1 Lauegu varavara taudia e, ita be Lohiabada Iesu Keriso ita abidadama henia noho. Ia be guba ena hairai diarina ena Lohiabada momokani. Unai dainai namo lasi umui ese toana namo o dagi bada taudia do umui laloa bada, to ogogami bona dagi lasi taudia do umui laloa maragi. Unai be maoro lasi. 2 Sedira kohu momo tauna ta, mai ena imana kwakikwakina rini, golo gauna, bona mai ena dabua namodia danu emui dubu lalonai ia raka vareai. Ma ogogami tauna ta, mai ena dabua dikana, be emui dubu do ia raka vareai danu. 3 Sedira dabua namona tauna do umui hereva henia, do umui gwau, “Mani emu kara, inai helai gauna namona dekenai do oi helai.” To ogogami tauna dekenai do umui hereva henia, do umui gwau, “Unuseni do oi gini noho, o foloa dekenai do oi helai, lauegu aena badinai.” 4 Bema unai bamona umui karaia neganai, umui be mai emui kerere. Emui kerere be inai: Maka tamona dekenai taunimanima umui kara henidia lasi, to mai emui laloa maoromaoro lasi danu, taunimanima edia toana sibona umui itaia, bona idia edia kara umui laloa kerere, kota biaguna dikana ia karaia bamona.

5 Lauegu varavara taudia e, lauegu lalokau, umui kamonai. Inai tanobada ena ogogami taudia be Dirava ese ia abia hidi vadaeni, iena Basileia do idia abia totona. Inai Basileia be Dirava ia gwauhamata vadaeni, ia idia lalokau henia taudia ese do idia abia. Oibe, ogogami taudia edia abidadama, be guba ena kohu momo bamona, badina be Dirava ena Basileia lalonai do idia vareai. 6 To umui ese ogogami taudia umui matauraia lasi. Daika ese umui idia dagedage henia, bona umui idia doria lao kota dekenai? Kohu momo taudia, ani? 7 Idia ese emui ladana namona, Dirava ese umui dekenai ia henia gauna, idia hadikaia noho, ani?

8 Unai dainai, namona be Basileia ena Taravatu do umui badinaia. Inai Taravatu badana be Buka Helaga lalonai ia torea, ia gwau, “Oiemu badibadinai ia noho tauna do oi lalokau henia, oi sibona oi lalokau henia bamona.” Bema inai Taravatu umui badinaia neganai, kara namo herea umui karaia noho. 9 To bema taunimanima edia toana dekena amo umui kara henidia, kara dika umui karaia inai. Bona inai Taravatu ese umui ia gwauraia kerere. 10 Badina be bema tau ta ese Taravatu momo herea ia badinaia, to tamona sibona ia badinaia lasi, ia be mai ena kerere, Taravatu ibounai ia utua tauna hegeregerena. 11 Badina be Dirava ese inai Taravatu ia gwauraia, “Do umui heudahanai lasi,” bona inai Taravatu danu ia gwauraia, “Taunimanima do umui alaia lasi.” Vadaeni, bema oi heudahanai lasi, to tau ta oi alaia, oi be Taravatu oi utua vadaeni. 12 Umui ese inai bamona do umui laloa be namo: Vaira neganai Dirava ese umui do ia kota henia Taravatu dekena amo. Inai Taravatu ese kara dika ena siahu dekena amo ita ia ruhaia noho. Unai dainai do umui hereva namonamo, bona noho namonamo, unai Taravatu hegeregerena. 13 Badina be bogahisihisi ia henia lasi tauna ese Dirava dekena amo bogahisihisi do ia davaria lasi. To bogahisihisi ia henia tauna ese Kota Biaguna ena bogahisihisi do ia davaria.

14 Lauegu varavara taudia e, tau ta bema ia gwau ia be abidadama tauna, to kara namona ta ia karaia lasi, iena namo be dahaka, a? Abidadama ese ia do ia hamauria diba, a? 15 Sedira Keristani tadikaka ta o taihuna ta be dabua lasi, bona ia be aniani lasi. 16 Vadaeni umui ta ese bema ia hamaoroa, ia gwau, “Dirava ese oi do ia hanamoa, oi ese oiemu kopina do oi hasiahua, bona do oi boga kunu.” Bema unai bamona umui hamaoroa, to dabua ta o aniani ta umui henia lasi neganai, emui hereva be anina lasi. 17 Abidadama danu be inai bamona. Bema abidadama sibona ia noho, to kara be lasi, unai abidadama be anina lasi.

18 To tau ta sedira ia hereva, ia gwau, “Oi be mai oiemu abidadama, to lau be mai lauegu kara namodia.” Vadaeni, lauegu haere be inai bamona, “Tau ta mai ena abidadama, to mai ena kara lasi, unai bamona tauna ta ia noho, a? Lasi momokani. To lau ese egu abidadama do lau hamomokania egu kara namodia dekena amo.” 19 Oi ese inai oi abidadama henia: “Dirava korikori be tamona,” a? Namo, to lauma dikadia danu unai bamona idia abidadama, bona mai gari danu idia heudeheude noho. 20 Oi kavakava tauna e, bema oi abidadama, to kara namodia oi karaia lasi, vadaeni oiemu abidadama be anina lasi. Inai anina oi diba lasi, a?

21 Gunaguna iseda tamana Aberahamo ese iena natuna Isako be pata helagana ena latanai boubou totona ia atoa neganai, Dirava ese ia gwauraia maoromaoro. Oibe, Dirava ese Aberahamo ena kara namona ia itaia dainai, ia gwauraia maoromaoro. 22 Oi itaia, Aberahamo ena abidadama be iena kara namona danu nega tamona idia gaukara. Bona unai dainai iena kara namodia ese iena abidadama idia hamomokania vadaeni. 23 Buka Helaga ena hereva be momokani, ani? Ia gwau, “Aberahamo ese Dirava ia abidadama henia, bona iena abidadama dainai Dirava ia gwau ia be maoromaoro vadaeni.” Unai dainai idia gwau Aberahamo be Dirava ena turana. 24 Unai dainai umui itaia, kara namodia dainai, taunimanima be Dirava ena vairanai idia maoromaoro, abidadama sibona dainai lasi.

25 Unai bamona danu, ariara hahine Rahaba be iena kara dainai Dirava ena vairanai ia maoromaoro. Badina be ia ese Israela ena hesiai taudia iena ruma dekenai ia abidia dae, bona dala idauna dekena amo ia siaidia lao, vadaeni idia heau mauri.

26 Ita diba, tauanina bema mai ena lauma lasi, ia be mase gauna, ani? Vadaeni unai bamona danu, abidadama mai ena kara namodia lasi, be mase gauna.

<- IAMESI 1IAMESI 3 ->