवरा, येन वंळ्गेव, यास मार्रगोळ आव, सप्पा अक अद भस्म माळीत; अदुर धधकुसतेला ज्वाला नुनुतीदील, अदिक अदुर कारण दक्षिण टु उत्तर ताका सप्पा अन बाय झुलसेदव. 48 आग सप्पा प्राणी जान्स कोंडव कि ईद बेक्की यहोवा अन हच्द हुन; अदिक अद यागलु नुनुतीदील.” 49 आग ना अंदीन, “हाय परमेश्वर यहोवा! लॉकुर रा नान बारा अन तोगतार कि येन अद दृष्टान्त अच इन अनावाळा आलच?”

<- यहेजकेल 19यहेजकेल 21 ->