1 Daba ia rere, dubu biagudia ibounai bona hanua tau badadia idia hereva hebou, Iesu alaia totona. 2 Vadaeni idia guia, idia hakaua lao, Pilato, gavana tauna, dekenai idia henia.

3 Iuda, Iesu ia samania tauna ese ia itaia, kota dekenai Iesu hamasea herevana idia gwauraia. Vadaeni ia sibona ena lalona ia giroa, vadaeni unai siliva moni 30 ia abia, ia giroa lou, dubu biagudia bona hanua tau badadia dekenai ia henia lou gwauraia. 4 Ia gwau, “Kara dikana lau karaia vadaeni, badina be kerere lasi tauna ena mase dala lau karaia vadaeni.”

Idia gwau, “Ai ese, a? Oi sibona emu kerere.”

5 Iuda ese siliva moni Dubu Helaga lalonai ia negea vareai, vadaeni ia raka siri, ia lao, ena aiona be varo dekenai ia kwatua, au dekenai ia taua dae, ia sibona ia alaia mase.

6 Vadaeni dubu biagudia ese inai siliva moni idia abia, idia gwau, “Ia namo lasi boubou ena maua dekenai do ita udaia, badina inai be rara ena davana.” 7 Idia herevalaia, vadaeni uro karaia tauna ena tano idia hoia, idau bese taudia edia mase guria gabuna dekenai idia halaoa. 8 Unai dainai, unai tano ena ladana idia atoa “Rara Tanona” ia mai bona harihari.

9 Unai dainai Ieremia, peroveta tauna, ena hereva ia momokani vadaeni, ia gwau,

11 Iesu be gavana ena vairana dekenai ia gini, vadaeni gavana ese ia nanadaia ia dekenai, ia gwau, “Oi be Iuda taudia edia king, a?” Iesu ia gwau, “Oi hereva unai.” 12 Vadaeni dubu biagudia bona hanua tau badadia ese Iesu dekenai hereva koikoi ma idia gwauraia, to Iesu be ia haere lasi.

13 Vadaeni Pilato ia gwau, “Hereva momo oi dekenai idia gwauraia be oi kamonai lasi, a?”

14 To Iesu be ia haere lasi, hereva ta ia gwauraia lasi. Unai dainai gavana be ia hoa.

15 Unai aria neganai gavana ena kara be nega ibounai dibura ruma dekenai ia noho tauna ta, taunimanima ese do idia gwauraia tauna, do ia ruhaia murimuri dekenai. 16 Unai neganai tau ta dibura ruma dekenai ia noho, ena ladana be Baraba, unai tau ena kerere sivarai be ibounai idia diba. 17 Unai dainai, idia haboua vadaeni neganai, Pilato ese ia nanadaia idia dekenai, ia gwau, “Edena tauna umui ura do lau ruhaia, Baraba o Iesu, iena ladana ta idia gwauraia Keriso?” 18 Badina be Pilato ia diba Iuda tau badadia idia mama dainai Iesu idia samania bona idia kota henia.

19 Pilato be kota henia gabuna dekenai, iena helai gauna latanai ia helai noho neganai, iena adavana ese hereva ta ia siaia lao ia dekenai, ia gwau, “Unai kara maoromaoro tauna dekenai gau ta do oi karaia lasi, badina be hari dina lau nihi vadaeni, egu nihi dekenai hisihisi badana ia hadikaia lau, unai tau totona.”

20 To dubu biagudia bona hanua tau badadia ese taunimanima dekenai idia hereva, Baraba do ia ruhaia, bona Iesu do ia alaia mase herevana do idia gwauraia totona. 21 Vadaeni gavana ese ma ia nanadaia idia dekenai, ia gwau, “Inai Iesu bona Baraba ruaosi, be daika do lau ruhaia umui emui?”

Idia gwau, “Baraba!”

22 Vadaeni Pilato ese ma ia nanadaia idia dekenai, ia gwau, “To Iesu, idia gwauraia Keriso dekenai be dahaka do lau karaia?” Idia ibounai idia haere nega tamona, idia gwau, “Do oi hasatauroa!”

