1 शाऊल जो ईगासताका प्रभु अन्द चेलागोळी धमकुसोद अदिक कोंद बुळोद धुन दा ईरोन, महायाजक उन हात्‍ती होदुन 2 अदिक आऊन से दमिश्क इन सभागृहगोळ दा हेसुर मा ई अभिप्राय इन चिट्ठी गोळी बेळदुन कि येन गंळ्स येन आर्त, यारी आव ई पंथ मा नोळ्यार आंदरी कटकु यरूशलेम तरूल.

3 लेकीन नळुत नळुत याग आव दमिश्क इन हात्‍ती पोहचुसदुन, रा अचानक आकाश टु आऊंद नाकु दी ज्योति चमकुस्त, 4 अदिक आव जमीन मा बिद्दुन अदिक ईद शब्द केळदुन, “हे शाऊल, हे शाऊल, नी नानी येती सतुसेत्या?”

5 शाऊल केळदुन, “हे प्रभु, नी याव हुय?”

आव अंदुन, “ना यीशु हुईन, यारी नी सतुसेत्या. 6 लेकीन ईग यदकु नगर दा होग, अदिक जो नीनी माळोद आद अद नीन से अंदकु आदीत.”

7 जो मंळसागोळ आऊन सांगुळ ईरोर, आंदुर सट्ट ईतोदुर; यतिकी शब्द रा केळ बरतोगोद लेकीन याऊ कांळ्सतोगोन ईला. 8 आग शाऊल भूमी मा टु येद्दुन, लेकीन याग कण्णगोळी तेरदुन रा आऊक येनु कांळ्सीदील, अदिक आंदुर आऊन कय हुडुकु दमिश्क नगर दा ओतुर. 9 आव मुर दिन ताका नोळ सकिदील, अदिक ना तिंदुन अदिक ना कुळदुन.

10 दमिश्क दा हनन्याह हेसुर इन ऊंद चेला ईरोन, आऊन से प्रभु दर्शन दा अंदुन, “हे हनन्याह!”

आव अंदुन, “प्रभु, ना हुईन.”

11 आग प्रभु आऊन से अंदुन, “यदकु आ गली दा होग जो ‘सरका’ कहलुसतद, अदिक यहूदा अन्द मान्ना दा शाऊल हेसुर इन ऊंद तरसुसवासी इक केळ; नोळ, आव प्रार्थना माळेत्यान, 12 अदिक आव हनन्याह हेसुर इन ऊंद मंळसा अक बुळ्क बर्त अदिक तान म्याकुच कय ईटतेला उदाहरण दा नोळदुन; ताकी दुबारा नोळ सकुल.”

13 हनन्याह उत्‍तर कोट्टुन, “हे प्रभु, ना ई मंळसा अन्द बारा दा हापाळ मुंदुर से केळीन कि ईव यरूशलेम दा नीन पवित्र लॉकुर सांगुळ धोळ्द-धोळ्द बुराईगोळ माळ्यान; 14 अदिक ईल भी ईऊक प्रधान याजकगोळ्द दी टु अधिकार सिक्याद कि जो लॉकुर नीन हेसुर ताकोमतार, आ सप्पा मुंदरी कटबुळ.”

15 लेकीन प्रभु आऊन से अंदुन, “नी होटोग; यतिकी आव रा गैरयहूदीगोळी अदिक राजागोळी अदिक इस्त्राएलीगोळ्द मुंद नान हेसुर प्रगट माळोर साटी नान नीवळुस्द पात्र हुन. 16 अदिक ना आऊक हेळाईन कि नान हेसुर इन साटी आऊक ह्यांग-ह्यांग दुख नेगोद बिद्दीत.”

17 आग हनन्याह यदकु आ मान्ना दा होदुन, अदिक आऊन मा तान कय ईटकु अंदुन, “हे वार्ट शाऊल, प्रभु, मतलब यीशु, जो आ हादी मा, याता हादी देल नी बंद्या नीनी कांळ्सीदुन, आवा नानी कळ्यान कि नीनी मात्‍त कण्णगोळ देल कांळ्सुल अदिक नी पवित्र आत्मा देल परिपुर्ण आगेगुल.” 18 अदिक तुरन्त आऊन कण्णगोळ दा टु छिलका घाई बित्‍त अदिक आव नोळली कुरतुन, अदिक यदकु बपतिस्मा ताकोंडुन; 19 बाक भोजन माळकु आऊक आऊंद ताकत वापस सिक्त.

शाऊल हापाळ दिन ताका आ चेलागोळ्द सांगुळ ईत्‍तुन जो दमिश्क दा ईरोर. 20 अदिक आव तुरन्त यहूदी लॉकुर्द सभागृहगोळ दा यीशु उन प्रचार माळली कुरतुन कि आव परमेश्वर उन पार हुन.

21 सप्पा केळावाळेर चकित आगकु अनली कुरतुर, “येन ईव आवा मंळसा आल्लच जो यरूशलेम दा आंदरी जो यीशु उन उपासना माळावाळेर इक, नाश माळतोगोन; अदिक ईल भी इदुरसाटी बंदीदुन कि आंदरी कटकु प्रधान याजकगोळ्द हात्‍ती तरूल?”

22 लेकीन शाऊल मात्‍त ताकतवर आगतेला होदुन, अदिक ई मात इन प्रमाण कोट कोटकु कि मसीह ईवा हुन, दमिश्क इन ईरावाळेर यहूदीगोळी आश्चर्य चकित माळ्त ईत्‍तुन.

