1 नबूकदनेस्सर राजा व्हान्ना अन्द ऊंद धोळ्द मूर्ति माळसुसदुन. अदुर्द ऊंचाई साठ कय, अदिक चौड़ाई आर कय इन ईरोद. आव अद मूर्ति इक बेबीलोन द्याश इन दूरा हेसुर इन मैदान दा स्‍थापित माळदुन. 2 अदुर बाद्दा आव तान साम्राज्‍य इन सप्पा प्रदेशगोळ्द अधिपतीगोळ, हाकिमगोळ, राज्‍यपालगोळ, मंत्रीगोळ, खजांचिगोळ, न्‍यायाधीशगोळ, दंडाधिकारीगोळ अदिक प्रदेशगोळ्द सप्पा उच्चधिकारीगोळ्द हात्ती बातणी कळुदुन कि आंदुर महाराज नबूकदनेस्सर उन द्वारा स्‍थापित स्‍वर्ण-मूर्ति इन प्रतिष्‍ठान अन्द मौका मा हाजिर ईरूल. 3 आग सम्राट उन आदेशानुसार बेबीलोन साम्राज्‍य इन सप्पा प्रदेश इन अधिपती, हाकिम, राज्‍यपाल, मंत्री, खजांची, न्‍यायाधीश, दंडाधिकारी अदिक अन्य उच्चधिकारी तान राजा नबूकदनेस्सर उन द्वारा स्‍थापित स्‍वर्ण-मूर्ति इन प्रतिष्‍ठान हाब्‍ब मा उपस्‍थित आगोद उद्देश्‍य देल जमा आदुर. आंदुर मूर्ति इन मुंद नीदुरदुर.

4 “आग घोषणा माळावाळा उद्घोषक ऊंचा दण देल अंदुन, हे द्याश द्याश अदिक राज्य राज्य इन लॉकुरा, अदिक अलग अलग भाषा अन्द माताळावाळेर, नीम इक ईद आग्या केळ्‍सकु आगेत्याद कि, 5 कि या पल नीव नरसिंग, पाऊल, वीणा, तारवाळा वाजा, सितार, शहनाई अदिक अन्य सप्पा प्रकार इन वाद्य-यंत्रगोळ्द स्‍वर केळीर, आग नीव अदा क्षण राजा नबूकदनेस्सर उन द्वारा स्‍थापित स्‍वर्ण-मूर्ति इन मुंद बिदकु अदुर्द सम्मान माळेतीर. 6 जो मंळसा मूर्ति इन बिदकु अदुर्द सम्मान माळालुन, आव अदा पल धधकुस्तेला बेक्की इन भट्ठी दा भिटकु आदान.”

7 अत: विश्‍व अन्द अलग अलग कौमगोळा, राष्‍ट्रगोळा अदिक भाषा अन्द लॉकुरा हिंग अच माळदुर. आंदुर या क्षण नरसिंगे, पाऊल, वीणा, तारवाळा वाजा, सितार, शहनाई अदिक अन्य सप्पा प्रकार इन वाद्ययंत्रगोळ्द स्‍वर केळदुर, आंदुर तुंरत राजा नबूकदनेस्सर उन द्वारा स्‍थापित स्‍वर्ण-मूर्ति इन मुंद बिद्दुर, अदिक हिंग आंदुर मूर्ति इन प्रति सम्‍मान प्रकट माळदुर.

