1 Vadaeni Isako ese Iakobo ia boiria, ia hanamoa, ia hamaoroa, ia gwau, “Kanana taudia edia natuna ta do oi adavaia lasi. 2 Mesopotamia dekenai do oi lao, oiemu tubuna Betuela ena ruma dekenai do oi daekau, oiemu vavana Labana ena natuna kekeni ta do oi adavaia. 3 Vadaeni Siahu Ibounai Dirava ese oi do ia hanamoa, oiemu bese do ia havaraia, bona do ia habadaia, bese bada herea umui do ia halaoa. 4 Dirava ese Aberahamo dekenai hanamoa ia henia, be oi dekenai do ia henia danu, oiemu natuna bona tubuna dekenai do ia henia danu. Ma inai idau gabu dekenai oi noho tanona, Dirava ese Aberahamo dekenai ia henia tanona do oi abia, oiemu tano korikori dekenai do oi halaoa.” 5 Vadaeni Isako ese Iakobo ia siaia lao. Ia be Mesopotamia dekenai ia lao, Labana Betuela, Aramea tauna, dekenai. Unai Labana be Rebeka ena taihuna, Rebeka be Iakobo bona Esau edia sinana.
Esau ese adavana ma ta ia abia
6 Esau ia diba vadaeni, Isako ese Iakobo ia hanamoa vadaeni bona ia siaia lao vadaeni, Mesopotamia dekenai do ia headava. Esau danu ia diba vadaeni, ia hanamoa neganai, Isako ese Iakobo ia hamaoroa, ia gwau, “Kanana taudia edia natuna ta do oi adavaia lasi.” 7 Ia diba danu Iakobo be iena tamana bona iena sinana edia gadona ia kamonai henia vadaeni, Mesopotamia dekenai ia lao. 8 Vadaeni Esau ena lalona ia kehoa, iena tamana Isako ese Kanana hahine taudia dekenai ia ura henia lasi. 9 Unai dainai, Esau be Isamaela dekenai ia lao, Isamaela, Aberahamo ena natuna ena kekeni Mahalata, Nebaioto ena taihuna, ia adavaia, to iena adavana gunadia ruaosi be idia do noho.
Iakobo ena nihi Betele dekenai
10 Iakobo ese Bere Sieba ia rakatania, Harana dala dekenai ia raka. 11 Vadaeni gabu ta dekenai ia ginidae, unuseni ia noho ela bona dabai gwauraia, badina be dina ia diho vadaeni. Vadaeni unai gabu ena nadi ta ia abia, iena kwarana atoa totona, vadaeni ia hekure diho, ia mahuta. 12 Vadaeni ia nihi, iena nihi dekenai vadavada ta ia itaia, tano dekena amo ia daekau ia lao bona guba, bona Dirava ena aneru unai dekena amo idia daekau, idia diho noho. 13 Lohiabada be vadavada ena dokona ataiai ia gini, ia gwau, “Lau be Lohiabada, oiemu tubuna Aberahamo ena Dirava, oiemu tamana Isako ena Dirava danu, lau ese inai oi mahuta noho tanona do lau henia oi dekenai, oiemu natuna bona tubuna danu dekenai do lau henia. 14 Oiemu natuna bona oiemu tubuna danu dohore idia momo herea, tano ena kahu bamona, dina ia diho kahana dekenai bona dina ia daekau kahana dekenai, bona mirigini kahana dekenai, bona diho kahana dekenai, dohore idia momo herea. Oi dainai bona oiemu natuna, oiemu tubuna dainai, tanobada ena bese ibounai ese hanamoa do idia davaria. 15 Dohore lau durua oi, oi lau henia gabudia ibounai dekenai do lau naria oi, bona oi be do lau hakaua mai lou inai tano dekenai. Lau ese oi do lau rakatania lasi, ela bona oi dekenai lau hereva henia kara ibounai do lau karaia haorea.”
16 Iakobo be mahuta dekena amo ia noga, ia gwau, “Momokani, Lohiabada be inai gabu dekenai, to lau diba lasi.” 17 Vadaeni iena kudouna dekenai ia hoa mai gari danu, ia gwau, “Inai gabu be mai gari danu. Dirava ena ruma be inai, guba ena iduara be inai.”
18 Daba maragi neganai Iakobo ia toreisi, iena kwarana ia atoa nadina ia haginia, laloatao nadina ia halaoa. Bona unai nadi ena latanai dehoro ia bubua, nadi be Dirava dekenai ia henia totona. 19 Vadaeni unai gabu ena ladana ia atoa Betele, ena anina be “Dirava ena Ruma”, to unai gabu ena ladana gunana be Lusu.
20 Vadaeni Iakobo ia gwauhamata, ia gwau, “Lohiabada Dirava e, bema oi durua lau dekenai, inai lau raka ena dala dekenai lau do oi naria, aniani do oi henia lau dekenai, bona dabua danu, 21 ela bona lauegu tamana ena ruma dekenai do lau giroa mai lou, mai maino danu, unai neganai, oi Lohiabada be lauegu Dirava do lau halaoa. 22 Inai laloatao nadina danu hari lau haginia be Dirava ena ruma dekenai do lau halaoa. Gau ibounai lau dekenai do oi henia be dohore lau haria karaia, kahana ibounai 10, bona kahana ta do lau henia oi dekenai.”