23 ✡२ कुरिन्थि ११:३२,३३याग हापाळ दिन बितसेदव, रा यहूदीगोळ मिलुसकु आऊक कोंद बुळोद साजीश रचुसदुर. 24 लेकीन आंदुर्द साजीश शाऊल उक मालूम नळदोत. आंदुर रा आऊक कोन्नोर साटी ईळ्लक हागुल नगर इन फाटकगोळ मा तयार ईरतोगोर. 25 लेकीन ईळ्लकी आऊन चेलागोळ आऊक फुट्टी दा कुर्सदुर, अदिक दिवार इन ख्वादरा दा टु हिलगुकसकु ईळ्स बुटुर.

26 यरूशलेम दा पोहचुस्कु शाऊल चेलागोळ सांगुळ मिलुसोद कोशिश माळदुन; लेकीन सप्पा आऊन से अंजतोगोर, यतिकी आंदरी विश्वास ईला आगतोगोद, कि आव भी चेला हुन. 27 लेकीन बरनबास आऊक तान सांगुळ प्रेरितगोळ हात्‍ती ओतकु आंदरी हेळदुन कि ईव याता रीति देल हादी मा प्रभु उक नोळदुन, अदिक आव ईऊन से मातगोळी हेळदुन; बाक दमिश्क दा ईव ह्यांग हिम्मत देल यीशु उन हेसुर देल प्रचार माळदुन. 28 आव आंदुर सांगुळ यरूशलेम दा होग्त बर्त अदिक पुरा हिम्मत देल प्रभु उन हेसुर इन प्रचार माळली कुरतुन. 29 अदिक गैरयहूदी भाषा माताळावाळेर यहूदीगोळ्द सांगुळ मातचीत अदिक झगळा माळतोगोन; लेकीन आंदुर आऊक कोंद बुळोद कोशिश माळली कुरतुर. 30 ईद जान्सकु वार्टुर आऊक कैसरिया बंदरगाह दा तंदुर, अदिक तरसुस नगर इक कळु बुटुर.

31 ई प्रकार सप्पा यहूदिया, गलील, अदिक सामरीया दा मंडली अक शांती सिक्त, अदिक अदुर्द उन्नती आग्त ईत्‍त; अदिक अद प्रभु उन अंज्क अदिक पवित्र आत्मा अन्द शांती दा नळुत अदिक वाळुस्त ईत्‍त.

32 बाक हिंग आत कि पतरस हर जागा टेटाळतेला, परमेश्वर उन पवित्र लॉकुर हात्‍ती भी पोहचुसदुन जो लुद्दा नगर दा ईरतोगोर. 33 अल आऊक एनियास हेसुर इन लकवा अन्द ऊंद रोगी मंळसा सिकदुन, जो येठ्ठ वर्ष टु व्हर्स मा बिदकु ईरोन. 34 पतरस आऊन से अंदुन, “हे एनियास! यीशु मसीह नीनी चंगा माळतान. येळ, तान हासक्या नेगु.” आग आव तुरन्त यदकु निदुरदुन. 35 आग लुद्दा अदिक शारोन इन सप्पा ईरावाळेर आऊक नोळकु प्रभु उन दी तिर्गदुर.

36 याफा दा तबीता गैरयहूदी दा दोरकास मतलब हिरण हेसुर इनोर ऊंद विश्वासिनी ईरतोगोर. आक हापाळ सा वळ्लेव क्याल्सा अदिक दान माळतोगोर. 37 अवा दिनगोळ दा आक बिमार आगकु सोतोदुर; अदिक आंदुर आकिन मय तोळ्सकु म्याकुच इन कमरा दा ईट बुटुर. 38 इदुरसाटी कि लुद्दा याफा अन हात्‍ती ईरोद, चेलागोळ ईद केळकु कि पतरस अल आन, येढ्ढ मंळसा कळुकु आऊन से विनती माळदुर, “नाम हाती बरोर साटी देर माळबाळ.” 39 आग पतरस यदकु आंदुर सांगुळ आगेदुन, अदिक याग आव पोहचुसदुन रा आंदुर आऊक आ अटारी म्याकुच मा ओतुर. सप्पा रांड्यागितेर वर्लतेला आऊन हात्‍ती बंदकु निदुरदुर, अदिक जो कुळता गोळ अदिक कपळागोळ दोरकास याग आक जित्‍ता ईरोर आंदुर सांगुळ ईरतेला माळीदुर, तोर्सली कुरतुर. 40 आग पतरस सप्पा मुंदरी व्हार्या माळ बुटुन, अदिक ट्वांगरा टेक्सकु प्रार्थना माळदुन अदिक लाश इन दी तिर्गकु नोळदुन अदिक अंदुन, “हे तबीता, येळ.” आग आक तान कण्णगोळी तेरदुर; अदिक पतरस उक नोळकु यदकु कुरतुर. 41 आव कय कोटकु आकी नेगदुन, अदिक परमेश्वर उन पवित्र लॉकुर अदिक रांड्यागितेर इक कारूकु आकी जित्‍ता तोर्स बुटुन. 42 ईद मात सप्पा याफा दा फैलुसेत; अदिक हापाळ सा लॉकुर प्रभु मा विश्वास माळदुर. 43 अदिक पतरस याफा दा शमौन हेसुर इन यावारा तोगुल इन धंदा माळावाळा अन्द मान्या हापाळ दिन ताका ईत्‍तुन.

<- प्रेरितगोळ 8प्रेरितगोळ 10 ->