4 Vadaeni lau Ieremia ese Baruku Neraia lau boiria. Bona Lohiabada ese lau ia hamaoroa hereva ibounai, be Baruku dekenai lau gwauraia, bona ia ese pepa ta dekenai ia torea.
5 Vadaeni Ieremia ese Baruku ia oda henia, ia gwau, “Idia ese lau idia koua, Dubu Helaga lau vareai diba lasi. 6 Unai dainai lau ura oi ese inai pepa, oi lau hadibaia, vadaeni oi torea gaudia ibounai be do oi abia, bona Dubu Helaga do oi raka vareai, inai pepa do oi duahia. Taunimanima ese aniani ania lasi taravatu idia karaia noho neganai, inai pepa do oi duahia. Mai gado bada do oi duahia, vadaeni idia ese Lohiabada ena hereva ibounai lau dekenai do idia kamonai diba. Iuda taudia ibounai, edia hanua ta ta dekena amo idia mai taudia danu dekenai inai pepa do oi duahia. 7 Badina be Lohiabada ena badu inai taudia dekenai be bada, bona edia kerere davana ia gwauraia be bada herea. Sedira inai taudia ese Lohiabada do idia noia, bona edia dika dekena amo do idia siri momokani.”
8 Vadaeni Baruku ese Ieremia ena hereva ibounai ia karaia, bona Lohiabada ena hereva be Dubu Helaga lalonai ia duahia. 9 Iehoiakimi, Iosaia ena natuna, be Iuda ena king lagani 5 bona hua 9 neganai, taunimanima ese aniani ania lasi taravatu idia karaia, Lohiabada ena laloa namo do idia davaria totona. Inai taravatu be Ierusalema noho taudia bona Iuda hanua dekena amo Ierusalema dekenai idia mai taudia ibounai idia karaia.
10 Vadaeni, unai taunimanima ibounai idia kamonai diba neganai, Baruku ese unai pepa, lau ese lau hadibaia gaudia, ia duahia. Unai bamona be Dubu Helaga lalonai ia karaia, Gemaraia Sapana ena daiutu lalonai. Gemaraia be toretore tauna badana. Iena daiutu be hebou daiutuna ta, ataiai gabuna dekenai ia noho, Dubu Helaga ena Iduara Matamatana raka vareai gabuna kahirakahira.
15 Opesa taudia ese Baruku idia hamaoroa, idia gwau, “Oi helai diho, pepa do oi duahia.” Vadaeni Baruku ese pepa ia duahia. 16 Unai hereva ibounai idia kamonai neganai, idia be mai gari bada danu idia ta ta dekenai idia hereva, vadaeni Baruku idia hamaoroa, idia gwau, “Inai hereva ibounai be king dekenai do ai hamaoroa.”
17 Bona opesa taudia ese Baruku idia nanadaia, idia gwau, “Mani ai dekenai oi hamaoroa, inai pepa be edena bamona oi torea? Sedira Ieremia ese ia gwauraia, vadaeni oi torea, ani?”
18 Vadaeni Baruku ia haere, ia gwau, “Umui hereva maoro. Ieremia ese inai hereva ibounai lau dekenai ia gwauraia, vadaeni lau ese inka dekena amo lau torea, pepa dekenai.”
19 Vadaeni opesa taudia ese Baruku dekenai idia hereva henia, idia gwau, “Oi lao, gabu ta dekenai do oi hunia, oi bona Ieremia danu. Bona umui hunia gabuna be tau ta do umui hamaoroa lasi.”
21 King be unai hereva ia kamonai, vadaeni ia ese Iehudi ia siaia lao, unai pepa do ia abia totona. Iehudi ese Elisama ena daiutu dekena amo pepa ia abia, king dekenai ia abia lao. Vadaeni Iehudi ese king bona king ena badibadinai idia gini opesa taudia edia vairanai pepa ia duahia.
22 Inai kara be hua namba 9 lalonai ia vara, keru neganai. Inai neganai king be iena ruma, keru neganai ia noho gabuna lalonai ia helai, lahi ena vairanai, iena kopina hasiahua totona. 23 Iehudi ese pepa kahana ibounai ia duahia noho, vadaeni kahana ta ta ia duahia haorea neganai king ese kaia maragina dekena amo pepa ia utua, bona lahi dekenai ia negea. King ese pepa ena kahana ibounai ia utua, bona lahi dekenai ia gabua ore. 24 To king bona iena opesa taudia, unai pepa ena hereva idia kamonai taudia, be idia gari lasi, bona lalohisihisi ena toana ta idia hedinaraia lasi.
25 Elanatana bona Delaia, bona Gemaraia ese king idia noia goada, ia ese pepa do ia gabua lasi, to ia ese idia ia kamonai henia lasi. 26 Vadaeni king ese iena natuna mero Ierahamele, bona Seraia, Asariela ena natuna, bona Selemaia, Abadele ena natuna, ia oda henidia, lau Ieremia bona egu toretore tauna Baruku do idia dogoatao. To Lohiabada ese ai ia hunia vadaeni.
29 Ma Lohiabada ese lau dekenai ia hamaoroa, iena hereva be king Iehoiakimi dekenai do lau hamaoroa, do lau gwau: “Oi ese unai pepa oi gabua, bona oi ese Ieremia oi nanadaia, badina dahaka pepa dekenai ia torea, Babulonia ena king be momokani do ia mai, inai tano do ia hadikaia, bona tano ena taunimanima bona ubua gaudia do ia alaia mase. 30 Unai dainai lau Lohiabada ese oi lau hamaoroa inai, oi king Iehoiakimi, oiemu kara dainai oiemu natuna o tubuna ta ese king dagi do ia abia diba lasi, bona Davida ena basileia do ia gunalaia diba lasi. Bona oi Iehoiakimi oi mase neganai, oiemu tauanina be tano dekenai do idia negea kava, bona dina lalonai, dina ena siahu do ia hadikaia, bona hanuaboi neganai, aisi ese danu do ia hadikaia.
31 “Lau Lohiabada ese oi, bona oiemu natuna, bona oiemu opesa taudia do lau panisia, emui kara dikadia dainai. Oi, bona Ierusalema taudia, bona Iuda taudia ibounai ese lauegu sisiba ibounai umui kamonai henia lasi. Unai dainai umui ibounai emui latanai dika bada, lau ese lau gwauraia vadaeni gauna do lau hadihoa momokani.”
32 Vadaeni Ieremia ese pepa ta ma ia abia, toretore tauna Baruku Neraia dekenai ia henia. Vadaeni king Iehoiakimi ia gabua vadaeni pepa dekenai ia torea hereva, be Ieremia ese ma ia gwauraia lou, bona Baruku ese inai hereva ibounai inai pepa matamata dekenai ia torea. Unai bamona hereva ma haida, Ieremia ese ma ia gwauraia gaudia, danu be pepa dekenai ia torea.
<- IEREMIA 35IEREMIA 37 ->