सभोपदेशक

सभोपदेशक
परिचय
सभोपदेशक ऊंद हींग किताब आद जो जीवन इन साटी ग्यान कल्सतद. किताब इन साटी हिब्रू शीर्षक इन मतलब आद “अद जो लॉकुरी जमा माळतद.” हापाळ सा विद्वानगोळ मान्सतार कि राजा सुलैमान सभोपदेशक किताब इन लेखक ईरोन, लेखक दुसरा लॉकुर ईदुर देल सहमत हैलेच. अगर ईव सुलैमान ईरोन याव किताब लिख्सीदुन, रा ईद लगभग 970-931 ई. स. पयले लिख्सकु आगीत, जो कि आ समय इन मात हुन याग आव जित्ता ईरोन. दुसरा विद्वानगोळ मान्सतार कि ईदरी यावारा दुसरा लिखस्यान, यतिकी हापाळ घन राजा अन बजाय सेवक उन भाषा अन उपयोग माळकु आग्याद. सभोपदेशक 5:8-9 आ विद्वानगोळ मान्सतार कि सभोपदेशक इन किताब सुलैमान उन समय टु हापाळ बाद्दा लिख्सकु आगीत, शायद 400 अदिक 200 ई. स. पयले अन न्याड्या
सभोपदेशक इन किताब ईद अनकु सुरू माळतार कि सप्पा येनारा ऊंद श्वास इन घाई आद जो जल्दी गायब आगेतद. 1:2 इदुर मतलब आद कि नाम्द जीवन अदिक नाम्द क्याल्सा अस्थायी आद अदिक इदरी समसोद मुश्किल आद. इदुर हापाळ येनारा थ्वाळासा समय इन बाद्दा मार्तकु आदीत. इदुर हापाळ येनारा नाम नियंत्रण इन व्हार्या आद. जीवन ह्यांग आद हांगा स्वीकार माळोद अदिक जो नीम हात्ती आद अदुर दा खुश ईरोद वळ्लीद आद. 9:9 जीवन इन सप्पा परेशानीगोळ अदिक खुशीगोळ मा विचार माळतेला, किताब इन सारांश परमेश्वर उन अंज्क मानसोद अदिक आऊन आग्यागोळ्द पालन माळोद आद. 12:13 ईदा सबसे महत्त्वपुर्ण मात आद.
रूपरेखा
किताब इन लेखक अदिक अदुर येनारा जीवन इन अनुभवगोळ्द परिचय कोटकु आग्याद. 1:1-11
जीवन इन मतलब मा चर्चा माळकु आग्याद. 1:12–6:9
शिक्षक उन सलाह कोटकु आग्याद. 6:10–12:8
किताब इक ईद अनकु समाप्त माळकु आग्याद कि जीवन इन सप्पा उद्देश परमेश्वर उन अंज्क मानसोद अदिक आऊन आग्यागोळ्द पालन माळोद आद. 12:9-14

जीवन बेकार आद

1 यरूशलेम इन राजा, दाऊद उन पार सभा-उपदेशक उन प्रवचन. 2 उपदेशक ईद अनतान: सप्पा बेकार आद, सप्पा बेकार आद; सप्पा येनारा बेकार आद! 3 जो मेहनत मंळसा ई धरती मा माळतान, आऊक अदुर देल येन प्राप्त आगतद? 4 ऊंद पीढ़ी होगतद, अदिक दुसरा पीढ़ी बरतद, लेकीन पृथ्वी हांग च्या हांगा सदा ईरतद. 5 सूर्य होळतद, अद मुळ्कतद, अदिक अद जल्दी से आ जागा अक वापस होगतद यल टु अद होळतद. 6 हवा दक्षिण दिशा इन दी वाहुस्तद, अदिक तिर्गकु उत्तर दा होट बरतद, अदिक हिंग अद हमेशा तान जागा दा चक्कर हचतद, हवा तान जागा अन परिक्रमा माळतद. 7 सप्पा गांगागोळ समुद्र दा मिलुसताव, लेकीन समुद्र यागलु तुमाल्द. गांगागोळ तान उगम जागा टु मात्त वाहुसताव. 8 सप्पा मातगोळ थकुसावाळा आव, मंळसा अऊर्द वर्णन माळ सकालुन. कण्णगोळ नोळकु भी तृप्त आगालव, अदिक किवगोळ केळकु भी संतुष्ट आगालव. 9 जो मात आगेग्याद अद मात आदीत; जो बनसेग्याद अद मात बनसीत; ई धरती मा[a] येनु भी व्हाशोद हैलेच. 10 येन पृथ्वी मा हिंग येनारा आद, अदुर बारा दा ईद अनकु आग सकुल, “नोळी, ईद व्हाशोद मात आद?” लेकीन अद नाम से हापाळ पयला टु आगतेला बरेत्याद. 11 हाळोद समय मातगोळ्द येनु याद ईतीदील, अदिक आगावाळा मातगोळ्द भी याद आंदुर बाद्दा बराबाळेर इक ईरतीदील.

बुद्धि बेकार आद

12 ना सभोपदेशक[b], इस्त्राएल द्याश इन राजा ईरीन अदिक यरूशलेम नगर दा शासन माळीन. 13 ई धरती मा जो आगतद, बुद्धि देल अदुर्द खोजबीन माळली अदिक अदुर्द भेद समझुसोर साटी ना तान मन हचदीन. ईद ऊंद दुख इन क्याल्सा हुन, यारी परमेश्वर मंळसागोळ इक ईदा क्याल्सा दा व्यस्त ईरोर साटी सौपस्यान. 14 जो येनारा सूर्य अन ल्यालमा धरती मा आगतद, अद सप्पा ना नोळदीन. नानी अनुभव आत कि ईद सप्पा बेकार आद ईद मान्सी हवा अक हुडोद आद. 15 जो बदमाश आन, आव सरका आग सकालुन, अदिक जो हई हैलेच, आव आळुकु आग सकालुन. 16 ना तान दिल से अंदीन, “नोळ, नी हापाळ ग्यान हासील माळकोंड, ईट कि नीन ग्यान आ सप्पा से वाळुसेग्याद, जो नीन से पयले यरूशलेम दा आगीदुर. नीन इक हापाळ बुद्धि अदिक ग्यान इन अनुभव आगेग्याद.” 17 अत: ना तान मन ईद जानसुर दा हचदीन कि बुद्धि येन हुन, पागलपन अदिक मूर्खता येन हुन. आग नान इक मालुम आत कि ईद भी हवा अक हुडोद हुन. 18 यतिकी येक्‍कुल बुद्धि येक्कुल दुख इन जननी आद. ग्यान वाळुसावाळा तान दुखगोळी भी वाळुसतान.

सभोपदेशक 2 ->