8 लेकीन अदा समय येनारा कसदी लॉकुर राजा नबूकदनेस्सर उन हात्ती होदुर, अदिक आंदुर यहूदीगोळ्द प्रति द्वेष इन कारण राजा से आंदुर्द चुगली हचदुर. 9 आंदुर नबूकदनेस्सर राजा से अंदुर, नी हमेशा जीत्ता ईर! 10 महाराज, नी राज आग्या कोटीद कि हर ऊंद मंळसा नरसिंग, पाऊल, वीणा, तारवाळा वाजा, सितार, शहनाई अदिक अन्य सप्पा प्रकार इन वाद्ययंत्रगोळ्द स्‍वर केळतेला अच स्‍वर्ण-मूर्ति इन मुंद बिदकु अदरी प्रणाम माळुल; 11 अदिक जो मंळसा मूर्ति इन मुंद बिदकु अदरी प्रणाम ईला माळ्यान, आव धधकुस्तेला बेक्की इन भट्ठी दा भिटकु आदान. 12 महाराज, नी जो यहूदीगोळ इक बेबीलोन द्याश इन राजकीय क्याल्सागोळ्द व्यवस्था माळोर साटी नियुक्‍त माळ्द, आंदुर नीन आदेशगोळ्द पालन माळालुर. ईव आंदुर हेसुर आव : शद्रक, मेशक अदिक अबेदनगो. आदुर नीन उपेक्षा माळतार. महाराज, आंदुर न रा नीन द्यावगोळ्द स्यावा-आराधना माळतार, अदिक न नीन द्वारा स्‍थापित स्‍वर्ण-मूर्ति इन प्रति सम्‍मान प्रकट माळतार.

13 ईद केळतेला अच नबूकदनेस्सर राजा अन सिट्ट भळकुस्त. आव गुस्सा दा बंदकु आदेश कोट्टुन कि शद्रक, मेशक अदिक अबेदनगो उक पेश माळकु आगुल. सैनिकगोळ मुरू मंळसागोळ इक राजा अन्द मुंद हाजिर माळदुर. 14 नबूकदनेस्सर राजा आंदुर से केळदुन, “शद्रक, मेशक अदिक अबेदनगो, येन ईद खरा आद कि नीव नान द्यावगोळ्द स्यावा-आराधना माळालीर, अदिक नान द्वारा स्‍थापित स्‍वर्ण-मूर्ति इक प्रणाम माळालीर? 15 ईग अगर नीव नरसिंग, पाऊल, वीणा, तारवाळा वाजा, सितार, शहनाई अदिक अन्य सप्पा प्रकार इन वाद्यगोळ्द स्‍वर केळकु नान द्वारा स्‍थापित मूर्ति इन मुंद बिदकु अदरी प्रणाम माळली तयार आईर, रा ठीक आद; नीम्द नुकसान आगाल्द. लेकीन अगर नीव मूर्ति इक प्रणाम माळालीर, रा नीव बिना देरी देल धधकुस्तेला बेक्की इन भट्ठी दा भिटकु आदीर. आग ना नोळाईन कि याता ईश्‍वर नीमी नान कय देल ऊळस्यान?”

16 शद्रक, मेशक अदिक अबेदनगो राजा अक उत्तर कोट्टुन, “हे नबूकदनेस्सर, ई संबंध दा नाव उत्तर कोळोद जरूरी समसालेव. 17 अगर नान सांगुळ हिंग व्‍यवहार माळकु आदीत, रा नाव या परमेश्‍वर उन स्यावा-आराधना माळतेव, आव नामी धधकुस्तेला बेक्की इन भट्ठी दा टु भी बिळ्स सकतान. 18 महाराज, अगर नी नामी धधकुस्तेला बेक्की इन भट्ठी दा हाक्या या ईला भी हाक्या, तरी भी नाव नीन द्यावगोळ्द स्यावा-आराधना माळालेव, अदिक नीन द्वारा स्‍थापित स्‍वर्ण-मूर्ति इन मुंद बांगकु अदरी प्रणाम माळालेव.”

19 नबूकदनेस्सर गुस्सा देल तुमेदुन. आऊन मार्रा अन्द रंग बदलुसेत. आऊन गुस्सा शद्रक, मेशक अदिक अबेदनगो अन्द प्रति भळकुसेत. आव आदेश कोट्टुन कि भट्ठी इन बेक्की येळ गुणा यक्कुल तेज माळकु आगुल. 20 तुरंत बाद्दा आव तान सेना अन्द येनारा बलवान योध्दागोळ इक आदेश कोट्टुन कि आंदुर शद्रक, मेशक अदिक अबेदनगो अक कटकु धधकुस्तेला बेक्की इन भट्ठी दा भिट्ट बुळुल.

