1 Bakie tor kaam hai kholke bataawe ke kaise ek safa djiewan bietaawe ke tjaahie. 2 Toke tjaahie boerhwa log se bole ke kie oelogke tjaahie hiessaab aur ieddjat se rahe ke, aur apane ke samhaare ke. Oelogke tjaahie sattja baat bieswaas kare ke, prem se aur hiemmat baanhke rahe ke. 3 Toke tjaahie boerhia log ke bhie siekhaawe ke ieddjat se rahe ke. Oelogke na tjaahie niendara kare ke kie to piejekkar rahe ke, bakie oesabke tjaahie doesare ke attjha raai dewe ke. 4 Tab oesab djawaan aurat log ke siekhaai sakiega kaise aapan aadmie aur larkan ke pjaar kare ke, 5 samadjhdaar aur sahoer se rahe ke, aapan ghar thiek se samhaare ke, prem se rahe ke, aur aapan aadmie ke nietje rahe ke. Djab oelog aise karie tab doesar log Parmeswar ke sattja baat ke biese me koetjh kharaabie na bol paai.

6 Toke tjaahie naudjawaan log ke siekhaawe ke apane ke hardam samhaare ke. 7 Aapan barhia tjaal-tjalan se dekhaaw kaise ek iesaai ke tjaahie bhala kaam kare ke, Parmeswar ke baat safa se djaane ke, ieddjat se rahe ke aur sattjaai partjaar kare ke 8 djeme hamlogke doesman log koetjh kharaabie na bol paawe aur sarmaai djaai.

9 Iesaai logan djaun koi ke goelaam hai, oelogke tjaahie hardam aapan maaliek ke baat maane ke aur har ek tjiedj me oelogke parsand kare ke. Oesabke na tjaahie moeh tjalaawe ke, aur oelogke tjaahie sattjaai se rahe ke. 10 Oesabke tjaahie har ek tjiedj me dekhaawe ke kie oelog bharosaadaar hai. Tab doesar log dekhke hamlogke batjaawe Waala Parmeswar ke baat barka maanie.

11 Parmeswar aapan bhalaai dekhaais hai. Oe to sab manai logan ke batjaai sake hai. 12 Oe maange hai hamlogke siekhaawe kharaab djiewan aur laalietj tjhor dewe ke, aur samadjh se aur safa diel se okar rasta par tjale ke. 13 Hamlog ke tjaahie khoesie se agore ke djab talak Kriest Jiesoe ke biesaal soekh na dekhaai. Oe to hamlogke maahaan Parmeswar aur batjaawe Waala hai. 14 Oe apane ke kroes par baliedaan karies hai hamlogke sab boeraai me se batjaawe khaatien. Oe maange hai hamlogke apane khaat ek attjha djaatie banaawe djeme hamlog dher bhala kaam karie. 15 Ie sab baat hoewa ke iesaai log se bataai de. Oesabke khoeb samdjhaaike soedhaar le. Aur koi ke na tjaahie toke nietja maane ke.

<- Tietas 1Tietas 3 ->