23 Pilato ia gwau, “Be, iena dika be dahaka?” To idia boiboi momo mai goada danu, idia gwau, “Do oi hasatauroa.”

24 Unai dainai Pilato ena lalona ia diba, iena hereva be do idia goada lasi, bona idia be do idia heatu garina, vadaeni ranu ia abia, taunimanima edia vairanai iena imana ia huria, ia gwau, “Inai kara maoromaoro tauna ena rarana be egu latanai do ia noho lasi, to umui sibona.”

25 Idia ibounai idia haere, idia gwau, “Inai tau ena rarana be aiemai latanai bona aiemai natudia edia latanai do ia noho.”

26 Vadaeni Pilato ese Baraba ia ruhaia. To oda ia atoa, vadaeni Iesu idia kwadia. Unai murinai Pilato ese tuari taudia dekenai Iesu ia henia, do idia hasatauroa totona.

27 Vadaeni gavana ena tuari taudia ese Iesu idia hakaua lao gavana ena ruma badana lalonai, vadaeni idia edia orea taudia ibounai idia haboua lao ia dekenai. 28 Idia ese iena dabua idia kokia, bona dabua kakakaka ia dekenai idia atoa. 29 Bona kwara gauna au ginigini dekena amo idia turia, iena kwarana dekenai idia atoa. Bona au ta danu iena imana idiba kahana dekenai idia atoa, ia dogoatao. Edia tuina idia atoa diho, idia tomadiho henia koikoi ia dekenai, idia gwau, “Iuda edia king e, do oi mauri.” 30 Vadaeni ia dekenai idia kanudi, bona unai au iena imana dekena amo idia kokia, au dekena amo iena kwarana idia botaia. 31 Iesu idia kirikirilaia ia ore murinai, dabua kakakaka iena tauanina dekena amo idia kokia, iena dabua korikori ma idia atoa lou. Vadaeni idia hakaua lao, idia hasatauroa totona.

32 Idia raka murimuri dekenai neganai, Kurene tauna ta idia davaria, ena ladana be Simona, idia oda henia Iesu ena satauro do ia huaia.

33 Gabu ta dekenai idia ginidae, ena ladana be Gologota, ena anina be Kwara Koukouna Gabuna. 34 Unuseni uaina, muramura danu idia mikisi gauna Iesu dekenai idia henia, ia inua totona. To sisina ia mamia murinai ia ura lasi inua.

35 Vadaeni idia hasatauroa, bona laki dekena amo iena dabua idia haria karaia. 36 Bona idia helai diho, idia itaia noho. 37 Iena kwarana ena atai dekenai idia ese Iesu dekenai idia samania ena hereva gauna idia atoa. Inai bamona idia torea, “Inai be Iesu, Iuda taudia edia King.”

38 Unai neganai Iesu danu be henaoa taudia rua idia hasatauroa, ta be iena imana idiba kahana dekenai, ta be iena imana lauri kahana dekenai.

39 Idia raka hanaia taudia ese idia hereva dika henia ia dekenai, edia kwarana idia giroagiroa, 40 idia gwau, “Io! Dubu Helaga do oi kokia, ma dina toi ia ore do oi haginia lou tauna oi, oi be Dirava ena Natuna oi gwau, satauro dekena amo mani oi diho mai!”

41 Dubu biagudia bona taravatu hadibaia taudia bona hanua tau badadia danu Iesu idia kirikirilaia, idia gwau, 42 “Ia be idau taudia ia hamauria, to edena bamona ia sibona ia hamauria diba lasi? Ia be Israela ena King, harihari satauro dekena amo mani ia diho, vadaeni do ita abidadama henia ia dekenai. 43 Ia ese Dirava ia abidadama henia. Bema Dirava ia lalokau henia ia dekenai, be do ia hamauria, badina be ia gwau, ‘Lau be Dirava ena Natuna.’ ”

44 Henaoa taudia ruaosi danu, ia danu idia hasatauroa taudia, be unai bamona idia kirikirilaia.

45 Dina tubua dekena amo dibura ese tanobada ibounai ia koua, ela bona adorahi. 46 Vadaeni adorahi neganai Iesu ia boiboi mai goada danu, ia gwau, “Eloi, Eloi, lama sabakatani?” ena anina be, “Egu Dirava e, egu Dirava e, dahaka dainai lau oi rakatania?”

