1 [a]ईग हे वार्टुरा अदिक आकतींगेरा, नाव नीमी परमेश्वर उन अनुग्रह जो मकिदुनिया नगर इन मंडलीगोळ मा आत नाव चाहासतेव कि नीमी मालूम नळुल. 2 कि क्लेश इन धोळ्द परीक्षा दा आंदुर्द धोळ्द खुशी अदिक भारी कंगालपन दा आंदुर उदारता हापाळ वाळुसेत. 3 आंदुर बारा दा नान ईद गवाही आद कि आंदुर तान सामर्थ्य तुमकु उलटा सामर्थ्य से भी व्हार्या, मन देल कोटार. 4 अदिक ई दान दा अदिक यहूदीगोळ्द परमेश्वर उन पवित्र लॉकुर्द स्यावा दा सहभागी आगोद अनुग्रह अन्द बारा दा, नाम से घळी-घळी हापाळ विनती माळदुर, 5 अदिक ह्यांग नाव आशा माळीदेव, हांग अच ईला उलटा आंदुर प्रभु उक बाक परमेश्वर उन इच्छा देल नामी भी तान तान इक कोट बुट्टुर. 6 इदुरसाटी नाव तीतुस से विनती माळीदेव कि ह्यांग आव पयले सुरूवात माळीदुन, हांग अच नीम न्याड्या दा ई दान कोळोद कृपा अन्द क्याल्सा अक लगातार पुरा माळुल. 7 इदुरसाटी ह्यांग नीव सप्पा मात दा मतलब विश्वास, वचन, ग्यान अदिक सप्पा प्रकार इन कोशिश दा, अदिक आ प्यार दा जो नाम से ईटतीर, वाळुस्त होगतीर, हांग अच ई दान इन कृपा अन्द क्याल्सा दा भी वाळुस्त होगी.

8 ना आग्या अन्द रीति मा रा ईला, लेकीन दुसरा लॉकुर्द तोर्सद उत्साह देल नीम प्यार इन सच्चाई इक परखुसोर साटी अनतीन. 9 नीव नाम प्रभु यीशु मसीह अन अनुग्रह अरूतीर कि आव धनी ईतकु भी नीम साटी कंगाल आगेदुन, ताकी आऊन कंगाल आगदुर देल नीव धनी आगेगी.

10 ई मात दा नान सला ईदा आद: ईद नीम साटी वळ्लीद आद, जो ऊंद साल टु ना रा सिर्फ क्याल्सा अक माळदुर दा अच, लेकीन ई मात इन चाहासदुर दा भी पयला आगिदुर, 11 इदुरसाटी ईग ईद क्याल्सा पुरा माळी कि ह्यांग इच्छा माळदुर दा नीव तयार ईरीर, हांग अच तान तान पूंजी इन अनुसार पुरा भी माळी. 12 यतिकी अगर मन देल कोळोद तयारी आद रा अदुर अनुसार परमेश्वर आ दान इक ग्रहण भी माळ्यान जो आऊन हात्‍ती आद, ना कि आऊन अनुसार जो आऊन हात्‍ती हैलेच.

13 हिंग ईला कि दुसरा अक चैन अदिक नीमी क्लेश सिकुल, 14 लेकीन बराबरी इन विचार देल ई समय नीम बळती आंदुर घटी दा क्याल्सा बरूल, ताकी आंदुर बळती भी नीम घटी दा क्याल्सा बरूल कि बराबरी आगेगुल. 15 ह्यांग शास्त्र दा लिख्सकु आद, “याव हापाळ जेळदुन आऊन ज्यादा होटीदिल, अदिक याव थ्वाळासा जेळदुन आऊन गोर्त भी होटीदिल.”

16 परमेश्वर उन धन्यवाद आगुल, याव नीम साटी अदा उत्साह तीतुस उन दिल दा हाक्‍क बुटान! 17 कि आव नाम समजुसोद मान्स कोंडुन उलटा हापाळ उत्साही आगकु आव तान इच्छा देल नीम हात्‍ती होग्याद. 18 नाव आऊन सांगुळ आ वार्ट उक भी कळेव यार्द हेसुर खुशखबरी इन बारा दा सप्पा मंडली दा फैलुसकु आद; 19 अदिक ईट अच ईला, लेकीन आव मंडली द्वारा नियुक्त भी आदुन कि ई दान इन क्याल्सा अन्द साटी नाम सांगुळ होगुल. नाव ईद स्यावा इदुरसाटी माळतेव कि प्रभु उन महिमा अदिक नाम मन इन तयारी प्रगट आगेगुल.

20 नाव ई मात दा सावधान ईरतेव कि ई उदारता अन्द क्याल्सा अन्द बारा दा यार स्यावा नाव माळतेव, यावारा नाम मा दोष हच सकबाळुल. 21 यतिकी जो मातगोळ सिर्फ प्रभु उन हात्‍ती इच ईला, लेकीन मंळसागोळ्द हात्‍ती भी भला आव नाव अऊर्द चिन्ता माळतेव.

22 नाव आऊन सांगुळ तान वार्ट उक भी कळेव, यारी नाव घळी-घळी परखुस्कु हापाळ सा मातगोळ दा उत्साही आगतेला नोळेव; लेकीन ईग नीम मा आऊक हापाळ भरोसा आद, ई कारण आव मात्‍त यक्कुल उत्साही आन. 23 अगर यावारा तीतुस उन बारा दा केळुल, रा आव नान संगी अदिक नीम साटी नान सहकर्मी हुन; अदिक अगर नाम वार्टुर्द बारा दा केळुल, रा आंदुर मंडलीगोळ्द कळुकु अदिक मसीह अन्द महिमा उर. 24 इदुरसाटी तान प्यार अदिक नाम अद घमण्ड जो नीम बारा दा आद मंडलीगोळ्द मुंद सिद्ध माळकु आंदरी तोरसी.

<- २ कुरिन्थि 7२ कुरिन्थि 9 ->