1 Lohiabada ese Mose dekenai ma ia hereva, ia gwau, “Umui ese akasia audia dekena amo boubou patana ta, boubou gabua totona gauna, do umui karaia. Iena lata be mita rua, 20 sentamita, ma iena lababa danu be mita rua, 20 sentamita, bona iena ataiai be mita ta, 30 sentamita. 2 Boubou patana ena latanai doa 4 do umui koroa, iena kona 4 dekenai. Inai doa be pata danu au tamona dekena amo do umui karaia. Boubou patana ena kopina ibounai be auri laboralabora dekena amo do umui koua momokani. 3 Lahi kahu udaia uro bona sipeidi maragidia bona disi bona foka bona lahi huaia kapusi be auri laboralabora dekena amo do umui karaia.

4 “Auri laboralabora dekena amo lahi au rakuraku gabua patana ta, mai ena matuna momo, reke bamona gauna, do umui karaia. Inai reke bamona patana ena kona 4 dekenai auri laboralabora rini 4 do umui kwatua auka.

5 “Inai reke bamona patana be henuna kahanai, boubou patana ena aena 4 dekenai do umui kwatua auka, aena edia huana dekenai. 6 Akasia audia dekena amo boubou patana huaia audia do umui karaia, bona auri laboralabora dekena amo do umui koua. 7 Bona inai audia be rini, pata ena kahana kahana dekenai idia kwatua noho gaudia, edia lalonai do umui toia vareai, pata be do umui huaia totona.

8 “Inai boubou patana be maua bamona do umui karaia, reirei palakadia dekena amo do umui koua, to iena lalona kahanai au o reirei be lasi. Gau ibounai be do umui karaia, ororo dekenai laulau oi dekenai lau hedinaraia hegeregerena.

9 “Palai dubu koua hagegea totona, koua dabua badana do umui karaia, dabua namodia dekena amo. Diho kahana dekenai koua dabua ena lata be 44 mita. 10 Auri laboralabora du ibounai 20 ese inai diho kahana koua dabua do idia dogoatao. Inai du be auri laboralabora maua 20 edia lalonai do idia gini. Du edia latanai siliva dekenai umui karaia ba be do umui kwatua kau, bona inai siliva ba dekenai koua dabua taua dae totona siliva kimai momo do umui kwatua kau.

11 “Mirigini kahana koua dabua danu be diho kahana koua dabua hegeregerena do umui karaia.

12 “Dina ia diho kahana ena koua dabua, ena lata 22 mita do umui karaia. Du ibounai 10, mai edia auri laboralabora maua 10 danu do umui karaia. Inai maua be mai edia matudia, du idia gini gabudia. 13 Palai Dubu ena dina daekau kahanai danu ena koua dabua ena lata be 22 mita. Inai kahana koua dabua lalonai be raka vareai iduara ia noho.

14 “Iduara ena kahana ta dekenai du toi, mai lalonai idia gini maua, do umui atoa, bona inai du dekenai koua dabua, iena lata 6 mita, 60 sentamita do umui taua dae. 15 Ma iduara ena kahana dekenai du ma toi mai edia maua do umui atoa, bona idia dekenai koua dabua, iena lata 6 mita 60 sentamita do umui taua dae.

16 “Ma iduara danu be sibona mai ena koua dabua, dabua namo herea, ena lata be 9 mita. Iena dabua be mamoe huina, namo herea gauna, ena kala be bulu, kakakaka sisina, bona kakakaka. Herahera danu be inai koua dabua ena latanai do umui turia namonamo. Inai koua dabua be du 4, mai edia maua 4, edia latanai do umui taua dae.

17 “Palai Dubu ia koua hagegea koua dabua maguna ena du ibounai be mai edia siliva ba, siliva kimai, bona lalonai idia gini maua danu, auri laboralabora dekena amo karaia gaudia. 18 Inai koua dabua badana ena lata be 44 mita, iena lababa be 22 mita, bona iena ataiai be mita rua, 20 sentamita. Koua dabua be dabua namo herea dekena amo do umui karaia, bona du idia gini lalonai maua be auri laboralabora gaudia.

19 “Palai Dubu lalonai kohu ibounai be auri laboralabora dekena amo do umui karaia. Palai Dubu ena varo edia ikoko, bona Palai Dubu ia hagegea koua dabua ena varo edia ikoko ibounai danu be auri laboralabora dekena amo do umui karaia.

20 “Israela taudia do oi hamaoroa, olive huahua ena oela namo herea momokani lamepa totona do idia mailaia, lamepa be nega ibounai do idia gabua totona. 21 Lauegu Palai Dubu lalonai be Arona mai ena natuna tau danu ese lamepa do idia atoa, Taravatu Maua ia hunia noho koua dabua helagana ena vairana kahana dekenai. Bona Arona, mai ena natuna tau ese dina ibounai lamepa dekenai oela do idia bubua, vadaeni lamepa be adorahi ela bona dabai do ia diari. Inai taravatu be umui Israela taudia ese do umui naria ela bona hanaihanai, doko lasi.”

<- ESODO 26ESODO 28 ->