1 Ma Mose ia hereva, ia gwau, “Lohiabada, emui Dirava, ese do umui noholaia tano dekenai umui do ia hakaua vareai neganai, umui emui vairana dekenai bese ibounai 7 do ia lulua. Inai bese be: Hiti taudia, Girigasa taudia, Amoro taudia, Kanana taudia, Perisi taudia, Hivi taudia, Iebusu taudia. 2 Lohiabada, emui Dirava, ese umui emui siahu henunai unai bese do ia atodia neganai, bona umui halusidia neganai, do umui aladia ore momokani. Idia danu do umui maino lasi, bona umui bogahisihisi henidia lasi. 3 Unai bese taudia ta do umui adavaia lasi, umui emui natudia kekeni be edia uhau taudia dekenai do umui henidia lasi, bona edia natudia kekeni do umui abidia lasi emui uhau totona. 4 Badina unai bamona neganai, idia ese emui natudia Lohiabada dekena amo do idia hakaua siri, idau dirava tomadiho henia totona. Unai bamona ia vara neganai, Lohiabada ese umui do ia hadikaia ore haraga. 5 To inai bamona do umui karaia: Edia boubou patadia do umui makohia maragimaragi, edia dubu au tubua do umui botaia maragimaragi, edia hahine dirava Asera ena toana gauna do umui utua maragimaragi, bona edia kaivakuku do umui gabua ore.

6 “Badina umui be bese helagana, Lohiabada emui Dirava, ena. Lohiabada, emui Dirava ese tanobada bese ibounai dekena amo umui ia abia hidi vadaeni, iena bese korikori do umui lao totona.

7 “Lohiabada ese umui ia lalokau henia, bona umui ia abia hidi, umui be bese badana dainai, a? Lasi, bese ibounai edia huanai umui be maragi herea. 8 To Lohiabada ese umui ia lalokau henia, bona iena gwauhamata emui sene taudia dekenai ia ura hamomokania. Unai dainai mai ena siahu bada, ia ese Aigupito ena king Farao ena hesiai mai guia danu dekena amo umui ia hamauria. 9 Unai dainai do umui laloatao, Lohiabada emui Dirava, ia sibona be Dirava korikori, ia be abidadama kara Diravana. Ia ese iena gwauhamata do ia hamomokania, bona iena noho hanaihanai lalokauna do ia henia noho, ela bona uru 1,000, ia dekenai idia lalokau henia, bona iena Taravatu idia badinaia taudia dekenai. 10 To ia dekenai idia badu henia taudia do ia bogahisihisi henia lasi, edia dika davana do ia henia haraga. 11 Unai dainai hari dina umui dekenai lau henia noho Taravatu bona oda ibounai do umui badinaia namonamo.

12 “Bema inai Taravatu umui kamonai henia, bona edia kara do umui karaia momokani neganai, Lohiabada, emui Dirava ese iena gwauhamata umui dekenai do ia badinaia noho. Bona ia ese iena noho hanaihanai lalokauna umui dekenai do ia henia noho, emui sene taudia dekenai ia gwauhamata henia hegeregerena. 13 Ia ese umui do ia lalokau henia, bona umui do ia hanamoa, emui bese do ia habadaia, emui natudia danu do idia momo herea. Emui tano danu do ia hanamoa, vadaeni emui koni, emui uaina, emui olive dehoro, emui boromakau natudia bona mamoe natudia danu do idia momo herea. Inai gau namodia ibounai be unai tano, emui sene taudia dekenai ia gwauhamata do ia henia tano dekenai, Lohiabada ese umui dekenai do ia henia. 14 Bese ibounai edia huanai umui do ia hanamoa bada. Emui taunimanima bona emui ubua gaudia ibounai ese natudia do idia havaraia, Dirava ese ta ena rogorogo do ia koua lasi. 15 Lohiabada ese gorere ibounai be umui dekena amo do ia kokia ore. Bona Aigupito dekenai umui abia gorere, be ma umui dekenai do ia atoa lasi. To umui idia dagedage henia taudia dekenai Lohiabada ese inai gorere do ia atoa. 16 To Lohiabada, emui Dirava, ese emui siahu henunai ia atoa bese ibounai, be do umui alaia ore. Do umui bogahisihisi henidia lasi, bona edia dirava do umui tomadiho henidia lasi. Badina be unai bamona umui karaia neganai kerere do umui davaria.

17 “Sedira do umui laloa inai bamona, bona do umui gwau, ‘Inai besedia be badadia momokani, edena bamona ita luludia diba?’ 18 To idia dekenai do umui gari lasi. Lohiabada, emui Dirava, ese Farao bona Aigupito taudia ibounai dekenai ia karaia gaudia do umui laloatao. 19 Hisihisi bona toa bona hoa karadia be emui matana ese idia itaia, bona Lohiabada, emui Dirava, ese mai goada bona siahu bada danu umui ia hamauria. Inai karadia do umui laloatao noho. Badina Lohiabada, emui Dirava, ese hari umui gari henia besedia ibounai dekenai unai bamona idia dekenai do ia karaia. 20 Ma danu, Lohiabada emui Dirava ese nanigo be edia huana dekenai do ia siaia, ela bona idia heau mauri taudia bona idia hunia noho taudia danu be idia mase ore. 21 Do umui gari henidia lasi, badina be Lohiabada, emui Dirava, be umui dekenai ia noho. Ia be Dirava badana, taunimanima ibounai ese ia dekenai idia gari bada. 22 Lohiabada emui Dirava ese inai bese metairametaira umui emui vairanai do ia luludia. Do umui aladia mase haraga lasi, uda boromadia do idia momo herea emui tano dekenai garina. 23 To Lohiabada, emui Dirava ese umui emui siahu henunai do ia atodia, do idia daradara bada herea, ela bona idia ore momokani. 24 Edia king be umui emui siahu henunai do ia atodia. Do umui aladia, bona edia ladana be do idia boio momokani. Tau ta ese umui emui kara do ia koua diba lasi, to ibounai be do umui alaia ore. 25 Edia dirava laulau gaudia be lahi dekenai do umui gabua ore. Idia dekenai ia noho siliva bona golo do umui ura dikadika lasi, bona umui abia lasi, do umui kerere garina. Lohiabada, emui Dirava ese dirava laulau gaudia dekenai ia badu henia momokani. 26 Inai dirava laulau gaudia emui ruma dekenai do umui abia vareai lasi, edia dika ese umui do ia hadikaia ore garina. Unai bamona dirava laulau gaudia do umui negea momokani, badina idia be Lohiabada ese ia badu henidia momokani.”

<- DEUTERONOMI 6DEUTERONOMI 8 ->