बलवान योध्दागोळ हिंग अच माळदुर. 21 आंदुर ई मुरू मंळसागोळ इक आंदुर्द पयजामागोळ, अंगरखगोळ, पगळीगोळ अदिक अन्य कपळागोळ सांगुळ कटबुट्टुर अदिक आंदरी धधकुस्तेला बेक्की इन भट्टी दा भिट्ट बुट्टुर.

22 राजा अन कठोर आग्या अन्द कारण भट्ठी इन आंच यक्कुल तेज माळकु आत. भट्ठी यक्कुल होतोद. अदुर दा टु लपटागोळ होळव. अदिक या लॉकुर शद्रक, मेशक अदिक अबेदनगो अक भट्ठी दा भिळोर साटी नेगदुर, आंदरी भट्ठी इन लपटागोळ भस्म माळ बुट्टव, 23 अदिक इंदुर मुरू मंळसागोळ−शद्रक, मेशक अदिक अबेदनगो कट-मटकु आ धधकुस्तेला बेक्की इन भट्ठी दा बिदोदुर.

24 राजा नबूकदनेस्सर उक आश्‍चर्य आत. आव तुरंत येद्दुन. आव तान मंत्रीगोळ से केळदुन, “येन नाव मुर अच मंळसागोळ इक भट्ठी दा हाकदेव?” आंदुर राजा अक उत्तर कोट्टुर, “हाव, महाराज खरा मात हुन.” 25 राजा अंदुन, लेकीन ना नाक मंळसागोळ इक बेक्की इन म्याकुच नळुतेला-वयाळतेला नोळेतीन. आंदुर कटकु आर. आंदुर्द मय ऊंद भी होत्तीदील. चौथा मंळसा अन्द रूप ईश्वर उन दूत उन घाई आद.

26 नबूकदनेस्सर धधकुस्तेला बेक्की इन भट्ठी इन द्वार इन हात्ती बंदुन. आव कारदुन, “हे सर्वोच्‍च परमेश्‍वर उन सेवकगोळा−शद्रक, मेशक अदिक अबेदनगो, व्हार्या होळी, ईल बरी!”

अत: शद्रक, मेशक अदिक अबेदनगो बेक्की टु व्हार्या होटकु बंदुर. 27 अधिपती, हाकिम, राज्‍यपाल अदिक राज-मंत्री जमा आगेदुर. आंदुर नोळदुर कि मुरू मंळसागोळ्द मय मा बेक्की इन येनु भी प्रभाव बिदिदील. आंदुर्द ताल्ला अन्द ऊंद चुट्टी भी होत्तीदील, आंदुरव पयजामागोळ हांग च्या हांग ईरव. आंदुर मय टु होतोद सुंगध ताका ईला बरोद.

28 नबूकदनेस्सर अंदुन, “धन्‍य आन शद्रक, मेशक अदिक अबेदनगो उन परमेश्‍वर, जो दूत कळुकु तान विश्वास योग्य सेवकगोळ इक ऊळ्सदुन, जो नान राज आग्या अन्द उपेक्षा माळदुर, अदिक तान मय बेक्की इक अर्पण माळ बुट्टुर कि आंदुर यातोवारा अन्य द्यावगोळ्द आराधना माळबाळुल केवल तान अच परमेश्‍वर उन आराधना माळुल. 29 इदुरसाटी ना ईद राज आग्या प्रसारित माळतीन: अगर यातोवारा भी अगर राज्य, राष्ट्र अदिक भाषा अन्द मंळसा शद्रक, मेशक अदिक अबेदनगो अन परमेश्‍वर उन विरूद्ध येनारा अंदान, रा आऊन मय इन तुकळा-तुकळा माळकु आदाव, अदिक आऊन मान्ना खंडर माळकु आदीत; यतिकी आंदुर परमेश्‍वर उन अलावा अदिक याऊ ईश्‍वर हैलेच जो ई ढंग देल तान सेवकगोळ इक ऊळ्स सक्यान.”

30 आग राजा नबूकदनेस्सर बेबीलोन द्याश दा शद्रक, मेशक अदिक अबेदनगो अन्द पद मात ऊँचा माळदुन.

<- दानिय्येल 2दानिय्येल 4 ->