1 Oesab ke jaad karwaaw kie sab koi ke tjaahie des ke raadj ke tjalaawe waalan aur sardaar logan ke nietje rahe ke aur aapan kaam attjha se kare ke. 2 Oesabke na tjaahie ek doesare ke bedjatie kare ke aur djhagara kare ke, bakie sab koi se kaida aur prem se rahe ke.

3 Pahiele hamlog to bhie be-samadjh ke rahielie aur Parmeswar ke baat na maanat rahielie. Hamlog kharaab rasta par tjalat rahielie aur har ek rakam laalietj aur maudj me boeral rahielie. Hamlog kharaab rahielie aur doesar log ke djaran karat rahielie. Hamlog ek doesare ke dekhke djarat rahielie. 4-5 Bakie hamlogke Parmeswar aapan bhalaai aur prem iensaan logan khaatien dekhaais, aur oe hamlogke ie sab tjiedj me se batjaais hai. Na kie hamlog koetjh barhia kaam karlie rahielie, bakie oe hamlogke daaja karies hai aur aapan Pawietr Aatma deis hai hamlogke batjaawe khaatien. Djaise hamlog paanie se koetjh dhoila, oisane Pawietr Aatma hamlogke diel safa kar deis hai. Tab hamlog ek naawa djiewan pailie. 6 Parmeswar Jiesoe Kriest ke batjaawe ke kaam dwaara aapan Pawietr Aatma hamlogke oeppar bahoet barsaais hai. 7 Aisane oe bhalaai karke hamlogke be-kasoerie aur apane se ek karies hai, aur hamlogke hak deis hai hardam khaatien okar sanghe rahe ke. Ab hamlog okar waada bieswaas karke agoriela djab talak oe na poera kariega.

8 Ie baat satj hai, aur ham maangiela kie toe ie baat khoeb thiek se siekhaaw djeme Parmeswar ke bieswaasie logan bhala kaam karat rahe. Ie thiek hai aur eman sab koi ke faida rahiega. 9 Bakie toke tjaahie and-band baat, baap-daada log ke naam ke liest aur Israel ke dharam ke nem ke biese me djhagara na kare ke. Ie to be-kaamiel hai. 10 Djab koi maange hai ie tjiedj ke biese me djhagara karwaaike iesaai ke samaadj ke toekkara toekkara me baate, tab toke tjaahie oke doei tien dafe mienaahie kare ke. Aur djab oe baat na soeniega, tab oke samaadj me se niekaar de. 11 Aisan manai kharaab rasta par tjale hai aur aapan tjaal-tjalan se dekhaawe hai kie oe kasoerwaar hai.

12 Djab ham Artemes kie to Tiekiekas ke tore lage pathaabe, tab kausies kar halieje se hamare lage aawe ke. Ham Niekopoles sahar me baatie aur ham maangiela thandha ke tem bhar hia rahe.

13 Djadj Senas aur Aapolos ke sahaara kariehe auro aage djaai ke. Oe doeno ke sab tjiedj deihe djaun oelogke djaroerie hai. 14 Hamlogke iesaai bhaai-bahien ke bhie tjaahie siekhe ke ek doesare ke sahaara karat rahe ke. Tab dje ke koetjh djaroerat rahie, oe otane paai. Ie rakam se oesab kaamiel rahiega.

15 Hia ke sab koi toke jaad kare hai. Hamlog khaatien sab pjaara iesaai bhaai-bahien log ke aasier-baat dei deihe.

Parmeswar toelogke bhalaai kare.

<- Tietas 2