RUTA

1 Gunaguna, gunalaia taudia ese Israela taudia idia naria, king be do lasi neganai, hitolo bada herea edia tano dekenai ia vara. Vadaeni Betelehema Iuda tauna ta mai ena adavana bona iena natuna memero rua ese edia hanua idia rakatania, Moaba tanona dekenai do idia noho totona. Unai tau ena ladana be Elimeleka, bona iena adavana be Naomi, edia natudia memero ruaosi edia ladana be Malona bona Kiliona. Idia be Eparata iduhu taudia, Betelehema, Iuda dekena amo. 2 Moaba tanona dekenai idia ginidae, unuseni idia noho.

3 Gabeai Elimeleka, Naomi ena adavana ia mase. Vadaeni unai hahine mai ena natuna ruaosi be Moaba dekenai idia noho, idau taudia bamona. 4 Gabeai unai memero ruaosi, Malona bona Kiliona ese Moaba kekeni rua idia adavaia. Unai kekeni edia ladana be Oropa bona Ruta. Edia headava murinai, idia be unuseni idia noho ela bona lagani 10 idia ore. 5 Vadaeni Malona bona Kiliona ruaosi idia mase, edia sinana sibona ia noho, iena adavana bona natuna be lasi.

6 Unai murinai haida ese Naomi dekenai idia gwau, “Lohiabada ese aniani hatubua nega namona iena bese dekenai ia henia vadaeni.” Unai dainai Naomi mai ena ravana ruaosi danu idia hegaegae, Moaba idia rakatania, Naomi ena hanua dekenai do idia giroa totona. 7 Vadaeni idia toiosi ese edia noho gabuna idia rakatania, Iuda dala dekenai idia raka lao hebou.

8 Unai neganai Naomi ese iena ravana ruaosi dekenai ia hereva, ia gwau, “Umui ruaosi emui sinadia dekenai do umui giroa lou, Lohiabada ese umui do ia hanamoa, umui ese lau bona emui mase taudia umui hanamoa hegeregerena. 9 Bona Lohiabada ese umui ruaosi dekenai adavana matamatadia do ia henia, ruma namodia danu.”

Vadaeni Naomi ese ruaosi dekenai ia kisi henia. Idia ruaosi idia tai dikadika. 10 Bona ia dekenai idia haere, idia gwau, “Lasi, ai ese oi do ai bamoa, oiemu bese dekenai do ita lao.”

11 To Naomi ia gwau, “Lauegu ravana e, do umui giroa lou, umui ese lau umui bamoa, ena anina be dahaka? Lau ese natuna haida ma do lau havaraia, umui do idia adavaia, a? 12 Umui giroa lou, emui dala dekenai do umui lao lou. Lau be buruka vadaeni, do lau headava lou lasi. To bema lau headava lou, hari hanuaboi bema lau headava, natuna memero lau havaraia neganai, 13 umui ese do umui naria diba ela bona memero idia bada, a? Umui headava lasi, bona umui noho kava diba, idia totona, a? Lasi, lauegu ravana e, inai bamona umui karaia diba lasi. To, lauegu lalona ia hisihisi umui dainai, badina be Lohiabada ese lau ia rakatania vadaeni.”

14 To Ruta bona Oropa idia taitai lou. Gabeai Oropa ese Naomi ia kisi henia, ia rakatania, to Ruta ese Naomi ia rakatania lasi.

15 Naomi ia gwau, “Oi itaia, oiemu nakimi ese iena bese taudia bona iena dirava dekenai ia giroa lou. Ia danu do oi giroa lou.”

16 To Ruta ia haere, ia gwau, “Lau do oi oda lasi, oi do lau rakatania totona. Badina be do oi lao gabuna, be lau danu do lau lao, bona do oi noho gabuna dekenai lau danu do lau noho. Oiemu bese be lauegu bese do idia lao, bona oiemu Dirava be lauegu Dirava do ia lao. 17 Oi mase gabuna dekenai be lau danu do lau mase, unai gabu dekenai lau do idia guria. Gau ta lasi ese ita do ia hapararaia. Mase sibona ese ita do ia hapararaia. Lau hereva momokani, bema inai mauri lalonai oi lau rakatania neganai, Dirava ese egu dika davana bada lau dekenai do ia henia, bona do ia hametaua danu.”

18 Naomi ese ia itaia, Ruta ia ura momokani, ia danu do ia lao, vadaeni ia hereva lou lasi.

19 Vadaeni idia ruaosi idia raka lao hebou, ela bona Betelehema dekenai idia ginidae. Betelehema idia ginidae neganai, hanua taudia ibounai edia lalona ia toreisi, bona hanua hahine idia gwau, “Momokani, inai be Naomi, a?”

20 Naomi ese idia dekenai ia haere, ia gwau, “Lauegu ladana umui atoa lasi, Naomi, to Mara do umui atoa, badina be Siahu Bada Diravana ena kara lau dekenai be auka. 21 Mai gau momo lau ese inai gabu lau rakatania, to Lohiabada ese imana kavakava lau ia siaia lou. Dahaka dainai lauegu ladana Naomi umui atoa? Lohiabada ese lau ia hisihisi henia vadaeni. Siahu Bada Diravana ese lau ia hadikaia momokani.”

22 Inai be Naomi ese Moaba ia rakatania ena sivarai. Ia ese iena hanua korikori dekenai ia giroa mai, iena ravana Ruta, Moaba hahine danu. Idia ruaosi be Betelehema dekenai idia ginidae neganai be bali idia utua hamatamaia neganai. Bali be aniani ta, raisi bamona.

RUTA 2 ->