1 Unai murinai Iesu be Galilea dekenai ia lao loaloa. Ia ura lasi Iudea dekenai ia lao, badina Iuda taudia ese ia idia alaia mase dalana idia tahua noho. 2 Iuda taudia edia Au Raurau Ruma Maragidia aria dinana be ia kahirakahira. 3 Vadaeni Iesu be iena tadina ese idia hereva henia, idia gwau, “Inai gabu do oi rakatania, Iudea dekenai do oi lao, vadaeni oiemu diba tahua taudia ese oi karaia hoa gaudia do idia itaia, 4 badina bema tau ta be sibona ia ura hedinaraia neganai, ia be gau ta lasi hunia dalana dekenai do ia karaia. Unai kara oi karaia dainai, namona be oi sibona tanobada ibounai dekenai do oi hedinarai henia.” 5 Inai bamona idia hereva badina be Iesu ena tadina danu ese idia abidadama henia lasi ia dekenai.

6 Vadaeni Iesu ia haere idia dekenai, ia gwau, “Lauegu nega be dohore, to umui dekenai nega ibounai be ia hegeregere. 7 Tanobada be do ia badu henia diba lasi umui dekenai, to lau dekenai be ia badu henia, badina be tanobada ena kara lau ese lau hedinaraia vadaeni ia be dika. 8 Umui be do umui daekau, unai aria dekenai do umui vareai, to lau be do lau daekau lasi, badina lauegu nega be do ia ginidae lasi.” 9 Ia ese unai bamona ia hereva idia dekenai, vadaeni Galilea dekenai ia do noho.

10 Iesu ena tadina sibona idia daekau, aria totona idia lao. Gabeai Iesu danu ia daekau hunia dekenai. 11 Vadaeni unai aria lalonai Iuda taudia ese idia tahua, idia gwau, “Iesu be edeseni?”

12 Taunimanima be Iesu totona idia hepapahuahu bada. Haida idia gwau, “Ia be tau namona.” Ma haida idia gwau. “Lasi, ia ese taunimanima ia hakaudia kerere.” 13 To tau ta ese ia hereva hedinaraia lasi Iesu totona, Iuda taudia dekenai idia gari dainai.

14 Aria ena dina haida be idia ore, to haida be do idia noho, Iesu be Dubu Helaga dekenai ia daekau, ia hadibaia hamatamaia. 15 Vadaeni Iuda taudia idia hoa, idia gwau, “Inai tau be ia sikuli lasi, to edena bamona ia diba momo?”

16 Iesu ia haere idia dekenai, ia gwau, “Lauegu hadibaia herevadia be lauegu lasi, to lau ia siaia Diravana ena. 17 Tau ta bema ia ura Dirava ena ura ia karaia neganai, ia ese lauegu hadibaia herevadia do ia diba, Dirava dekena amo idia mai, o lau sibona dekena amo. 18 Sibona ena ura herevadia ia gwauraia tauna be sibona dekenai hanamoa dala ia tahua, to ia siaia Diravana dekenai hanamoa dala ia tahua tauna be momokani tauna, bona iena lalona dekenai koikoi ia noho lasi. 19 Mose ese taravatu ia henia umui dekenai, ani? To edena bamona umui be taravatu umui badinaia lasi? Dahaka dainai lau umui alaia dalana umui tahua?”

20 Taunimanima idia haere ia dekenai, idia gwau, “Oi be oi kavakava, a? Daika ia ura oi do ia alaia?”

21 Iesu ia gwau, “Lau be kara tamona sibona lau karaia, vadaeni umui ibounai umui hoa, bona umui laloa momo. 22 Mose ese kopina utua ena taravatu ia henia vadaeni umui dekenai. Gau tamona Mose ese unai kara ia hamatamaia lasi, to iseda guna sene taudia ese. Unai dainai, umui be Sabati Dina dekenai memero edia kopina umui utua. 23 Sabati Dina dekenai mero ta ena usina kopina do umui utua, Mose ena taravatu do umui makohia garina, to edena bamona lau be umui badu henia, Sabati Dina dekenai tau ta lau hanamoa momokani dainai? 24 Gau edia toana sibona dekena amo do umui kota henia lasi, to do umui kota henia mai maoromaoro danu.”

25 Vadaeni Ierusalema taudia haida idia gwau, “Do idia alaia gwauraia tauna be inai, ani? 26 To ia be iniseni ia haroro, bona hereva ta idia gwau henia lasi ia dekenai. Sedira hanua lohia taudia edia lalona dekenai idia diba vadaeni ia be Keriso? 27 Gau tamona, inai tau ena mai gabuna be ita diba, to Keriso do ia mai neganai, be tau ta do ia diba lasi ia be edena gabu dekena amo ia mai.”

