ISAIA
1 Isaia, Amoso ena natuna, be Iuda tano ena king Usaia, king Iotama, king Ahasa, bona king Hesekaia edia nega dekenai ia noho. Dirava ese mata hanai dekenai, gau momo Isaia dekenai ia hedinaraia, Iuda bona Ierusalema totona gaudia. Isaia ena buka ena anina be inai.
Dirava ese iena bese ia gwau henia
2 Lohiabada ia gwau,
“Guba bona tanobada e,
lauegu hereva do umui kamonai!
Lauegu natuna taudia lau ubua,
bona lau hadibaia namonamo,
to idia ese lau idia dagedage henia vadaeni.
3 Boromakau be edia biaguna idia diba,
bona doniki be,
edia biaguna ese edia aniani ia atoa gabuna idia diba.
To Israela, egu bese taudia,
be gau ta idia diba lasi momokani.”
4 Kara dika besena e!
Emui kerere ese umui ia hametaua noho.
Umui be dika taudia momokani,
bona kara koikoi dekenai umui manada vadaeni.
Umui ese Lohiabada umui rakatania vadaeni.
Umui ese Israela ena Dirava Helagana umui negea vadaeni,
bona ia dekena amo umui raka siri vadaeni.
5 Badina dahaka Dirava dekenai umui dagedage noho?
Umui ura be panisi umui davaria lou, davaria lou, a?
Israela tano e, oiemu kwarana,
be idia haberoa vadaeni,
bona oiemu kudouna danu be ia manoka noho.
6 Oiemu aena ela bona oiemu kwarana dekenai,
gabu namona ta ia noho lasi,
to bero bona toto,
bona gudu momo idia noho.
Bona bero ena rara be idia huria lasi, idia kumia lasi,
bona muramura idia atoa lasi.
7 Israela taudia e,
emui tano be ia dika,
aniani ia havaraia diba lasi.
Emui hanua be lahi ese ia gabua ore.
Idau taudia ese emui tano ena anina idia abia,
bona gau ibounai idia hadikaia noho.
Edia kara umui itaia noho,
to umui goada lasi dainai,
edia kara umui hadokoa diba lasi.
8 Ierusalema be sibona ia noho,
vain uma naria tauna ena au raurau ruma bamona,
kiukamba umana ena ruma maragina bamona.
Ia be tuari taudia ese idia koua hagegea hanua bamona.
9 Bema Siahu Ibounai Lohiabada ese iseda Iuda taudia,
idia do noho taudia,
ia hamauria lasi neganai,
ita be Sodoma bona Gomora taudia hegeregere do ita lao.
10 Ierusalema e,
oiemu lohia taudia bona gunalaia taudia,
be Sodoma bona Gomora edia lohia taudia bamona.
Ierusalema taudia e,
Lohiabada ena hadibaia hereva do umui kamonai.
11 Lohiabada ia gwau,
“Umui laloa lau be emui boubou gaudia lau ura henia, a?
Lasi, emui mamoe umui gabua,
bona emui boromakau edia digara,
umui gabua gaudia lau abia,
be ia davana vadaeni lau dekenai.
Lau be boromakau, bona mamoe,
bona nanigosi edia rarana dekenai lau hesiku vadaeni.
12 Lauegu vairana dekenai umui haboua mai neganai,
daika ese umui ia hamaoroa,
egu Dubu Helaga do umui moia kava, moia kava?
13 Harihari gaudia,
anina lasi gaudia haida ma,
do umui mailaia lasi,
badina be emui muramura mai bonana,
be gau dikana lau dekenai.
Emui Hua Matamata Aria,
emui Sabati,
bona emui guriguri hebou,
be emui kara dika ese ia hamiroa vadaeni.
14 Emui Hua Matamata Aria,
bona dina helagadia,
be lau ura lasi momokani.
Idia be gau metauna lau dekenai,
huaia dekenai lau hesiku momokani.
15 Emui imana guriguri totona umui abia isi neganai,
lau ese egu vairana umui dekena amo do lau hunia.
Sedira guriguri momo do umui gwauraia,
to lau be do lau kamonai lasi,
badina emui imadia be rara dekenai idia honu vadaeni.
