यूहन्ना की पहली पत्री

यूहन्ना अन्द पयला चिट्ठी
परिचय
१ यूहन्ना अन्द चिट्ठी प्रेरित यूहन्ना अन्द द्वारा मसीह अन्द जनम इन ५० से १०० साल इन न्याड्या दा लिख्सकु आगीत. यूहन्ना खुद इक लेखक इन रूप दा जान्सालुन. लेकीन पयला अध्याय तोर्सतद कि आव यीशु उन जीवन अदिक पुनरूत्थान इन साटी ऊंद प्रत्यक्षदर्शी आन १:१-३ पयला यूहन्ना दा लेखन शैली यूहन्ना अन्द अनुसार खुशखबरी दा सिक्द लेखन शैली घाई कांळ्सतद. हिंग मान्सकु आगतद कि १ यूहन्ना अन्द चिट्ठी इन अनुसार खुशखबरी लिखसीदुन अदिक इफिसुस दा ईरतेला मुर चिट्ठी १ यूहन्ना, २ यूहन्ना अदिक ३ यूहन्ना ईरव.
यूहन्ना ई चिट्ठी इक सप्पा इसाई लॉकुरी लिखसीदुन याग मंडली इक “ग्यानवादी” हेसुर इनोर लॉकुर इन समुह देल परेशानी आगोद. ई लॉकुर मान्स तोगोर कि यीशु पुरा तरीका देल परमेश्वर ईरोन लेकीन आव सही दा पृथ्वी मा मास अदिक रक्ता अन मय इन सांगुळ मंळसा ईला ईरोन. ईदा कारण यूहन्ना यीशु उन जीवन इन प्रती प्रत्यक्षदर्शी आगोद बारा दा लिख्सदुन अदिक अंदुन कि आऊन कयगोळ यीशु उक मुटदव १:१-३. ई चिट्ठी इक लिख्सदुर दा यूहन्ना अन्द उद्देश आंदुर खुशी इक पुरा माळोद ईरोद १ यूहन्ना १:४, विश्वासीगोळी पाप माळदुर देल रोकसोर साटी १ यूहन्ना २:१, ख्वाटा शिक्षा देल विश्वासीगोळ्द रक्षा माळोर साटी १ यूहन्ना २:२६ अदिक विश्वासीगोळी आश्वस्त माळोद कि आंदुर ऊळ्सकु आग्यार. ५:१३
रूप-रेखा
१. यूहन्ना तान चिट्ठी प्रस्तुत माळदुन अदिक इदरी लिखसोद ऊंद उद्देश कोट्टुन. १:१-४
२. बाक आव समझुसतान कि परमेश्वर ह्यांग ऊजुळ आन अदिक नामी जीवन स्वरूप ईरली पायजे. १:५–३:१०
३. इदुर बाद्दा आव नामी आबुर दाबुर से प्यार माळोद आदेश इन याद तोर्सतान. ३:११–५:१२
४. आव तान चिट्ठी खतम माळतान. ५:१३-२१

जीवन इन बातणी

1 [a]आ जीवन इन वचन इन बारा दा जो पयले टु ईरोद. यदरी नाव केळेव, अदिक यदरी तान कण्णगोळ देल नोळदेव, उलटा यदरी नाव ध्यान देल नोळदेव अदिक कयगोळ देल मुटदेव. 2 [b]ईद जीवन प्रगट आत्‍त, अदिक नाव आऊक नोळदेव, अदिक आऊन गवाही कोळतेव, अदिक नीमी आ अनन्त जीवन इन समाचार कोळतेव जो आप्प उन सांगुळ ईरोन अदिक नाम मा प्रगट आदुन. 3 जो येनारा नाव नोळेव अदिक केळेव अदुर्द समाचार नीमी भी कोळतेव, इदुरसाटी कि नीव भी नाम सांगुळ सहभागी आगी; अदिक नाम्द ईद सहभागीता आप्प उन सांगुळ अदिक आऊन पार यीशु मसीह अन सांगुळ आद. 4 अदिक ई मातगोळ नाव इदुरसाटी लिख्सतेव कि नाम्द खुशी पुरा आगेगुल.

प्रकाश दा नळोद

5 जो समाचार नाव आऊन से केळेव अदिक नीमी केळ्सतेव, अद ईद हुन कि परमेश्वर प्रकाश हुन अदिक आऊन दा येनु उच अंधकार हैलेच. 6 अगर नाव अंदेव कि आऊन सांगुळ नाम्द सहभागीता आद अदिक मात्‍त पाप दा नळदेव, रा नाव ख्वाटा आयेव अदिक सच्चाई मा नळालेव; 7 लेकीन अगर ह्यांग आव प्रकाश दा आन, हांग अच नाव भी प्रकाश दा नळदेव, रा आबुर दाबुर से सहभागीता ईटतेव, अदिक आऊन पार यीशु उन रक्ता नामी सप्पा पापगोळ देल शुद्ध माळतद.

8 अगर नाव अंदेव कि नाम दा येनु भी पाप ईल्लच, रा तान तान इक ध्वाका कोळतेव, अदिक नाम दा सच्चाई ईल्लच. 9 अगर नाव तान पापगोळी मान्स कोंडेव, रा परमेश्वर नामव पापगोळ इक माफ माळोद अदिक नामी सप्पा पापगोळ देल शुद्ध माळदुर दा विश्वासलायक अदिक न्यायी आन. 10 अगर नाव अंदेव कि नाव येनु पाप माळीदिल, रा परमेश्वर उक ख्वाटा ठहरूसतेव, अदिक आऊन वचन नाम दा हैलेच.

१ यूहन्ना 2 ->