8 Iuda ena magu ibounai be idia hamakohia vadaeni.
Unai bamona ia vara neganai, umui Ierusalema taudia ese tuari gaudia be edia haboua ruma dekena amo umui abidia. 9 Umui ese Davida ena hanua ena magu umui itaia, gabu momo idia dika. 10 Bona umui ese Ierusalema ena ruma ibounai umui itaia, bona haida umui veria diho, edia nadi umui abia, hanua ena magu do umui hanamoa totona. 11 Umui ese danu, ranu haboua gabuna, be magu ruaosi edia huanai umui karaia, Gohu Gunana ena ranu do umui haboua totona. To umui ese ia karaia Diravana umui laloa lasi. Umui ese idaunegai inai kara ia palania Diravana umui kamonai henia lasi.
12 Unai dina dekenai,
Siahu Ibounai Lohiabada ese umui ia boiboi henia,
do umui taitai,
bona mai lalohisihisi danu,
emui kwaradia huina do umui kakasia,
bona puse dabua do umui karaia totona.
13 To umui ese moale bada umui karaia.
Boromakau bona mamoe umui alaia,
vamu umui ania, bona uaina umui inua, umui gwau,
“Do ita aniani bona inuinu,
badina be kerukeru do ita mase.”
14 Siahu Ibounai Lohiabada ese lau dekenai ia hereva henia,
ia gwau,
“Inai emui kara dika,
be do lau gwauatao lasi,
ela bona do umui mase.
Lau, Siahu Ibounai Lohiabada,
be inai bamona lau hereva vadaeni.”
Eliakimi ese Sebina ena gabuna do ia abia
15 Siahu Ibounai Lohiabada ese lau ia hamaoroa, ia gwau, “Oi toreisi, king ena ruma ia naria tauna Sebina dekenai do oi lao, do oi hamaoroa, oi gwau: 16 Oiemu guria gabuna be dahaka dainai oi geia noho inai ororo nadi ena lalonai? Daika ese oi dekenai gwaumaoro ia henia, oi sibona emu guria gabuna iniseni do oi geia?
17 “Sedira oi be tau badana ta. To Lohiabada ese oi do ia abia isi, bona mai dagedage danu oi do ia negea daudau herea. 18 Ia ese oi do ia dogoatao, bolo bamona, bona tano badana ta dekenai oi do ia negea lao. Unuseni do oi mase, bona unuseni danu oiemu kariota namodia do idia hekure kava. Oiemu biaguna, oiemu king, ese oi totona do ia hemarai momokani. 19 Lau ese oiemu dagi be oi dekena amo do lau kokia, bona oiemu gaukara gabuna dekena amo oi do lau hadokoa.”
20 Lohiabada ese Sebina ia hamaoroa, ia gwau, “Unai dina dekenai, lau ese egu hesiai tauna Eliakimi Hilekaia do lau boiria, 21 bona oiemu dagi ena dabua do lau kokia, Eliakimi dekenai do lau henia. Oiemu gaba gauna danu be Eliakimi dekenai do lau henia. Oiemu siahu danu be ia dekenai do lau henia. Vadaeni ia be Ierusalema noho taudia bona Iuda iduhu taudia edia tamana do ia lao. 22 Lau ese Davida ena ruma ena ki be Eliakimi ena pagana ena latanai do lau atoa. Vadaeni ia ese do ia kehoa, bona ta ese do ia koua diba lasi. Bona ia ese do ia koua, bona ta ese do ia kehoa diba lasi. 23 Lau ese Eliakimi do lau ha-aukaia, ikoko bamona, bona gabu aukana ta dekenai do lau kokoa. Vadaeni ia be iena bese taudia edia matauraia tauna badana do ia lao.
24 “To iena tamana ena iduhu taudia bona iena varavara taudia ibounai ese Eliakimi do idia hametaua. Idia ese ia dekenai do idia taua dae, uro bona kapusi be ikoko dekenai idia taua dae hegeregerena. 25 Unai bamona ia vara neganai, ikoko, lau ese lau kokoa auka gauna be do ia makohia, bona do ia moru, bona iena latanai idia noho gaudia danu do idia moru. Lau, Siahu Ibounai Lohiabada ese lau hereva vadaeni inai.”
