3 कि नीम दा टु यावारा भी इव क्लेशगोळ कारण डगमगुस बाळुल. यतिकी नीव खुद अच जान्सतीर कि ईद सताप नाम साटी परमेश्वर उन इच्छा अन भाग हुन. 4 यतिकी पयला अच, याग नाव नीम सांगुळ ईर तोगेव रा नीम से अन तोगेव कि नामी क्लेश नेगव बिद्दव, अदिक हिंग अच आग्याद, ह्यांग कि नीव जान्सतीर भी. 5 ईद कारण याग नान से अदिक ईतकु आगीदील, रा नीम्द विश्वास इन बारा दा जानसोर साटी कळुदीन, कि यागलु हिंग आगबाळुल कि परीक्षा माळावाळेर शैतान नीम परीक्षा माळीदार, अदिक नाम मेहनत बेकार आगीदाद.
6 [b]लेकीन ईगल्या तीमुथियुस, जो नीम हात्ती टु नाम हात्ती बंदान, नीम्द वळ्लीद विश्वास अदिक प्यार इन बातणी केळ्सदुन अदिक ईद मात इक भी केळ्सदुन कि नीव हमेशा प्यार इन सांगुळ नामी याद माळतीर, अदिक ह्यांग नाव नीमी नोळोर साटी लालच ईटतेव हांगा नीव भी ईटतीर. 7 इदुरसाटी हे वार्टुरा अदिक आकतींगेरा, तान सप्पा दुख अदिक क्लेश दा नीम विश्वास इन कारण नामी नीम बारा दा प्रोत्साहन सिक्त. 8 यतिकी ईग अगर नीव प्रभु दा संची ईरी रा नाव जित्ता आयेव. 9 यतिकी नाव नीम साटी परमेश्वर उन धन्यवाद माळ सकतेव. जो खुशी नामी परमेश्वर उन उपस्थिती दा सिकतद, इदुरसाटी परमेश्वर उन धन्यवाद माळतेव. 10 नाव ईळ्लक हागुल हापाळ अच प्रार्थना माळतेला ईरतेव कि नीमी मुंद नोळेव, अदिक नीम विश्वास इन कमी पुरा माळेव.
11 ईग नामव परमेश्वर अदिक आप्प खुद अच अदिक नाम प्रभु यीशु, नीम हात्ती बरोर साटी नाम हादी तेरूल; 12 अदिक प्रभु हिंग माळुल कि ह्यांग नाव नीम से प्यार ईटतेव, हांग अच नीम प्यार भी आपस दा अदिक सप्पा मंळसागोळ सांगुळ वाळुसुल, अदिक उन्नती माळतेला होगुल, 13 ताकी आव नीम मनगोळी हिंग संची माळुल कि याग नामव प्रभु यीशु तान सप्पा पवित्र लॉकुर सांगुळ बरूल, रा खुद नाम परमेश्वर आप्प उन उपस्थिती निर्दोष ठहरूसुल.
<- १ थिस्सलुनीकि 2१ थिस्सलुनीकि 4 ->