1 Iseda taihuna Fibi ia mai noho umui dekenai, ia be Kenekrea dubu ena diakono hahine ta. 2 Lohiabada dainai Fibi do umui abia dae, Dirava ena taudia ta ta dekenai edia abia dae kara hegeregerena. Iena gaukara dekenai umui durua. Badina be ia danu ese taunimanima momo ia durua vadaeni, bona lau danu ia durua vadaeni.

3 Prisikila bona Akwila dekenai lauegu hanamoa hereva lau siaia inai. Idia be lau danu ai gaukara hebou taudia Keriso Iesu ena hesiai gaukara lalonai. 4 Idia ese lau durua totona kahirakahira idia mase. Lau ese idia lau hanamoa bada, to lau sibona lasi, Iuda lasi ekalesia orea taudia ibounai danu. 5 Edia ruma lalonai idia hebou noho Keristani taudia dekenai danu egu hanamoa do umui henidia. Lau lalokau henia tauna, Epaineto dekenai danu egu hanamoa do umui henia. Ia be tau ginigunana Keriso ia abidadama henia Asia kahana dekenai. 6 Lauegu hanamoa danu Maria dekenai umui henia. Ia be umui totona ia hekwarahi bada vadaeni. 7 Lauegu varavara taudia Anedroniko bona Iunia danu, lauegu hanamoa idia dekenai do umui henia. Idia be Iuda taudia lau hegeregere, bona idia be lau danu nega tamona dibura ruma dekenai ai noho. Edia sivarai be ia bada aposetolo taudia edia huanai. Idia danu be Keriso ena orea dekenai idia vareai guna, lau be gabeai.

8 Amepilia, Lohiabada dainai lau lalokau henia tauna dekenai, lauegu hanamoa do umui henia. 9 Urebano, lau danu Keriso ena hesiai gaukara ai karaia hebou tauna, bona Sitaku, lauegu lalokau tauna umui hanamodia, lau dainai. 10 Apele, Keriso totona ia gini goada momokani tauna, ia dekenai lauegu hanamoa umui henia. Aristobulo ena ruma taudia ibounai dekenai lauegu hanamoa lau siaia inai. 11 Lauegu varavara, Iuda tauna Herodiona dekenai hanamoa do umui henia, lau dekena amo. Lauegu hanamoa danu Narakiso ena ruma taudia do umui henia, idia be Keriso ena orea taudia.

12 Lauegu hanamoa hereva be Trupena bona Truposa dekenai do umui henia, idia ruaosi be Lohiabada totona idia hekwarahi bada. Lauegu turana lalokau Peresi dekenai danu egu hanamoa do umui henia. Gaukara bada ia karaia vadaeni Lohiabada totona. 13 Rupo, ia be Lohiabada ena hesiai tauna namona momokani, egu hanamoa lau siaia ia dekenai, iena sinana danu lau hanamoa, ia ese nega ibounai lau ia durua, hegeregere lau be iena natuna bamona. 14 Asunukrito bona Pelegona bona Hereme bona Pateroba bona Herema, mai edia Keristani turadia ibounai danu dekenai egu hanamoa do umui henia. 15 Pilologo, bona Iulia, bona Nerea, mai iena taihuna danu bona Olimipa, bona Dirava ena taudia ibounai idia danu idia noho, egu hanamoa mani do umui henidia.

16 Umui ta ta dekenai umui hanamoa, umui ta ta dekenai ekalesia ena lalokau kisi do umui henia. Keriso ena ekalesia orea ibounai ese umui dekenai edia hanamoa idia siaia inai.

17 Lauegu varavara taudia e, ekalesia orea idia hapararaia taudia bona taunimanima haida edia abidadama idia hadikaia taudia do umui naria namonamo. Ai ese umui dekenai ai henia vadaeni hadibaia hereva idia ura hamakohia gwauraia. Idia dekena amo do umui raka siri. 18 Badina be unai bamona taudia ese Keriso iseda Lohiabada ena hesiai gaukara idia karaia lasi, to edia bogana sibona idia laloa. Idia danu hereva manau koikoi bona hereva namo koikoi dekena amo, diba bada lasi taudia idia koia noho. 19 To umui ese Sivarai Namona umui badinaia namonamo noho ena kiki, be taunimanima ibounai idia kamonai vadaeni. Unai dainai, lau be umui totona lau moale. Bona lau ura umui be kara namodia dekenai do umui aonega, to kara dikadia dekenai do umui aonega lasi. 20 Nega sisina iseda maino ia havaraia Diravana ese Satani do ia moia diho momokani, umui emui aena henuna dekenai. Dirava lau noia, iseda Lohiabada Iesu Keriso ena hariharibada do ia hedinaraia noho umui dekenai.

21 Timoteo, lau danu ai gaukara hebou tauna, bona lauegu Iuda varavara taudia Lukio, Iasoni bona Sosipatro ese edia hanamoa idia siaia inai, umui dekenai.

22 Lau inai, Teretio, Paulo ena hereva lau torea noho inai revareva lalonai. Lau ese Lohiabada ena ladana dekenai umui lau hanamoa.

23 Gaio ese iena hanamoa umui dekenai ia siaia. Ia ese lau ia naria namo herea iena ruma dekenai. Iena ruma lalonai danu ekalesia edia guriguri hebou idia abia noho. Erasito, hanua badana ena moni ia naria tauna, bona Koato, Keristani varavara tauna ta ese edia hanamoa idia siaia inai, umui dekenai.

24 Iseda Lohiabada Iesu Keriso ena hariharibada be umui ibounai dekenai do ia noho. Amen.

25 Dirava dekenai hairai bada ita henia be namo! Ia sibona ese mai goada danu, umui do ia haginia goada emui abidadama lalonai. Inai abidadama umui davaria, Sivarai Namona, lau ese lau harorolaia gauna dekena amo, Iesu Keriso ena Sivarai Namona be inai. Inai sivarai momokani be hunia herevadia, idaunegai ia mai bona hari be idia hunia, to harihari Dirava ese ia hedinaraia namonamo vadaeni. 26 Oibe, Dirava ena hereva momokani be harihari ia hedinaraia namonamo, badina peroveta taudia edia toretore ese unai hereva ena anina korikori idia hedinaraia vadaeni. Bona noho hanaihanai Diravana ena oda dainai, bese ibounai dekenai inai Sivarai ai hadibaia noho, taunimanima ibounai ese do idia abidadama henia bona kamonai henia totona.

27 Aonega Dirava tamona ita hanamoa, Iesu Keriso dainai, iena hairaina do ia noho hanaihanai. Amen.

<- ROMA 15