1 Unai lagani tamona lalonai Sedekaia, Iuda ena king ena lohia lagani namba 4 ena hua namba 5 lalonai, Hananaia Asuru, peroveta tauna Gibeona dekena amo, ese lau dekenai ia hereva, Lohiabada ena Dubu lalonai, hahelagaia taudia bona taunimanima ibounai edia vairana dekenai, ia gwau, 2 “Siahu Ibounai Lohiabada, Israela ena Dirava, be inai bamona ia hereva noho, ia gwau, ‘Lau ese Babulonia ena king ena siahu lau hamakohia vadaeni. 3 Lagani rua do idia ore lasi neganai, Lohiabada ena Dubu ena kohu ibounai, Nebukanesa, Babulonia ena king, ese inai gabu dekena amo ia abia, Babulonia dekenai ia abia lao gaudia, be lau ese do lau abia lou inai gabu dekenai. 4 Bona Iuda ena king Iehoiakini, Iehoiakimi ena natuna, bona Iuda dekena amo Babulonia dekenai idia abia lao taudia ibounai danu, be lau ese do lau hakaudia lou mai inai gabu dekenai, badina be Babulonia king ena siahu do lau hamakohia momokani. Lau inai Lohiabada lau hereva vadaeni.’ ”

5 Vadaeni peroveta tauna Ieremia ese peroveta tauna Hananaia ia hereva henia, hahelagaia taudia bona Lohiabada ena Dubu lalonai idia gini noho taudia ibounai edia vairana dekenai. 6 Peroveta tauna Ieremia ia gwau, “Amen! Lohiabada ese unai bamona do ia karaia be namo. Lohiabada ese oiemu peroveta hereva do ia hamomokania be namo. Lau ura bada Lohiabada ena Dubu kohudia ibounai bona abia mauri taudia danu be Babulonia dekena amo do idia abia mai lou inai gabu dekenai. Unai bamona bema ia vara be namo. 7 To lau ese inai hereva oiemu vairana dekenai bona taunimanima ibounai edia vairana dekenai lau gwauraia inai, do umui kamonai: 8 Peroveta taudia gunadia, ita ruaosi do mauri lasi neganai, nega gunadia dekena amo, tuari bona hitolo bona hanaia gorere dikadia be tano momo, bona basileia badadia edia latanai idia perovetalaia. 9 To maino ia perovetalaia tauna, be ita diba lasi unai peroveta hereva ia momokani o lasi. To gabeai, bema iena hereva be momokani ia vara, unai neganai sibona do ita diba Lohiabada ese unai peroveta tauna ia siaia mai, bona ia dekenai ia hereva vadaeni.”

10 Vadaeni peroveta tauna Hananaia ese maduna auna be peroveta tauna Ieremia ena aiona dekena amo ia kokia, bona ia hamakohia. 11 Bona Hananaia be taunimanima ibounai edia vairana dekenai ia hereva, ia gwau: “Lohiabada be inai bamona ia hereva, ia gwau: Lau ese inai bamona do lau karaia Nebukanesa, Babulonia ena king dekenai. Nebukanesa ese bese ibounai edia aiodia dekenai ia atoa maduna inai bamona do lau hamakohia. Bona lagani rua do idia ore lasi lalonai, inai kara do lau karaia.” Vadaeni lau Ieremia ese unai gabu lau rakatania.

12 Peroveta tauna Hananaia ese maduna auna be Ieremia ena aiona dekena amo ia hamakohia murinai, nega sisina ia lao vadaeni, bona Lohiabada ena hereva be Ieremia dekenai ma ia ginidae, ia gwau, 13 “Ieremia e, oi lao, Hananaia do oi hamaoroa, oi gwau, ‘Lohiabada ia hereva inai: Oi ese maduna auna oi hamakohia vadaeni, to lau ese maduna ma ta, auri gauna, do lau karaia, au gauna ena gabu do ia abia. 14 Badina be Siahu Ibounai Lohiabada, Israela ena Dirava, be inai bamona ia hereva, ia gwau: Lau ese inai bese ibounai edia aiodia dekenai auri maduna lau atoa vadaeni, Nebukanesa, Babulonia ena king, ena hesiai gaukara gaudia, bona idia ese iena hesiai gaukara do idia karaia momokani, badina lau ese tanobada ena boroma dagedagedia danu be Nebukanesa ena siahu henunai lau atodia vadaeni.’ ”

15 Vadaeni peroveta tauna Ieremia ese peroveta tauna Hananaia ia hamaoroa, ia gwau, “Hananaia e, oi kamonai! Lohiabada ese oi ia siaia lasi, bona oi ese inai bese taudia edia lalodia oi ania vadaeni, oiemu hereva koikoi do idia abidadama henia totona. 16 Unai dainai, Lohiabada be inai bamona ia hereva inai, ia gwau, ‘Kamonai, lau ese inai tanobada ena kopina dekena amo oi do lau kokia lao. Hari inai lagani lalonai oi be do oi mase, badina be Lohiabada dekenai dagedage hereva oi gwauraia vadaeni.’ ”

17 Unai lagani tamona lalonai, hua namba 7 lalonai, peroveta tauna Hananaia be ia mase.

<- IEREMIA 27IEREMIA 29 ->