1 Unai tau ese Dubu Helaga ena raka vareai gabuna dekenai lau ia hakaua lao. Ranu be Dubu ena raka vareai gabuna ena henuna dekena amo ia heau daekau mai, bona ia heau lao dina daekau kahana dekenai, badina Dubu Helaga be dina daekau kahana ia vaira henia. Inai ranu ia heau hamatamaia gabuna be Dubu Helaga ena diho kahana ena henunai, bona ia heau lao dalana be boubou patana ena diho kahana dekena amo ia lao dina daekau kahana dekenai. 2 Vadaeni unai tau ese lau ia hakaua lao, Dubu Helaga dekena amo ai raka murimuri dekenai mirigini kahana magu iduara dekena amo. Ma ia ese murimuri kahana dekenai lau ia hakaua, ela bona dina daekau kahana murimurina magu iduara dekenai. Unuseni lau itaia, ranu sisina be unai magu iduara ena diho kahana dekenai ia heau lao noho.

3 Unai tau be dina daekau kahana ia raka, ranu ia lao dalana. Ia be mai ena lata tohoa varona iena imana dekenai, vadaeni ia ese unai ia heau noho ranu ena lata ia abia 500 mita, bona ia ese lau ia hamaoroa unai ranu lalonai do lau raka lao unuseni. Unai ranu ena dobu be egu aena garugaru dekenai sibona. 4 Vadaeni ia ese ma 500 mita edia lata ia abia, bona unai maka dekenai ranu ena dobu be egu tuina dekenai. Iena varo dekenai ma 500 mita ia abia, bona unuseni ranu ena dobu be egu gaba dekenai. 5 Ma 500 mita edia lata ia abia, vadaeni ranu be sinavai ta, lau raka hanaia diba lasi, badina ranu be ia dobu, egu hanaia dala tamona be, nahu dekenai sibona. 6 Unai tau ese lau ia nanadaia, ia gwau, “Tanobada tauna e, inai gauna oi itaia namonamo, a?”

Vadaeni ia ese lau ia hakaua lao sinavai ena isena dekenai. 7 Unuseni lau ese au momo herea lau itaia, sinavai ena isena kahana kahana dekenai. 8 Vadaeni ia ese lau ia hamaoroa, ia gwau, “Inai ranu be dina daekau kahana dekenai ia heau lao noho, ia lao bona Ioridane Sinavai ena koura dekenai, bona unai dekena amo Davara Mase dekenai do ia heau vareai. Davara Mase dekenai inai sinavai ena ranu do ia vareai neganai, ia ese iena damena do ia kokia, bona davara ena ranu be damena lasi ranu do ia halaoa.

9 “Unai sinavai ia heau lao gabudia ibounai dekenai mauri gaudia idauidau be do idia vara momo. Bona gwarume idauidau danu momo herea be ranu gabudia momo lalonai do idia noho, unai sinavai ena heau dainai. Unai sinavai ese Davara Mase ena ranu be damena lasi ranu do ia halaoa, bona ia heau lao gabudia ibounai dekenai mauri do ia havaraia. 10 Gwarume abia taudia be Davara Mase ena badinai do idia gini. Bona Ene Gedi dekena amo ela bona Enegalaimi dekenai edia reke do idia hakaukaua. Idia ese gwarume idauidau do idia abia, Davara Badana dekenai idia abia gwarume hegeregerena.

11 “To Davara Mase kahirakahira idia noho gohu maragidia bona ranu gabudia haida edia ranu ena damena be do ia noho. Taunimanima ese unai ranu gabudia dekena amo damena do idia abia noho diba. 12 Unai sinavai isena ena kahana kahana dekenai huahua audia idauidau ibounai do idia vara. Edia rauraudia do idia kakoro lao lasi, bona edia huahua do idia moru kava lasi, to huahua momo do idia atoa nega ibounai, doko lasi. Hua ibounai lalonai, huahua do idia atoa, badina Dubu Helaga dekena amo ia heau mai sinavai ese ranu momo ia henidia noho dainai. Inai au edia huahua be aniani gaudia, bona edia rauraudia ese taunimanima edia gorere do idia hanamoa.”

13 Lohiabada Dirava ia gwau, “Israela ena iduhu 12 edia huanai tano do umui haria, to Iosepa ese tano kahana rua do ia abia. 14 Lau ese emui sene taudia dekenai gwauhamata metau lau henia, inai tano idia dekenai do lau henia. Unai dainai hari do umui haria, iduhu ibounai edia ahuna be hegeregere. Inai tano be emui ahuna korikori do ia lao.

15 “Tano ena hetoana be inai: Mirigini kahana dekenai: Davara Badana dekena amo ia matamaia, ia lao, Hetelono dekena amo ia lao, ela bona Hamata ena raka vareai gabuna, ela bona Sedada. 16 Ma ia lao Berota bona Sibiraimi dekenai, inai hanua ruaosi be Damaseko bona Hamata edia hetoa gabuna dekenai idia noho, ma ia lao ela bona Hatikono, Haurana ena hetoana kahirakahira. 17 Unai dainai inai mirigini hetoana be Davara Badana dekena amo ia lao, ela bona Enono hanua dekenai, Damaseko bona Hamata edia hetoana gabuna dekenai.

18 “Dina daekau kahana ena tano hetoana be Enono dekena amo do ia matamaia, Damaseko bona Haurana edia huanai dekenai do ia lao, bona Ioridane Sinavai dekena amo do ia lao, Gileada bona Israela tanodia edia huanai hetoana be unai, ela bona Davara Mase, ela bona Tamara. Dina daekau kahana hetoana be unai.

19 “Diho kahana ena tano hetoana be Tamara dekena amo do ia matamaia, do ia lao ela bona Meribata Kadesi ranu gabudia, vadaeni Aigupito Dokana dekena amo do ia lao, ela bona Davara Badana. Diho kahana hetoana be unai.

20 “Dina diho kahana ena tano hetoana be Davara Badana, ela bona gabu ta, Hamata raka vareai ena dina diho kahana dekenai. Dina diho kahana hetoana be unai.

21 “Inai tano ibounai be emui iduhu edia huanai do umui haria. 22 Inai tano be emui ahuna korikori do ia lao, umui emui, bona idau taudia, emui huanai idia noho, bona edia natudia be emui huanai idia havaraia vadaeni taudia. Idia be Israela memero korikori hegeregerena do idia lao umui emui huana dekenai. Bona idia ese edia ahuna tano kahana do idia abia, Israela taudia edia huanai. 23 Edena iduhu lalonai idau tauna ta ia noho, unuseni iena tano ahuna do umui henia. Lau, Lohiabada Dirava ese lau hereva vadaeni inai.”

<- ESEKIELA 46ESEKIELA 48 ->