1 Unai dainai, lauegu Keristani varavara taudia e, egu lalokau taudia, umui lau laloa momo, mai bogahisihisi danu. Umui lau ura henia, bona umui dainai lau moale, badina umui be lauegu dagi ena toana. Lalokau taudia e, Lohiabada danu umui hakapua dainai, do umui gini goada noho.

2 Euodia bona Sunutuke e, umui lau noia, umui be Lohiabada ena hahine taudia dainai, do umui laloa tamona be namo. 3 Oi danu, lauegu durua tauna namona e, inai hahine ruaosi oi durua be namo, badina idia ese lau danu idia gaukara hebou Sivarai Namona totona. Klemento bona lau danu idia gaukara hebou taudia haida danu ese lau idia durua. Idia edia ladana be Dirava ena mauri buka lalonai idia torea vadaeni.

4 Nega ibounai do umui moale, Lohiabada lalonai umui noho dainai. Ma lau gwau lou: Do umui moale.

5 Emui manau bona manada kara taunimanima ibounai edia vairanai do umui hedinaraia. Lohiabada be kahirakahira do ia ginidae. 6 Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. 7 Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.

8 Lauegu varavara taudia e, lauegu hereva orena be inai. Inai bamona karadia sibona do umui laloa: Kara namodia, taunimanima edia ladana idia hanamoa karadia, momokani karadia, bogahisihisi henia karadia, kara maoromaoro, kara goevagoeva, lalokau karadia, bona taunimanima namodia matauraia karadia. 9 Lau dekena amo umui davaria gaudia, egu hadibaia hereva bona egu kara danu, inai sibona do umui karaia. Bona maino ia henia Dirava be umui danu do ia noho.

10 Lohiabada lalonai lau moale bada noho, badina be umui ese lau dekenai umui laloa lou dainai. Lau umui durua guna bamona, ma harihari umui durua lou. Nega sisina daudau umui ura bada lau umui durua, to umui be dala lasi ia mai bona harihari. 11 Lauegu ogogami lau maumauraia lasi, badina be lau manada vadaeni. Bona lau dekenai ia noho gauna dekenai lau moale vadaeni. 12 Ogogami dekenai lau manada vadaeni, kohu momo ena mauri dekenai danu lau manada vadaeni. Mauri mai lalo namo ena dalana lau davaria vadaeni. Unai dainai gabu ibounai, nega ibounai, lau boga kunu o lau hitolo, be lau laloa momo lasi. Bona lauegu gau be momo, o hegeregere lasi neganai, egu lalona ia namo noho. 13 Keriso ese lau ia hasiahua, vadaeni gau ibounai lau goadalaia diba.

14 To egu hisihisi lalonai lau umui durua be namo, bona maoro danu. 15 Filipi taudia e, umui diba, Sivarai Namona gwauraia loaloa lau hamatamaia neganai, Makedonia lau rakatania murinai, ekalesia orea ta ese lau ia durua lasi, umui sibona. Oibe, umui sibona ese moni hegeregere lau dekenai umui henia. 16 Bona Tesalonika lau noho neganai, nega tamona lasi, to nega haida umui ese lau durua totona, moni umui siaia. 17 Harihari gaudia umui dekena amo lau tahua lasi, to lau ura be inai emui kara namo dainai, Dirava ese davana namona umui dekenai do ia henia. 18 Gau momo, hegeregere momokani, ma haida danu, lau davaria vadaeni. Umui emui harihari gaudia ibounai, Epafrodito ese ia mailaia gaudia be lau davaria vadaeni. Idia be bonana namo gaudia, boubou gaudia, Dirava ese idia ia abia dae vadaeni, mai ena moale danu. 19 Egu Dirava be mai ena kohu namodia momo herea, Keriso Iesu ena hairai diarina dainai. Unai Keriso lalonai ia abia gau namodia momo dekena amo, Dirava ese umui dekenai hegeregere lasi gaudia ibounai, be umui dekenai do ia henia, hegeregere momokani. 20 Iseda Tamana Dirava ena ladana ita hanamoa bada noho hanaihanai. Amen.

21 Keriso Iesu ena taudia ibounai, Dirava ena orea lalonai umui noho, umui ibounai dekenai egu hanamoa lau siaia inai. Keristani varavara taudia, lau danu iniseni idia noho ese edia hanamoa idia siaia danu. 22 Dirava ena taudia ibounai iniseni idia noho, bona Kaisara ena ruma lalonai idia gaukara noho Keristani taudia danu ese edia hanamoa idia siaia inai.

23 Namona be Lohiabada Iesu Keriso ena hariharibada umui ibounai dekenai do ia noho.

<- FILIPI 3