4 “Vadaeni bema tau ta ese kibi ena regena ia kamonai, to ia noho kava, ia hunia lasi, unai neganai unai tuari taudia ese ia do idia alaia, bona iena mase be sibona ena kerere dainai. 5 Iena mase be ia sibona ena kerere dainai, badina be unai sisiba ia kamonai lasi. Bema unai sisiba ia kamonai neganai, ia be do ia heau mauri.
6 “To bema naria tauna ese ia itaia, tuari taudia be idia mai noho, bona kibi ia hiriria lasi, tuari taudia be do idia mai, unai kara dika taudia do idia alaia mase. To lau be do lau gwau edia mase be unai naria tauna ena kerere dainai. Bona ia ese iena kerere davana do ia abia.
7 “Unai dainai, tanobada tauna e, lau ese Israela besena ena naria tauna oi lau halaoa inai. Oi ese lauegu sisiba hereva idia dekenai do oi hamaoroa.
8 “Bema lau gwau kara dika tauna ta be do ia mase, vadaeni oi ese ia do oi hamaoroa iena kerere daladia do ia hadokoa. Bema oi sisiba henia lasi neganai, iena kara dika be do ia noho, bona ia be do ia mase. To lauegu vairana dekenai, unai tau ena mase be oi sibona oiemu kerere, bona oi ese oiemu kerere davana do oi abia.
9 “Bema oi ese kara dika tauna ta oi sisiba henia momokani, bona iena kara dika ia hadokoa lasi, ia be do ia mase iena dika dainai. To oi be kerere lasi dainai oi be do oi mauri.”
11 Lohiabada ese lau dekenai ma ia hamaoroa, ia gwau, “Israela taudia dekenai lauegu hereva do oi hamaoroa, lau gwau, ‘Lau Lohiabada, mauri Diravana ese kara dika tauna ena mase lau moalelaia lasi. To dika tauna bema iena dika ia rakatania, vadaeni mauri ia davaria, unai kara dekenai do lau moale momokani. Israela taudia e, umui emui kara dika umui hadokoa! Badina dahaka umui ese mase umui ura henia noho?’ ”
12 Ma Lohiabada ese Esekiela ia hamaoroa, ia gwau, “Tanobada tauna e, Israela taudia do oi hamaoroa, bema tau namona ia kara dika neganai, iena kara namona, guna ia karaia gauna, ese do ia hamauria lasi. Bema tau dikana ese iena kara dika ia hadokoa, ia ese iena kerere davana do ia davaria lasi. To bema tau namona ese kara dika dalana ia hamatamaia, ia be do ia mauri diba lasi, badina iena kara namona gunana be do lau laloa lasi.
13 “Momokani nega haida lau ese tau namona dekenai lau gwauhamata henia, ia be do ia mauri. To bema ia ese iena kara maoromaoro gunadia ia abidadama henia, bona ia ese kara dika ia hamatamaia, lau ese iena namo gunana do lau laloa lasi. Ia be iena kara dika dainai do ia mase.
14 “Inai danu, sedira lau ese tau dikana do lau sisiba henia ia be do ia mase. To bema iena kara dika ia rakatania, bona kara maoromaoro ia karaia, ia be do ia mauri. 15 Bema ia ese abiatorehai ena toana ia henia lou, o ia ese ia henaoa gauna ia henia lou, bona bema kara dika ia hadokoa, bona mauri idia henia taravatudia ia badinaia neganai, ia be do ia mase lasi. Ia be do ia mauri. 16 Lau ese iena kara dika, guna ia karaia gaudia do lau gwauatao, bona ia be do ia mauri, badina ia ese kara maoromaoro bona kara namodia ia karaia dainai.
17 “Bona oiemu bese taudia ese lauegu kara idia herevalaia noho, idia gwau lauegu kara be maoro lasi, a? Lasi momokani, to Israela taudia, idia edia kara be maoro lasi.
18 “Bema kara maoromaoro tauna ese iena kara namona ia rakatania, bona kara dika ia hamatamaia, ia be unai kara dainai do ia mase.
19 “To bema kara dika tauna ese iena kara dika ia rakatania, bona kara maoromaoro, bona kara namona ia karaia neganai, ia ese unai kara dainai do ia mauri.
20 “To Israela besena e, umui gwau lauegu kara be maoro lasi. Lau ese umui ta ta do lau kota henia, emui kara ta ta ibounai hegeregerena.”
22 Heau mauri tauna be do ia ginidae lasi neganai, unai adorahi dekenai Lohiabada ena siahu be egu latanai ia mai, bona unai siahu ena mamina lau abia. Kerukeru dabai, unai tau ia ginidae neganai, Lohiabada ese egu gadona ia hanamoa, bona hereva dalana ia henia lou lau dekenai.
25 Ma Lohiabada ia gwau, “Esekiela e, lauegu hereva idia dekenai do oi hamaoroa, lau gwau: Lau inai Lohiabada Dirava, umui ese kara dika momo umui karaia noho. Vamu umui alaia neganai, rara umui bubua ore lasi, to mai rara danu umui ania noho. Umui ese dirava koikoi dekenai umui tomadiho noho. Umui ese taunimanima umui alaia noho. Edena bamona umui laloa inai tano umui abia diba, a?
26 “Umui emui tuari kaia umui abidadama henia noho. Emui kara be mai bodaga danu. Umui ibounai ese heudahanai umui karaia noho. Edena bamona umui laloa inai tano be umui emui? Umui be hegeregere lasi momokani!
27 “Ma Esekiela e, idia do oi hamaoroa inai: Lau be mauri Diravana, bona lau hereva momokani inai, Israela ena hanua, idia hadikaia ore hanuadia idia noho taudia be tuari taudia ese do idia alaia ore. Bona hanua ena murimurinai idia noho taudia be uda boroma ese do idia anidia. Ma ororo bona nadi edia matuna dekenai idia hunia noho taudia be gorere dekena amo do idia mase.
28 “Lau ese inai tano do lau hadikaia ore, vadaeni nadi kavakava gabuna do lau halaoa. Guna be Israela taudia ese edia goada dainai idia hekokoroku, to lau ese edia goada do lau haorea momokani. Israela ena ororo ibounai be uda dikana do lau halaoa, vadaeni tau ta ese idia do ia raka hanaia diba lasi.
29 “Edia kara dikadia dainai lau panisidia, bona edia tano be nadi kavakava gabuna lau halaoa neganai, idia be do idia diba, lau be Lohiabada.”
32 “Idia dekenai oi be lalokau ane ia abia noho tauna sibona bamona, iena gadona be namo herea, bona gita be ia gadaralaia namonamo. Badina be oiemu hereva be idia kamonai, to kara ta do idia karaia lasi.
33 “To gabeai, oiemu hereva ibounai edia anina do idia vara momokani neganai, idia be do idia diba, peroveta tauna ta be idia edia huanai ia noho vadaeni.”
<- ESEKIELA 32ESEKIELA 34 ->