47 Unuseni idia gini taudia haida be idia kamonai, vadaeni idia gwau, “Inai be Elia dekenai ia boiboi.” 48 Tau ta ia heau lao, sipanisi ia abia, mamina ia namo lasi uaina dekena amo ia hahonua, bona au latana ta ena duduna dekenai ia atoa, vadaeni ia abia isi, ia henia Iesu dekenai, ia inua totona.

49 To haida be idia gwau, “Dohore, mani ita itaia, Elia do ia mai, do ia hamauria, o?”

50 To Iesu ma ia boiboi bada, vadaeni ia mase.

51 Unai neganai Dubu Helaga ena koua dabua helagana badana be ia darea, ataiai dekena amo ia diho mai bona henuna dekenai, kahana rua ia lao. Tano danu ia mareremarere, nadi badadia danu idia makohia, 52 bona mase guria gabudia danu idia kehoa, helaga taudia momo be mase dekena amo idia toreisi lou. 53 Edia guria gabudia idia rakatania, bona Iesu ena toreisi lou murinai idia be Hanua Helaga dekenai idia lao, unuseni taunimanima momo ese idia itadia.

54 Tuari biaguna mai ena tuari taudia danu, Iesu dekenai idia naria noho taudia, ese tano mareremarere, bona idia vara gaudia idia itaia, vadaeni idia gari bada, idia gwau, “Momokani, inai be Dirava ena Natuna.”

55 Idia itaia noho hahine momo danu sisina daudau dekenai idia gini, Galilea dekena amo Iesu ena murinai idia raka, bona iena hesiai gaukara idia karaia hahinedia be unai. 56 Haida be inai: Maria, Magadala hahinena, bona Maria, Iamesi bona Iosepa edia sinana, bona Sebedeo ena natuna edia sinana.

57 Adorahi neganai, kohu momo tauna ta, ena ladana be Iosepa, Arimatea hanua dekena amo ia ginidae. Ia danu be Iesu ena diba tahua tauna ta. 58 Ia be Pilato dekenai ia lao, ia noia, Iesu ena tauanina ia abia gwauraia. Vadaeni Pilato ese oda ia atoa do idia henia. 59 Unai dainai, Iosepa ese Iesu ena tauanina ia abia diho, dabua ia miro lasi dekenai ia kumia. 60 Iosepa be sibona mai ena guria gabu matamatana ta, nadi gabuna dekena amo ia geia vadaeni gauna. Unai guria gabuna lalonai Iosepa ese Iesu ena tauanina ia atoa. Nadi badana ia keia lao, guria gabuna ena iduara ia koua, vadaeni ia raka siri. 61 To hahine ruaosi, Maria, Magadala hahinena, bona Maria ta, be guria gabuna ena vairana dekenai idia helai noho.

62 Kerukeru dabai, Sabati Dina neganai, dubu biagudia bona Farisea taudia be Pilato ena vairanai idia haboua. 63 Idia gwau, “Ai be inai bamona ai laloa. Unai koikoi tauna ia mauri noho neganai ia hereva, ia gwau, ‘Dina toi do idia ore, do lau toreisi lou.’ 64 Unai dainai, mani do oi hereva, guria gabuna do idia naria namonamo, ela bona dina toi ia ore. Badina be iena diba tahua taudia be sedira do idia mai, iena tauanina do idia henaoa, vadaeni taunimanima do idia koia, do idia gwau, ‘Ia be mase dekena amo ia toreisi lou vadaeni,’ unai do idia karaia garina. Bema unai bamona, gabeai koikoi hereva ese guna koikoi hereva do ia hanaia.”

65 Pilato ia gwau, “Be, umui be mai emui tuari taudia, vadaeni umui lao, guria gabuna do umui koua, umui emui goada hegeregerena.”

66 Vadaeni idia lao, guria gabuna idia koua auka masemase, bona koua nadina idia taravatua maka ta dekena amo, vadaeni tuari taudia idia atoa unuseni, Iesu do idia naria namonamo totona.

<- MATAIO 26MATAIO 28 ->