16 Umui sibona do umui huria,
do umui goeva totona.
Inai umui karaia noho kara dika be do umui hadokoa.
Io, inai emui kerere do umui hadokoa,
17 bona kara namo karaia dalana do umui tahua.
Kota maoromaorona do umui tahua,
bona mai dagedage danu taunimanima idia hisihisi henidia taudia,
edia kara do umui koua.
Mai edia tamana lasi natuna maragidia do umui durua,
bona vabu danu do umui gimaia,
haida ese do idia hadikaia lasi.”
18 Lohiabada ma ia hereva, ia gwau,
“Harihari umui mai, ita hereva hebou.
Momokani, umui emui dika be bada,
rara ia kakakaka momokani bamona,
to lau ese umui do lau huria,
vadaeni do umui goeva,
sinou ia kurokuro bamona.
Momokani emui miro be kakakaka herea,
to lau huria neganai ia be kurokuro,
mamoe ena huina hegeregerena.
19 Bema lau dekenai umui kamonai henia neganai,
tano ena anina namona do umui ania.
20 To bema lau dekenai umui dagedage,
bona lau dekenai umui kamonai henia lasi neganai,
umui be tuari kaia dekena amo do umui mase.
Lau inai Lohiabada,
lau hereva vadaeni.”
Ierusalema hanua ese kara dika bada ia karaia
21 Unai hanua, guna ia be kara momokani hanuana,
to hari ia be ariara hahine hegeregerena ia lao vadaeni.
Guna be kara maoromaoro taudia momo,
Ierusalema dekenai idia noho,
to hari be ala-ala taudia sibona,
Ierusalema lalonai idia noho.
22 Ierusalema e,
guna oi be siliva bamona,
to hari oi be anina lasi.
Guna oi be uaina namona bamona,
to hari oi be ranu sibona bamona.
23 Oiemu lohia taudia be dagedage taudia.
Edia turana taudia be henaoa taudia.
Idia ibounai ese moni bona harihari gaudia,
be koikoi kara dekena amo idia abia.
Idia ese tamana lasi maragidia idia durua lasi,
bona idia ese vabu idia gimaia lasi,
dagedage taudia dekena amo.
24 Unai dainai Lohiabada,
Siahu Ibounai Lohiabada,
Israela ena Dirava Goadana,
be inai bamona ia hereva, ia gwau,
“Lau dekenai umui dagedage taudia e,
emui kerere davana do lau henia momokani,
bona umui ese lau do umui dagedage henia lou lasi.
25 Lau ese umui dekenai egu imana do lau atoa,
umui do lau hagoevaia,
lahi ese auri ia hagoevaia bamona.
Umui emui miro ibounai do lau kokia momokani.
26 Ierusalema taudia e,
umui dekenai kota naria taudia namodia,
bona lohia namodia do lau henia,
gunaguna umui idia naria taudia bamona.
Unai neganai Ierusalema be do idia gwauraia,
ia be kara maoromaoro bona kara momokani hanuana.”
27 Lohiabada be maoromaoro dainai,
ia ese Ierusalema do ia hamauria.
Ia dekenai idia noho taudia edia lalona idia giroa neganai,
Lohiabada ese idia do ia hamauria.
28 To dagedage taudia,
bona kara dika taudia ibounai,
be Lohiabada ese do ia hadikaia ore.
Bona ia ese ia idia rakatania taudia ibounai,
be do ia alaia ore.
29 Badina be unai au namodia,
umui tomadiho henia gaudia,
idia dainai do umui hemarai.
Bona unai uma helagadia,
tomadiho totona umui geia gaudia,
be hemarai gauna momokani umui dekenai do idia lao.
30 Bona do umui mase lao,
au kaukau ia mase lao bamona.
Umui be ranu ia noho lasi umana bamona do umui lao.
31 Rei kakoro be lahi ese ia gabua ore haraga, ani?
Unai bamona danu,
goada tauna be iena kara dika ese ia do idia hadikaia ore.
Unai tau bona iena gaukara danu,
lahi ese,
ruaosi do ia gabua nega tamona,