28 Vadaeni Iesu be Dubu Helaga lalonai ma ia hadibaia karaia, ia boiboi, ia gwau, “Umui be umui diba lau, bona lau mai gabuna danu umui diba, a? Lau be lau sibona egu ura dekenai lau mai lasi. Lau ia siaia Diravana be momokani, to umui be umui diba lasi ia. 29 Lau be lau diba ia, badina be ia dekena amo lau mai, bona ia ese lau ia siaia.”

30 Vadaeni ia idia dogoatao gwauraia, to tau ta ena imana ia kamokau lasi ia dekenai, badina be iena nega be do ia ginidae lasi. 31 To taunimanima momo herea ese Iesu dekenai idia abidadama henia. Idia gwau, “Keriso do ia mai neganai, ia ese toa do ia karaia neganai, inai tau do ia hereaia, a?”

32 Farisea taudia idia kamonai, taunimanima be unai bamona idia hereva Iesu totona, vadaeni dubu biagudia bona Farisea taudia ese edia hesiai taudia idia siaia, Iesu idia dogoatao totona. 33 Vadaeni Iesu ia gwau, “Nega sisina lau be umui dekenai do lau noho, vadaeni lau ia siaia Dirava dekenai do lau giroa lou. 34 Vadaeni lau do umui tahua, to lau be do umui davaria lasi, badina be lau noho gabuna dekenai danu do umui lao diba lasi.”

35 Vadaeni Iuda taudia sibona dekenai idia nanadaia, idia gwau, “Inai tau be edeseni do ia lao, vadaeni do ita davaria lasi ia gwau? Sedira Helene taudia edia hanua momo dekenai do ia lao, Iuda taudia haida idia noho gabudia, unuseni Helene taudia dekenai do ia hadibaia karaia, a? 36 Inai be dahaka hereva inai tau ese ia gwauraia, ia gwau, ‘Lau do umui tahua, to lau be do umui davaria lasi, bona do lau noho gabuna dekenai danu do umui lao diba lasi?’ ”

37 Aria ena dina orena be dina badana. Unai dina dekenai Iesu ia toreisi, ia gini, ia boiboi, ia gwau, “Ranu mase tauna be lau dekenai ia mai, ranu do ia inua. 38 Buka Helaga dekenai ia torea bamona, ‘Lau dekenai do ia abidadama henia tauna be, iena kudouna dekena amo mauri ranuna be sinavai bamona do ia heau lao.’ ” 39 Ia ese Lauma Helaga dekenai unai bamona ia herevalaia, ia idia abidadama taudia ese do idia abia ia gwau. Badina unai neganai Lauma Helaga be do ia henia lasi, Iesu ese Dirava ena hairaina do ia abia lasi dainai.

40 Taunimanima haida ese inai hereva idia kamonai, vadaeni idia gwau, “Momokani, ita naria noho Peroveta Tauna be inai.”

41 Ma haida idia gwau, “Inai be Keriso.”

Ma haida idia gwau, “Keriso be Galilea dekena amo do ia mai, a? 42 Buka Helaga dekenai ia torea, ani, Keriso be Davida ena bese dekena amo do ia vara, Betelehema, Davida ena hanua lalonai.”

43 Unai dainai, taunimanima be idia hapararaia Iesu totona. 44 Haida ese ia idia dogoatao gwauraia, to tau ta ese iena imana ia kamokau lasi Iesu dekenai.

45 Dubu biagudia bona Farisea taudia edia hesiai taudia be idia giroa lao, vadaeni dubu biagudia bona Farisea taudia ese idia nanadaia idia dekenai, idia gwau, “Badina be dahaka umui hakaua mai lasi?”

46 Hesiai taudia idia haere, idia gwau, “Hamatamaia nega dekena amo ia mai bona hari, tau ta ia hereva lasi inai tau ia hereva bamona.”

47 Farisea taudia idia gwau, “Be, umui danu ia ese ia koia vadaeni? 48 Sedira hanua edia lohia ta, o Farisea taudia ta ese ia dekenai idia abidadama vadaeni, a? Lasi momokani. 49 To inai ariara taunimanima be Mose ena taravatu idia diba lasi. Idia be Dirava dekena amo dika davana do idia davaria.”

50 Vadaeni Nikodemo ese ia hereva henia idia dekenai, ia be hanuaboi Iesu dekenai ia lao tauna, ia danu idia edia orea tauna ta. 51 Ia gwau, “Iseda taravatu ese tau ta do ia kota henia neganai, be iena hereva do idia kamonai guna, ani, bona iena kara do idia diba guna, ani?”

52 Vadaeni idia ese idia gwau henia, idia gwau, “Oi danu Galilea tauna, a? Do oi tahua, bona do oi diba, peroveta tauna ta Galilea dekenai do ia vara lasi.” 53 Vadaeni taunimanima ibounai idia toreisi, idia ta ta edia ruma, edia ruma dekenai idia lao.

<- IOANE 6IOANE 8 ->